ނިމިދިޔަ ހަފްތާގެތެރޭ މާލެ ސިޓީ ކައުންސިލްގެ ކޮމިއުނިޓީ އެންގޭޖްމެންޓް ޔުނިޓަށް 846 މައްސަލަ ހުށައަޅާފައިވޭ

ނިމިދިޔަ ހަފްތާގެތެރޭ މާލެ ސިޓީ ކައުންސިލްގެ ކޮމިއުނިޓީ އެންގޭޖްމެންޓް ޔުނިޓަށް 846 މައްސަލަ ހުށައަޅާފައިވާކަމަށް ކައުންސިލްގެ ތަފާސްހިސާބުތަކުން ދައްކައިފިއެވެ.

މާލެ ސިޓީ ކައުންސިލުން "ވީކްލީ ސްޓެޓިކްސް" ގެ ނަމުގައި ނެރޭ ތަފާސްހިސާބުތަކުން ދައްކާ ގޮތުގައި، މިދިޔަ ޖޫން މަހުގެ 22 އިން 28 ވަނަ ދުވަހުގެ ނިޔަލަށް، އެ ކައުންސިލުން ވަނީ ޖުމްލަ 846 މައްސަލައަށް އެޓެންޑް ވެފައެވެ. އަދި އޭގެ ތެރެއިން، ޖުމްލަ 498 މައްސަލައެއް ނިންމާވާފައިވާއިރު، 348 މައްސަލައެއްގެ ފޮލޯއަޕް ވަނީ ހަދާފައެވެ. ހަމަ އެހެންމެ، 8 މައްސަލައަކާއި ގުޅިގެން މީހުންނަށް ނަޞޭޙަތްދެވިފައިވާއިރު، ޖުމްލަ 12 މައްސަލައެއްގައި ވަނީ ޖޫރިމަނާކޮށްފައެވެ.

މި ތަފާސްހިސާބުތަކުން ދައްކާ ގޮތުގައި، ފާއިތުވެ ދިޔަ ދުވަސްތަކުގައި އެ ކައުންސިލުން އެންމެ ގިނައިން އެޓެންޑްކޮށްފައި ވަނީ، ކުނި މެނޭޖްކުރުމާ ގުޅޭ މައްސަލަތަކަށެވެ. އެގޮތުން، މަގުތަކާއި ގޯޅިތަކާއި ހުސްބިންތަކަށް ކުނި އެޅުމާ ގުޅޭ 253 މައްސަލައަށް ވަނީ އެޓެންޑުވެފައެވެ. އަދި ދެވަނައަށް އެންމެ ގިނައިން އެޓެންޑުކޮށްފައި ވަނީ ޢާންމުންގެ ރައްކާތެރިކަމާ ގުޅޭ މައްސަލަތަކަށެވެ. އެގޮތުން، މިބާވަތުގެ 238 މައްސަލައަކަށް ވަނީ އެޓެންޑްކޮށްފައެވެ.

މާލެ ސިޓީ ކައުންސިލުން ޢާންމުންގެ ރައްކާތެރިކަމަށްޓަކައި މިސްކިތްތަކާއި މައިޒާން އަދި ޕާކުތައް ބަލައި ޗެކް ކުރުމުގެ މަސައްކަތްތައް ކޮށްފައިވާއިރު، ތިންވަނައަށް އެންމެ ގިނައިން އެޓްންޑުކޮށްފައިވަނީ ވެސް ޢާންމުންގެ ޝަކުވާތަކާ ގުޅޭ މައްސަލަތަކަށެވެ. އެގޮތުން، ފުރާޅު ނޫނީ ދިޔަދޮވި އަދި އެއަރ ކޮންޑިޝަން އައުޓްޑޯރ ޔުނިޓުތަކުން މަގުތަކަށް ފެން ލީކުވުން ނުވަތަ ފެންތިކި ޖެހުމާ ގުޅޭ 64 މައްސަލައަކަށް ވަނީ އެޓެންޑްކޮށްފައެވެ.

ކުނިމެނޭޖް ކުރުމާއި، ޢާންމު ޢިޖްތިމާޢީ މިންގަޑާއި ޚިލާފުވުމާއި، ޤަވާޢިދާ ޚިލާފު ހަރަކާތްތަކާއި، ވިޔަފާރީގެ އުސޫލްތަކާ ޚިލާފުވުމާއި، ޢާންމު ޝަކުވާތަކާއި، ޢާންމު ރައްކާތެރިކަމާއި، ޢާންމު ޞިއްޙަތާއި، ޓްރެފިކް އަދި ޕާކިން ވައިލޭޝަނާއި، ގުދުރަތީ އަދި ތިމާވެށީގެ މައްސަލަތައް ގިނަވަމުންދާތީ މިފަދަ ކަންކަން ހުއްޓުވަން މަސައްކަތްކުރުމަށް ކައުންސިލުން ވަނީ އިލްތިމާސްކުރައްވާފައެވެ.