ވެލާނާ އިންޓަރނޭޝަނަލް އެއަރޕޯޓުގެ ކުރީގެ ރަންވޭ އަލުން މަރާމާތުކުރުމުގެ އެއްބަސްވުމުގައި ސޮއިކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅާ އެއްގޮތަށް، ވެލާނާ އިންޓަރނޭޝަނަލް އެއަރޕޯޓާއި އިޤްތިޞާދީ ސަރަޙައްދު ތަރައްޤީކުރުމަށް އެކުލަވާލާފައިވާ 20 އަހަރުގެ މާސްޓަރ ޕްލޭނާ އެއްގޮތަށް، މިއަދު ވަނީ ކުރީގެ ރަންވޭ އަދި މިހާރުގެ ޓެކްސީވޭ ޗާލީ އަލުން އިމާރާތްކުރުމުގެ މަސައްކަތް ފަށާފައެވެ.

އެއާޕޯޓުގައި ބޭއްވި ރަސްމިއްޔާތުގައި މަރާމާތު ކުރުމުގެ މަސައްކަތް ރަސްމީކޮށް ހަވާލުކޮށްފައިވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އަށެވެ. ޓެކްސީވޭ މަރާމާތު ކުރުމުގެ މަސައްކަތް އަންނަ މަހު ފަށާ އިރު އެ މަސައްކަތް ނިންމާލަން ކަނޑައަޅާފައިވަނީ 2027 ވަނަ އަހަރުގެ މެދުތެރެއަށެވެ.

ޓެކްސީވޭ ހެދުމަށް ބީޔޫސީޖީއާ ހަވާލުކުރި އިރު މިހާރު ބޭނުން ކުރާ އާ ރަންވޭ ހަދާފައިވަނީ ވެސް އެ ކުންފުނިންނެވެ.

"ޓެކްސީވޭ ޗާލީ ރީބިލްޑް" ގެ ގޮތުގައި ފަށާ ޕްރޮޖެކްޓްގެ ދަށުން ރަންވޭ ޒަމާނީ ފެންވަރަކަށް ހަދާނެކަމަށް މައުލޫމާތުލިބެއެވެ. އެ ރަންވޭގައި 3،200 މީޓަރު ހުންނަ އިރު، އެ ރަންވޭ ތަރައްގީ ކުރާނީ ޕެރެލަލް ޓެކްސީވޭއެއްގެ ގޮތުގަ އެވެ.

އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދު ވިދާޅުވީ، ކުރީގެ ރަންވޭ، އަދި މިހާރުގެ ޓެކްސީވޭ ހަދާފައިވަނީ 1976 ވަނަ އަހަރު ކަމަށެވެ. އެއީ އެއާޕޯޓުގެ އެންމެ ގިނަ ދުވަސްވީ އިންފްރާސްޓްރަކްޗާ ކަމަށެވެ.

ޓެކްސީވޭ ޗާލީ އަލުން އިމާރާތްކުރުމުގެ މަސައްކަތް ނިމުމުން، އެއަރޕޯޓުގެ ޖާގައިގެ ދަތިކަން ޙައްލުވެ، އިތުރު ފްލައިޓްތަކަށް ޚިދުމަތް ފޯރުކޮށްދިނުމުގެ ޤާބިލުކަން އިތުރުވެގެންދާނެ ކަމަށް ބެލެވެއެވެ.