ޣައްޒާގެ އުތުރުގެ ހޮސްޕިޓަލްތަކުގެ ޙާލަތު ބަޔާން ނުކުރެވޭހާ ގޯސް: ހުސާމް އަބޫ ސާފިޔާ

ޣައްޒާގެ އުތުރުގެ ހޮސްޕިޓަލްތަކުގެ ޙާލަތު ބަޔަން ނުކުރެވޭހާ ގޯސް ކަމަށް ޣައްޒާގެ ކަމަލް އަދްވާން ހޮސްޕިޓަލުގެ ޑިރެކްޓަރ ހުސާމް އަބޫ ސާފިޔާ ވިދާޅުވެއްޖެއެވެ.

އަލްޖަޒީރާއަށް މަޢުލޫމާތު ދެއްވަމުން ހުސާމް ވިދާޅުވެފައިވަނީ އިޒްރާއިލްގެ ޢަސްކަރިއްޔާއިން ހަތިޔާރުތަކާއި އެކު ވަށައިލައިފައިވާ ސަރަހައްދުގެ ހޮސްޕިޓަލްތަކަށް ވަނީ ބަޔާން ނުކުރެވޭ ފަދަ ޙާލަތެއް މެދުވެރިވެފައިކަމަށެވެ.

 އެ ސަރަހައްދުގެ ހޮސްޕިޓަލު ތަކުގައި  ތިބި ބަލިމީހުން ސަލާމަތް ކުރުމަށްޓަކައި ރައްކާތެރި ކޯރިޑޯތަކެއް ހުޅުވައި ދިނުމަށް ހުސާމް ވަނީ ގޮވައިލައްވައިފައެވެ. 

 މީގެ 12 ދުވަސް ކުރިން އިޒްރާއީލު ސިފައިން ވަނީ ޣައްޒާގެ އުތުރުގެ ބިންތަކަށް އަރައިގަނެ ވަރުގަދަ ހަމަލާތަކެއް ފަށައިފައެވެ. ހަމަލާތައް ދެމުންދާ ސަރަހައްދުތަކުގެ ތެރޭގައި ބައިތު ހަނޫން އާއި ބައިތު ލާހިޔާ ވެސް ހިމެނެ އެވެ.

އދ.ގެ އިންސާނީ ހައްޤުތަކާ ބެހޭ އޮފީހުން އަންގާރަ ދުވަހު ބުނެފައިވަނީ އިޒްރާއީލުގެ އަސްކަރިއްޔާއިން ވަނީ "އުތުރު ޣައްޒާ،ޣައްޒާގެ އެހެން ސަރަހައްދުތަކާ މުޅިން ވަކިކޮށްލައިފައި” ކަމަށެވެ.

 7 އޮކްޓޯބަރު 2023ން ފެށިގެން އިޒްރާއީލުން ޣައްޒާއަށް ދެމުންދާ  ހަމަލާތަކުގައި ފަލަސްތީނުގެ 42،409 މީހުން މިހާތަނަށް ޝަހީދުވެފައިވެއެވެ.

އަދި 99،153 މީހުން ޒަޚަމްވެފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ވަނީ ހާމަކޮށްފައެވެ. 

 އިޒްރާއީލުގެ ހަމަލާތަކުގަގައި ޝަހީދުވެފައިވާ ފަލަސްޠީނުގެ މީހުންގެ އަސްލު ޢަދަދު ބުނަން ނޭނގޭ ކަމަށާއި އެޢަދަދު 42،000 އަށްވުރެ މާބޮޑަށް ވެސް އިތުރުވާނެ ކަމަށް ވަނީ ލަފާކޮށްފައެވެ. އެގޮތުން ވެއްޓިފައިވާ އިމާރާތްތަކުގެ ދަށާއި އެހެނިހެން ތަންތަނުގައި ވީނުވީއެއްނޭގި ވަޅުލެވިފައިވާ 10،000 މީހުންގެ ހަށިގަނޑު ވާނެ ކަމަށް ވަނީ ލަފާކޮށްފައެވެ.