ކުރީގެ އެމެރިކާގެ ރައީސް ޖިމީ ކާޓަރ 2024 ވަނަ އަހަރުގެ ރިޔާސީ އިންތިޚާބުގައި ވޯޓްލައިފި

ކުރީގެ އެމެރިކާގެ ރައީސް ޖިމީ ކާޓަރ، 100 އަހަރުގެ އުމުރުގައިވެސް، 2024 ވަނަ އަހަރުގެ ރިޔާސީ އިންތިޚާބުގައި ޕޯސްޓަލް ވޯޓު މެދުވެރިކޮށް ވޯޓުލައިފިއެވެ.

ކާޓަރ ސެންޓަރުން ދޫކުރި ރަސްމީ ބަޔާނެއްގައި ހާާމަކޮށްފައިވާ ގޮތުގައި، ކާޓަރ ވޯޓުލެއްވީ ބުދަ ދުވަހުއެވެ. މިއީ އޮކްޓޯބަރު 1 ވަނަ ދުވަހު ކާޓަރ 100 އަހަރު ފުރުނުތާ ގާތްގަނޑަކަށް ދެ ހަފުތާއެއްހާ ދުވަސް ފަހުންނެވެ. މިހާރު ކާޓަރ ދިރިއުޅުއްވަމުން ގެންދަވަނީ ޖޯޖިއާގެ ޕްލެއިންސްގައި ހުންނަ ހޮސްޕިސް ކެއަރ ފެސިލިޓީއެއްގައެވެ.

ކާޓަރގެ ދަރިކަލުން ޗިޕް ކާޓަރ، އޭޕީއަށް ދެއްވި ބަޔާނެއްގައި ވިދާޅުވި ގޮތުގައި، އޭނާގެ ބައްޕަ މި އިންތިޚާބާ މެދު ވަރަށް ބޮޑު އަހައްމިއްޔަތުކަމެއް ދެއްވައެވެ. "އަޅުގަނޑު ދެ މަސް ކުރިން ބައްޕައާ ސުވާލުކުރިން 100 އަހަރު ވަންދެން ދިރިހުންނަން މަސައްކަތް ކުރައްވަނީތޯއޭ. ބައްޕަ ވިދާޅުވީ ނޫނެކޭ، ކަމަލާ ހެރިސްއަށް ވޯޓުލާން ދިރިހުންނަން މަސައްކަތް ކުރައްވަނީއޭ،" ޗިޕް ކާޓަރ ވިދާޅުވިއެވެ.

ޖޯޖިއާގެ ސެކްރެޓަރީ އޮފް ސްޓޭޓް ބްރެޑް ރަފެންސްޕަރގަރ ވިދާޅުވި ގޮތުގައި، ޖޯޖިއާގައި މި އަހަރުގެ ވޯޓުލުން ފެށުނީއްސުރެ ރެކޯޑު އަދަދަކަށް ރައްޔިތުން ވޯޓުލާފައިވެއެވެ. ބުދަ ދުވަހުގެ މެންދުރުފަހުގެ ވަގުތެއްގައި ނަގާފައިވާ ތަފާސްހިސާބުތަކަށް ބަލާއިރު، 460,000އާ ގާތްކުރާ އަދަދެއްގެ މީހުން ވަނީ އިންޕަރސަން ނުވަތަ އެބްސެންޓީ ބެލެޓުން ވޯޓުލާފައެވެ.

ސެކްރެޓަރީ އޮފް ސްޓޭޓްގެ އޮފީހުގެ ޚާއްޞަ ތަރުޖަމާނު ރޮބަޓް ސިނާސް ވިދާޅުވި ގޮތުގައި، ޖޯޖިއާގެ އިންތިޚާބީ ޤާނޫނުތަކުގައި ބަޔާންކޮށްފައިވަނީ އެބްސެންޓީ ބެލެޓެއް ލޯކަލް އިލެކްޝަން އޮފިޝަލުންނަށް ލިބުމާއެކު އެއީ އެވަގުތު ވޯޓުލެވުނީ ކަމުގައި ބެލެވޭނެ ކަމަށެވެ. އެހެންކަމުން، ނޮވެމްބަރު 5 ވަނަ ދުވަހުގެ އިންތިޚާބުގެ ކުރިން ކާޓަރ އަވަހާރަވި ކަމުގައި ވިޔަސް އޭނާގެ ވޯޓު ގުނުމަށް ހަމަޖެހިފައިވެއެވެ.