ގޫގުލް އޭއައި ޑޭޓާ ސެންޓަރުތަކަށް ނިއުކްލިއަރ ހަކަތަ ބޭނުންކުރަން ފަށަނީ

ދުނިޔޭގެ އެންމެ ބޮޑެތި ޓެކްނޮލޮޖީ ކުންފުނިތަކުގެ ތެރެއިން އެއް ކުންފުނި ކަމަށްވާ ގޫގުލްއިން އެ ކުންފުނީގެ އާޓިފިޝަލް އިންޓެލިޖެންސް (އޭއައި) ޑޭޓާ ސެންޓަރުތަކަށް ހަކަތަ ފޯރުކޮށްދިނުމަށް ނިއުކްލިއަރ ހަކަތަ ބޭނުންކުރަން ފަށައިފިއެވެ.

ގޫގުލްއިން ބުނެފައިވާ  ގޮތުގައި، އެ ކުންފުނީގެ އޭއައި ޑޭޓާ ސެންޓަރުތަކަށް ބޭނުންވާ ގިނަ އަދަދެއްގެ ހަކަތަ އުފެއްދުމަށް ކުދި ނިއުކްލިއާ ރިއެކްޓަރުތައް ބޭނުންކުރުމަށް ކައިރޯސް ޕަވަރ އާއެކު އެއްބަސްވުމެއްގައި ސޮއިކޮށްފައިވެއެވެ.

މި އެއްބަސްވުމުގެ ދަށުން، މި ދިހަ އަހަރު ތެރޭގައި ފުރަތަމަ ރިއެކްޓަރ ބޭނުންކުރަން ފަށާނެ ކަމަށާއި، 2035 ވަނަ އަހަރުގެ ނިޔަލަށް އިތުރު ރިއެކްޓަރެއް އޮންލައިންކޮށް ގެނެވޭނެ ކަމަށް ގޫގުލްއިން ބުނެފައިވެއެވެ. ނަމަވެސް، މި ޑީލްގެ އަގާއި ޕްލާންޓްތައް އަޅާނެ ތަނުގެ ތަފްސީލު އަދި ހާމަކޮށްފައެއް ނުވެއެވެ.

ޓެކްނޮލޮޖީ ދާއިރާގެ މާހިރުން ފާހަގަކުރާ ގޮތުގައި، އޭއައި ޓެކްނޮލޮޖީ ތަރައްޤީވަމުން ދިއުމާއެކު، ޑޭޓާ ސެންޓަރުތަކުން ބޭނުންކުރާ ހަކަތައިގެ މިންވަރު އިތުރުވަމުން ދާތީ، ޓެކްނޮލޮޖީ ކުންފުނިތަކުން ދަނީ ނިއުކްލިއާ ހަކަތަ ފަދަ ދެމެހެއްޓެނިވި އަދި ހަރުދަނާ ވަސީލަތްތަކަށް އަހުލުވެރިވަމުންނެވެ.

ވޯލް ސްޓްރީޓްގެ ބޭންކިން ޖަޔަންޓް ގޯލްޑްމަން ސެކްސްއިން ފާހަގަކޮށްފައިވާ ގޮތުގައި، މި ދިހަ އަހަރު ނިމޭއިރު ޑޭޓާ ސެންޓަރުތަކުން ދުނިޔޭގެ ހަކަތަ ބޭނުންކުރާ މިންވަރު ދެގުނައަށްވުރެ އިތުރުވާނެއެވެ. މިކަމަކީ ޓެކްނޮލޮޖީ ކުންފުނިތަކުން ދެމެހެއްޓެނިވި ހަކަތައިގެ ވަސީލަތްތަކަށް އަހުލުވެރިވުމަށް ބާރުއަޅާ ސަބަބެއް ކަމުގައި ވެސް ބެލެވެއެވެ.

ގޫގުލްގެ މި ފިޔަވަޅަކީ ޓެކްނޮލޮޖީ ދާއިރާގައި ތިމާވެށްޓާ ރައްޓެހި ހަކަތައިގެ ވަސީލަތްތަކަށް އަހުލުވެރިވުމުގެ މުހިންމު ބަދަލެއްގެ ގޮތުގައި ފާހަގަކުރެވެއެވެ. މީގެ ސަބަބުން  އެހެން ބޮޑެތި ޓެކް ކުންފުނިތަކުން ވެސް މިފަދަ ފިޔަވަޅުތައް އަޅާނެ ކަމަށް ބެލެވެއެވެ.