އިންޑިއާ އާއި ކެނެޑާގެ ގުޅުން ގޯސްވެ، ސަފީރުންނާއި ޑިޕްލޮމެޓުން ބޭރުކޮށްފި

މިދިޔަ އަހަރު ކެނެޑާގައި ސިކުންގެ ޖަމާއަތަށް ނިސްބަތްވާ ފަރުދެއް މަރާލުމާއި ގުޅިގެން، އިންޑިއާ އާއި ކެނެޑާގެ ދެމެދުގައި ޑިޕްލޮމެޓިކް ގުޅުން ގޯސްވެ، ދެ  ޤައުމުން ވަނީ ދެޤައުމަށް ނިސްބަތްވާ ސަފީރުންނާއި ޑިޕްލޮމެޓުން ބޭރުކޮށްފައެވެ.

 ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވި ގޮތުގައި، ހަރުދީޕް ސިންގް ނިޖާރު މަރާލުމުގައި އިންޑިއާގެ އޭޖެންޓުން ބައިވެރިވެފައިވާ ކަމަށް ބެލެވޭ ތުހުމަތުތަކާ ގުޅިގެން ފުލުހުން ތަޙްޤީޤު ފެށުމާ އެކު، އެމަނިކުފާނުގެ ސަރުކާރުން މި ފިޔަވަޅު އަޅަން ޖެހުނީކަމަށެވެ.

 ކެނެޑާގެ ފުލުހުންގެ ތުހުމަތުގައިވާ ގޮތުން، އިންޑިއާގެ އޭޖެންޓުން ޤާނޫނާ ޚިލާފު އެކިއެކި ޢަމަލުތަކުގައި ބައިވެރިވެ، އިންޑިއާގައި ސިކުންނަށް ވަކި ދައުލަތެއް ޤާއިމުކުރުމަށް މަސައްކަތްކުރާ ޙަރަކާތަށް ތާއީދުކުރާ ފަރާތްތަކަށް އެހީތެރިވެފައިވާ ކަމަށެވެ.

 އިންޑިއާއިން ވަނީ މި ތުހުމަތުތައް "ޙަޤީޤަތާ ޚިލާފު" ކަމަށް ބުނެ ދެކޮޅު ހަދާ، ޓްރޫޑޯ ސިޔާސީ މަންފާއެއް ހޯދުމަށްޓަކައި ކެނެޑާގެ ސިކުންގެ މުޖުތަމަޢުގެ ތާއީދު ހޯދަން މަސައްކަތްކުރާ ކަމަށް ތުހުމަތުކޮށްފައެވެ.

 ހޯމަ ދުވަހުގެ މެންދުރުފަހު ލައިވް ޓެލެވިޜަން ޕްރޮގްރާމެއްގައި ވާހަކަފުޅު ދައްކަވަމުން، ބޮޑުވަޒީރު ޓްރޫޑޯ ވިދާޅުވީ ކެނެޑާގައި ހިންގާ ޤާނޫނާ ޚިލާފު ޢަމަލުތަކަށް އިންޑިއާއިން ތާއީދުކުރުމަކީ "އަސާސީ ގޯހެއް" ކަމަށާއި، އެންމެ ފަހުގެ ހޯދުންތަކަށް ބިނާކޮށް އެމަނިކުފާނުގެ ސަރުކާރުން ފިޔަވަޅު އަޅަން ޖެހުނީ ކަމަށެވެ.

 "ރޯޔަލް ކެނޭޑިއަން މައުންޓެޑް ޕޮލިސް އިން ހާމަކޮށްފައިވާ ހެކިތަކަށް އިހުމާލުވެވޭކަށް ނެތް،" ބޮޑުވަޒީރު ވިދާޅުވިއެވެ. ކެނެޑާގެ ޢާންމު ސަލާމަތަށް ނުރައްކާ ކުރިމަތިކުރުވާ ޤާނޫނާ ޚިލާފު ޙަރަކާތްތަކަށް ހުރަސްއެޅުމަކީ ކޮންމެހެން ކުރަންޖެހޭ ކަމެއް. އެހެންކަމުން އަޅުގަނޑުމެން ފިޔަވަޅު އެޅީ.

 އިންޑިއާއިން ވަނީ މި ހުރިހާ ތުހުމަތުތަކެއް ހަރުކަށި ޢިބާރާތުން ދޮގުކޮށް، ކެނެޑާއިން މި ދަޢުވާތަކަށް ތާއީދުކުރާ އެއްވެސް ހެއްކެއް ހުށަހަޅާފައި ނުވާ ކަމަށް ބަޔާންކޮށްފައެވެ.