ދަރިވަރުންނަށް އަމާޒުކޮށް "އެމްއޭސީއެލް ކެރިއަރ 2024" ޕްރޮގްރާމް ތަޢާރަފުކޮށްފި

މާލޭ އިންޓަރނޭޝަނަލް އެއަރޕޯޓް ހިންގާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން "އެމްއޭސީއެލް ކެރިއަރ 2024" ގެ ނަމުގައި އައު ޕްރޮގްރާމެއް ފަށައިފިއެވެ. މި ޕްރޮގްރާމަކީ ކުންފުނީގެ އިޖްތިމާޢީ ޒިންމާގެ ދަށުން ކުރިއަށްގެންދާ މަސައްކަތެއް ކަމަށް އެމްއޭސީއެލްއިން ބުނެއެވެ.

މި ޕްރޮގްރާމްގެ ފުރަތަމަ ހަރަކާތް ބޭއްވިފައިވަނީ މާލޭގެ ޣާޒީ ސްކޫލުގައެވެ. މި ޕްރޮގްރާމްގެ މަޤްޞަދަކީ ދަރިވަރުންނަށް ވަޒީފާގެ މަޢުލޫމާތު ފޯރުކޮށްދިނުމާއި، އޭވިއޭޝަން ދާއިރާއާއި އެއަރޕޯޓް ހިންގުމުގެ ދާއިރާގައި ހުރި ގިނަގުނަ ފުރުޞަތުތަކާ ބެހޭ މަޢުލޫމާތު ދިނުމެވެ.

މި ޕްރޮގްރާމްގެ ސަބަބުން ދަރިވަރުންނަށް އެމްއޭސީއެލްގައި ހުރި ވަޒީފާގެ ފުރުޞަތުތަކާ ބެހޭ މަޢުލޫމާތު ލިބި، އެ ދާއިރާތަކަށް ޝައުޤުވެރިކަން އުފެދިގެންދާނެއެވެ. އަދި މުސްތަޤްބަލުގައި އެމްއޭސީއެލްއަށް ބޭނުންވާ ހުނަރުވެރި މުވައްޒަފުން އުފެއްދުމަށް މަގުފަހިވެގެންދާނެއެވެ.