ހަމާސްގެ އިސްވެރިޔާ ޔަހްޔާ ސިންވަރު ޝަހީދުކޮށްލުން: މިހާތަނަށް އެނގިފައިވާ މަޢުލޫމާތު

ހަމާސް ޖަމާޢަތުން ހުކުރު ދުވަހު ވަނީ އެ ޖަމާޢަތުގެ އިސްވެރިޔާ ޔަހްޔާ ސިންވަރު ޝަހީދުވެއްޖެކަން ކަށަވަރުކޮށްދީފައެވެ. 62 އަހަރުގެ ސިންވަރު ޝަހީދުވީ ބުދަ ދުވަހު، ރަފާހުގެ ތަލް އަސް-ސުލްޠާން ސަރަޙައްދުގައި ހިނގި ހަނގުރާމައެއްގައެވެ.

ސިންވަރަކީ ހަމާސް އުފެދުނީއްސުރެ އެ ޖަމާޢަތުގައި ޙަރަކާތްތެރިވެފައިވާ ލީޑަރެއް އަދި ހަނގުރާމަވެރިއެކެވެ. އޭނާގެ ޝަހީދުކޮށްލުމާއި ހަމައަށް، ޣައްޒާގައި ހަމާސް ހިންގި އެންމެ އިސްވެރިޔާގެ ގޮތުގައި މަސައްކަތްކުރަމުން ދިޔައެވެ. މީގެ ކުރިން، 22 އަހަރު އިސްރާއީލުގެ ޖަލުގައި ހޭދަކުރުމަށްފަހު 2011 ވަނަ އަހަރު ވަނީ މިނިވަންވެފައެވެ.

ސިންވަރަކީ އިސްރާއީލުން ޣައްޒާއަށް ކުރަމުންދާ ހަނގުރާމައަށް ހަމާސްއިން ދެމުންދާ ރައްދާއި، ހަނގުރާމަ ހުއްޓުވުމަށް ކުރެވޭ މަސައްކަތްތައް ބެލެހެއްޓި މައިގަނޑު ފަރާތް ކަމަށް ބެލެވެއެވެ. ކައިރޯ އަދި ދޯހާގައި ކުރިއަށްދާ ސުލްޙަ މަޝްވަރާތަކުގައި ބައިވެރިވާ ފަރާތްތަކުން ފާހަގަކުރާ ގޮތުގައި، ހަމާސްގެ އޮފިޝަލުން އިރުޝާދަށް ޣައްޒާގައި ހުރި ސިންވަރާ ގުޅަމުން ގެންދިޔައެވެ.

ބުދަ ދުވަހުގެެ މެންދުރުފަހު 14:00  އާއި 15:00 އާ ދެމެދު، އިސްރާއީލީ ޑިފެންސް ފޯސަސްގެ ބިސްލާޗް ބްރިގޭޑްގެ ރެކޮނައިސަންސް ޔުނިޓުގެ އޮޕަރޭޝަނަލް ޓީމެއް، ޣައްޒާގެ ރަފާ ސަރަޙައްދުގެ ތަލް އަސް-ސުލްޠާން ހިސާބުގައި  މަސައްކަތްތަކެއް ކުރަމުން ދަނިކޮށް، އެ ޓީމަށް ފާހަގަކުރެވުނީ އިމާރާތްތަކުގެ ދެމެދުން މަދު ބަޔަކު ހަރަކާތްތެރިވަމުންދާ މަންޒަރެވެ. ފަހުން ދެނެގަނެވުނު ގޮތުގައި، އޭގެ ތެރެއިން އެކަކަކީ ހަމާސް ޖަމާޢަތުގެ އިސް މެންބަރެއް ކަމަށްވާ ސިންވަރު އެވެ.

ހަނގުރާމަވެރިންގެ މަޢުލޫމާތު ހޯދުމަށް ޑްރޯން ޓެކްނޮލޮޖީ ބޭނުންކުރެވުނެވެ. އޭގެތެރެއިން އެއް ހަނގުރާމަވެރިޔަކު ވީރާނާވެފައިވާ އިމާރާތަކަށް ވަނުމާ ގުޅިގެން، އިސްރާއީލީ ޓީމުން އޭނާގެ ފަހަތުން ޑްރޯނެއް ފޮނުވިއެވެ. ޒަޚަމްތަކަކާއި އެކު ގޮނޑިއެއްގައި އިށީނދެ އިން ސިންވަރު، އިމާރާތުގެ ތެރޭގައި އެންމެ ފަހު މާސްކު އަޅާފައިވާ ހަނގުރާމަވެރިޔާ ހޯދުމަށް ބަލަމުންދިޔަ ޑްރޯނާ ދިމާއަށް ދަނޑިބުރިއެއް އެއްލިއެވެ.

މި ހާދިސާގެ ފަހުން، އެ އިމާރާތަށް ޓޭންކުތަކާއި މިސައިލްތަކުން ހަމަލާދެވުނެވެ. މި ހަމަލާގައި ސިންވަރު ޝަހީދުވިއެވެ.

އިސްރާއީލީ ސިފައިން ގޮވާ ތަކެތި އެތާގައި ރޭވިފައި ހުރެދާނެ ކަމަށް ބިރުގަތުމުގެ ސަބަބުން، އެ ސަރަޙައްދު ރައްކާތެރިކުރެވެންދެން ސިންވަރުގެ ހަށިގަނޑު އެތަނުގައި ބެހެއްޓުނެވެ. އޭގެ ފަހުން އޭނާގެ ހަށިގަނޑު އިސްރާއީލުގެ ފޮރެންސިކް ލެބޯޓަރީއަކަށް ގެންދެވުނެވެ. ކުރިން އޭނާ ހައްޔަރުގައި ހުރިއިރު ނެގިފައިވާ ދަތުގެ އަދި އިނގިލީގެ ނިޝާންތަކާ އަޅާކިޔައި، އެއީ ސިންވަރުކަން ކަށަވަރުކުރިއެވެ.
                   

އިސްރާއީލުން ސިންވަރު ޝަހީދުކޮށްލަން މަސައްކަތްކުރަމުން ދިޔައީ  2023 ވަނަ އަހަރުގެ އޮކްޓޯބަރު 7 ގައި ހަމާސްއިން އިސްރާއީލަށް ދިން ހަމަލާ ރޭވި ކަމަށް ތުހުމަތުކުރެވޭތީއެވެ. މި ހަމަލާގައި 1،139 މީހުން ޝަހީދުވެ، 250 އެއްހާ މީހުން ރަހީނުންގެ ގޮތުގައި ގެންދެވުނެވެ.

ވޭތުވެދިޔަ އަހަރު ތެރޭގައި އިސްރާއީލުގެ ސިފައިން ވަނީ ޣައްޒާގެ ގިނަ އަދަދެއްގެ އުމްރާނީ ވަސީލަތްތައް ތަޅާލައި، 42،000 އަށްވުރެ ގިނަ މީހުން ޝަހީދުކޮށްލާފައެވެ.