އިސްރާއީލުގެ ހަމަލާތައް ހޮސްޕިޓަލްތަކަށް އަމާޒުވަމުން؛ ޖަބާލިޔާ ކޭމްޕުގައި 33 ފުރާނަ ގެއްލުން

ޣައްޒާގެ އުތުރުގައި ހިމެނޭ ޖަބާލިޔާ ކޭމްޕަށް އިސްރާއީލުން ދިން ހަމަލާއެއްގައި މަދުވެގެން 33 ފަލަސްތީނު ރައްޔިތުން ޝަހީދުވެ، 80 އަށްވުރެ ގިނަ މީހުން ޒަޚަމަޚަމްވެއްޖެއެވެ. މި ކޭމްޕަކީ ދެ ހަފްތާއަށްވުރެ ގިނަ ދުވަހު އިސްރާއީލުގެ ސިފައިން ވަށައިލާފައިވާ ސަރަޙައްދެކެވެ.

އިސްރާއީލުގެ ސިފައިން ވަނީ ޣައްޒާގެ އުތުރުގައި ހުރި އަލް-އައުދާ އަދި ކަމާލް އަދްވާން ހޮސްޕިޓަލްތަކަށްވެސް ހަމަލާދީފައެވެ. އަލް-އައުދާ ހޮސްޕިޓަލްގެ ވަގުތީ ޑިރެކްޓަރު ޑރ. މުޙައްމަދު ސަލްހާ ވިދާޅުވި ގޮތުގައި ޖަބާލިޔާއަށް ދެވުނު އެންމެ ފަހުގެ ހަމަލާގައި ޒަޚަމްވި 70 އެއްހާ މީހުންނަށް ފަރުވާދިނުމުގައި އެ ހޮސްޕިޓަލް ވަނީ ޚިދުމަތްދެވޭ މިންވަރަށްވުރެ އިތުރުވެފައެވެ.

ޙަމާސްގެ އިސް ލީޑަރު ޔަހްޔާ ސިންވާރު ޝަހީދުކުރުމަށްފަހުވެސް ޙަމާސް ދަނީ ދެކޮޅުވެރިކަން ދައްކަމުންނެވެ. އެ ޖަމާޢަތުން ބުނާ ގޮތުގައި ޣައްޒާއަށް ދެމުންދާ ހަމަލާތައް ހުއްޓާލައި، އިސްރާއީލުގެ ސިފައިން ފުރިހަމައަށް އަނބުރާ ގެންދިއުމާއި، އިސްރާއީލުގައި ބަންދުކޮށްފައި ތިބި ފަލަސްތީނު ބަންދީން ދޫކޮށްނުލާހާ ހިނދަކު އިސްރާއީލުގެ ހައްޔަރުކުރެވިފައިވާ މީހުން ދޫކޮށެއް ނުލާނެއެވެ.

2023 ވަނަ އަހަރުގެ އޮކްޓޯބަރު 7 އިން ފެށިގެން ޣައްޒާގައި އިސްރާއީލުގެ ހަމަލާތަކުގައި މަދުވެގެން 42,500 މީހުން ން ޝަހީދުވެ، 99,546 މީހުން ޒަޚަމްވެފައިވެއެވެ. އަދި 2023 ވަނަ އަހަރުގެ އޮކްޓޯބަރު 7 ގައި ޙަމާސްއިން އިސްރާއީލަށް ދިން ހަމަލާތަކުގައި މަދުވެގެން 1,139 މީހުން މަރުވެ، 200 އަށްވުރެ ގިނަ މީހުން ހައްޔަރުކުރެވުނެވެ.