އިޒްރޭލާއި އީރާނާ ދެމެދު ހަނގުރާމައެއް ހިނގުމުގެ ފުރުސަތު ބޮޑު: ތުރުކީގެ ފޮރިން މިނިސްޓަރު

ތުރުކީގެ ފޮރިން މިނިސްޓަރު ހަކަން ފިދާން ވިދާޅުވެފައިވަނީ އިޒްރޭލާއި އީރާނާ ދެމެދު ހަނގުރާމައެއް ހިނގުމުގެ ފުރުސަތު ވަރަށް ބޮޑުކަމަށާއި، އެކަމަށް ސަރަޙައްދުގެ ޤައުމުތަކުން ތައްޔާރުވާން ޖެހޭކަމަށެވެ. ބުރާސްފަތި ދުވަހު ދެއްވި ޓީވީ އިންޓަވިއުއެއްގައި މިނިސްޓަރު ފިދާން ވިދާޅުވީ، މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން މި ނުރައްކާ އޮތްކަމަށެވެ.

"އަޅުގަނޑުމެން ޤައުމެއްގެ ގޮތުންނާއި ސަރަޙައްދެއްގެ ގޮތުން މިކަމަށް ތައްޔާރުވާން ޖެހޭ. ނަމަވެސް އަޅުގަނޑުމެން ބޭނުމެއް ނުވޭ މި ހަނގުރާމަ އިތުރަށް ފެތުރިގެން ދިއުމަކަށް،" މިނިސްޓަރު ވިދާޅުވިއެވެ. އަދި ވޭތުވެދިޔަ 20 އަހަރު ތެރޭގައި މެދުއިރުމަތި ހަލާކުކޮށްލި ހަނގުރާމަތައް ނިންމާލުމަށް ތުރުކީން މަސައްކަތްކުރަމުންދާ ކަމަށްވެސް ވިދާޅުވިއެވެ.

މީގެއިތުރުން، އީރާނަށް އަމިއްލަ ދިފާއުގައި މަސައްކަތްކުރުމުގެ ޙައްޤު އޮތްކަމަށްވެސް ފިދާން ވިދާޅުވިއެވެ. ހަމާސްގެ ލީޑަރު ޔަހްޔާ ސިންވަރު އަވަހާރަކޮށްލި ކަމަށް ބުނާ ޚަބަރުތަކާ ގުޅޭގޮތުން ވާހަކަދައްކަވަމުން، މިކަމާ ގުޅޭގޮތުން ހަމާސްއިން ބަޔާނެއް ނެރެންދެން އިންތިޒާރުކުރާނެ ކަމަށް ވިދާޅުވިއެވެ.

އީރާނުގެ ފޮރިން މިނިސްޓަރު އައްބާސް އަރަޤްޗީ މި ހަފްތާގައި ތުރުކީއަށާއި، ޖޯޑަނަށާއި އަދި މިސްރަށް ޒިޔާރަތްކުރައްވާނެ ކަމަށް ބަޔާންކުރެވުނެވެ. މި ދަތުރުފުޅުގެ މަޤްޞަދަކީ ޣައްޒާގައި އިޒްރޭލުން ހިންގަމުންދާ ހަނގުރާމަ ހުއްޓުވުމަށް މަޝްވަރާކުރުމެވެ.

މި ކަންތައްތައް ހިނގަމުންދަނީ އިޒްރޭލުން ޣައްޒާގައި ހިންގަމުންދާ އަނިޔާވެރި ހަނގުރާމައިގެ ތެރެއިންނެވެ. މި ހަނގުރާމަ ފެށިގެން އައިސް މިހާރު އަހަރަކަށްވުރެ ގިނަ ދުވަސްވެއްޖެއެވެ. އަދި ފަހަކަށް އައިސް ލެބަނަނަށްވެސް މި ހަނގުރާމަ ފެތުރިގެން ގޮސްފައިވެއެވެ.

އޮކްޓޯބަރު 1 ގައި އީރާނުން އިޒްރޭލަށް 200 މިސައިލް ދޫކޮށްލިއެވެ. މިއީ ހަމާސްގެ ލީޑަރު އިސްމާއީލް ހަނިއްޔާއާއި، ހިޒްބުﷲގެ ލީޑަރު ހަސަން ނަސްރުﷲ އަދި އީރާނުގެ ޖެނެރަލެއް މަރާލި ކަމުގެ ބަދަލު ހިފުމުގެ ގޮތުންނެވެ. އިޒްރޭލުން ބުނެފައިވަނީ މިކަމުގެ ބަދަލު ހިފާނެ ކަމަށާއި، އެ ބަދަލު ހިފުން "ނުރައްކާ، އަދި ހައިރާންކުރުވަނިވި" ގޮތަކަށް ވާނެ ކަމަށެވެ.

 ޣައްޒާގައި އިޒްރޭލުން ހިންގަމުންދާ އަނިޔާވެރި ޢަމަލުތަކާމެދު ތުރުކީން ވަނީ ގަދައަޅައި ފާޑުކިޔާފައެވެ. ތުރުކީން ބުނާ ގޮތުގައި މިއީ ނަސްލު ފޫއަޅުވާލުމުގެ ޢަމަލެކެވެ. އަދި މި ހަނގުރާމަ އިތުރަށް ފެތުރިގެން ގޮސް، އިޒްރޭލުން ލެބަނަނަށް ދެމުންދާ ހަމަލާތަކާއި އީރާނުން އިޒްރޭލަށް ދޭ ޖަވާބުތަކާ ގުޅިގެން ސަރަޙައްދީ ހަމަނުޖެހުމަކަށް ވެގެން ހިނގައިދާނެތީ ތުރުކީން ވަނީ ސަމާލުކަން އިތުރުކޮށްފައެވެ.