ވަޒީފާ ދިން ފަރާތުގެ އިހުމާލުން މީހަކު މަރުވެއްޖެ ނަމަ 1.46 މިލިއަން ރުފިޔާގެ ބަދަލެއް ދޭން ޖެހޭ ޤަވާޢިދެއް!

ވަޒީފާގެމަސައްކަތެއްގެ ތެރޭގައި ވަޒީފާ ދިން ފަރާތުގެ އިހުމާލުން މީހެއްގެ ފުރާނަ ގޮސްފިނަމަ މަދުވެގެން 1.4 މިލިޔަން ރުފިޔާގެ ބަދަލު ދެވޭގޮތަށް ލޭބަރ ރިލޭޝަންސް އޮތޯރިޓީން ޤަވާޢިދެއް އެކުލަވާލައިފިއެވެ.

"މަސައްކަތުގެ މާހައުލުގެ ސަލާމަތާއި ޞިއްޙީ ރައްކާތެރިކަމުގެ ޤަވާޢިދު"ގައި ވަނީ މަސައްކަތުގެ މާހައުލުގައި ނުވަތަ މަސައްކަތުގެ ސަބަބުން މީހަކަށް އަނިޔާއެއްވެ، ވަގުތީ ނުވަތަ ދާއިމީ ނުކުޅެދުންތެރިކަމެއް މެދުވެރިވެއްޖެނަމަ، އަދި މަސައްކަތްތެރިއެއްގެ ފުރާނަ ހިނގައްޖެނަމަ، ޚަރަދުތަކާއި ގެއްލުމުގެ ބަދަލު އެ މީހަކަށް ނުވަތަ އެ މީހެއްގެ ވާރިސުންނަށް ދޭންޖެހޭނެ ކަމަށެވެ.

ޤަވާޢިދުގައިވާ ގޮތުން މަސައްކަތްތެރިއަކަށް އަނިޔާއެއް ވެއްޖެނަމަ، ޖިސްމާނީ، ނަފްސާނީ ގޮތުން ދުޅަހެޔޮ ޞިއްޙަތަކަށް ވާޞިލުވުމަށް ބޭނުންވާ އެކަށީގެންވާ ޞިއްޙީ ފަރުވާ މަސައްކަތް ހަވާލުކުރާ ފަރާތުން ހަމަޖައްސަންވާނެއެވެ. އަދި މަސައްކަތުގައި ލިބޭ އަނިޔާއެއްގެ ސަބަބުން މަސައްކަތަށް ނުނިކުމެވި ހޭދަވާ މުއްދަތަށް އުޖޫރަ ދެވޭނީ އެ މުއްދަތަށް ދީފައިވާ ސަލާމުގެ ސެޓްފިކެޓާއި އެޑްމިޓުކުރި މުއްދަތަށް، ރަޖިސްޓްރީކޮށްފައިވާ ޞިއްޙީ ޚިދުމަތްދޭ މަރުކަޒުން ދޫކުރާ ސެޓްފިކެޓު ހުށައެޅުމުންކަމަށް ޤަވާޢިދުގައި ބުނެފައިވެއެވެ.

ދާއިމީ ނުކުޅެދުންތެރިކަމެއް ދިމާވާ މަސައްކަތްތެރިއަކަށް ގެއްލުމުގެ ބަދަލު މަދުވެގެން 10 އަހަރަށް ނަގައިދޭން ޖެހެއެވެ. ދާއިމީ ނުކުޅެދުންތެރިކަމެއް މެދުވެރިވާ މަސައްކަތްތެރިއަކަށް ނަގައިދެވޭނެ ބަދަލުގެ އެންމެ މަތީ އަގަކީ 19 މިލިއަން ރުފިޔާއެވެ. ބަދަލު ދޭ މިންވަރުގެ ކަނޑައެޅުމުގައި މީހާގެ އުމުރާއި ނުކުޅެދުންތެރިކަމުގެ ނިސްބަތާއި އަދިވެސް އެހެން ބައެއް ކަންކަމަށް ބަލަން ޖެހެއެވެ.