ފާއިތުވި 36 ގަޑިއިރުތެރޭ އިޒްރާއިލުން ދެކުނު ލުބްނާނަށް 340 މިސައިލް ފޮނުވާލައިފައިވޭ!

ފާއިތުވި 36 ގަޑިއިރުތެރޭ އިޒްރާއިލުން ދެކުނު ލުބްނާނަށް 340 މިސައިލް ފޮނުވާލައިފައިވާ ކަމަށް އަލްޖަޒީރާއިން ރިޕޯޓު ކޮށްފިއެވެ. 

އަލްޖަޒީރާގައި ބުނެފައިވަނީ އިޒްރާއިލުން ދެކުނު ލުބްނާނަށް “އާޓިލަރީ” މިސައިލް ބޮން އަޅަމުންދާއިރު ވައިގެ ހަމަލާތައްވެސް ހުއްޓުމެއްނެތި ދެމުންދާ ކަމަށް އަލްޖަޒީރާގައި ބުނެފައިވެއެވެ. 

އިޒްރާއީލުން ބުނެފައިވަނީ އިއްޔެ އެކަނިވެސް ހިޒްބުއްﷲގެ 140 މަރުކަޒަކަށް އަމާޒުކޮށް ހަމަލާދީފައިވާ ކަމަށެވެ. އެއީ، ފާއިތުވި 36 ގަޑިއިރުގެ ތެރޭގައި ޖުމްލަ 340 މިސައިން ނުވަތަ ވައިގެ ހަމަލާތައް ހަމައެކަނި ދެކުނުގެ ބޯޑަރު ސަރަހައްދަށް ދީފައިވާ ކަމަށެވެ. 

 އަލްޖަޒީރާގެ ރިޕޯޓަރު ޢިމްރާން ޚާން ރިޕޯޓު ކުރަމުން ބުނެފައިވަނީ ހަމަލާތަކުގެ ތެރެއިން ގިނަ ހަމަލާތައް އަރައިފައިވަނީ އެމީހުން އެވަގުތު ތިބި ތަނާ ކައިރިއަށް ކަމަށެެވެ.

 އިޒްރާއިލްގެ ޢަސްކަރިއްޔާ އިން ބުނެފައިވަނީ އެމީހުން ލުބްނާންގެ ދެކުނުގެ އެސަރަހައްދު އެކަށް ހަލާކުކޮށްލާނެ ކަމަށެވެ.

ނަމަވެސް ހިޒްބުއްﷲ އިން ބުނަމުންދަނީ އެމީހުން ފަހަތަށް ނުޖެހޭނެ ކަމަށެވެ. އަދި އެމީހުން ހަނގުރާމައިގެ މައިދާނުން ފަހަތަށް ނުޖެހި 24 ގަޑިއިރުވެސް ތިބޭނެ ކަމަށެވެ. 

ހިޒްބުއްﷲ އިން އިތުރަށް ބުނެފައިވަނީ އިޒްރާއިލްގެ ބައެއް ޑްރޯންތައް ހިޒްބުއްﷲ އިން ކާމިޔާބު ކަމާއިއެކު ވައްޓާލާފައިވާ ކަމަށެވެ.

 އިޒްރާއިލުން ލުބްނާނަށް ދެމުންދާ ހަމަލާތައް ވަރުގަދަ ކޮށްފައިވާއިރު ލުބްނާންގެ ދެކުނަށް އޮންނަ ސިޓީއެއް ކަމަށްވާ ނަބާތީ އަށް ވައިގެ ގިނަ ހަމަލާތަކެއް މިއަދު ވަނީ ދީފައެވެ. 

މިހަމަލާތައް ނަބާތީ ސިޓީގެ މުނިސިޕަލްޓީ އިމާރާތާއި ލޯކަލް ގަވަރމަންޓްގެ އެހެން އޮފީސްތަކަށް ވަނީ އަރައިފައެވެ.

މި މިސައިލް ހަމަލާތަކުގެ ސަބަބުން ފަސް މީހުން ޝަހީދު ވެފައިވާ ކަމަށް ލުބްނާންގެ ޞިއްޙީ ވުޒާރާއިން ވަނީ ބުނެފައެވެ. 

ހަމަލާތަކުގެ ސަބަބުން އަނިޔާވެ ތަންތަނުގައި ތާށިވެފައިތިބި މީހުން ސަލާމަތްކުރުމުގެ މަސައްކަތް މީހުން ސަަލާމަތްކުރާ ޓީމުތަކުން ދަނީ ކުރަމުންނެވެ.

 އިސްރާއީލުން ސެޕްޓެންބަރު 23 އިން ފެށިގެން ލުބުނާނަށް ވައިގެ ހަމަލާތައް ދޭން ފަށައިފައިވާއިރު،

 އޭގެ ހަފްތާއެއް ފަހުން ލުބްނާންގެ ބިމަށް އިޒްރާއިލް ސިފައިން ވަނީ އަރައިގަނެފައެވެ. އިޒްރާއިލުން ހަމަލާތައް ދޭން ފެށިފަހުން ލުބުނާނުގައި 1،350 މީހުން ވަނީ ޝަހީދުވެފައެވެ.

މިއީ ލަފާކުރެވޭ ޢަދަދު ކަމަށް އަލްޖަޒީރާގައި ވަނީ ބުނެފައެވެ. އަސްލު ޢަދަދު ސާފުވާނީ ހަމަލާތަކުގެ ސަބަބުން ވެއްޓި ހަލާކުވެފައިވާ ޢިމާރާތްތަކުގެ ދަށް ބަލައި ފާސްކުރެވުމުންނެވެ.