އެމްޓީސީސީ "ސުޒުކީ ބީޗް ކްލީންއަޕް" އިވެންޓްގައި 426 ކިލޯގެ ކުނި ނަގައިފި

އެމްޓީސީސީގެ ފަރާތުން އިންތިޒާމްކޮށްގެން ބޭއްވި "ސުޒުކީ ބީޗް ކްލީންއަޕް" އިވެންޓްގައި 426 ކިލޯގެ ކުނި ނަގައިފިއެވެ. މި އިވެންޓް ބޭއްވުނީ ހުޅުމާލޭ ދެވަނަ ފިޔަވަހީގައެވެ.

އެމްޓީސީސީގެ މެނޭޖިންގ ޑިރެކްޓަރ، ޑީސީޕީ (ރިޓަޔަރޑް) އަޙްމަދު ސަޢުދީ އަދި ޑެޕިއުޓީ މެނޭޖިންގ ޑިރެކްޓަރ މި އިވެންޓްގައި ބައިވެރިވެ ވަޑައިގަތެވެ. މިއިވެންޓު ކުރިއަށް ގެންދިޔައީ ސޭވް ދަ ބީޗް އެންޖީއޯ އާއި ހުޅުމާލެ މަސްވެރިންގެ ޖަމްޢިއްޔާގެ އެހީތެރިކަމާއެކުއެވެ. މީގެއިތުރުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ އެހީތެރިކަންވެސް މި އިވެންޓަށް ވަނީ ލިބިފައެވެ.

އެމްޓީސީސީގެ މުވައްޒަފުންގެ ފުރިހަމަ ބައިވެރިވުމާއެކު ކުރިއަށް ގެންދެވުނު މި އިވެންޓްގައި، ގޮނޑުދޮށާއި ތިމާވެށި ސާފުކޮށް ބެލެހެއްޓުމުގެ މުހިންމުކަން ފާހަގަކުރެވުނެވެ. އެމްޓީސީސީން މި އިވެންޓް ބޭއްވީ މުޖުތަމަޢުއަށް އެހީތެރިވުމާއި، ދެމެހެއްޓެނިވި ގޮތެއްގައި ތިމާވެށި ހިމާޔަތްކުރުމުގެ މަޤްޞަދުގައެވެ.

އެމްޓީސީސީގެ ފަރާތުން އެކްސްގައި ބުނެފައިވަނީ، "އަޅުގަނޑުމެންގެ ގޮނޑުދޮށްތަކާއި ތިމާވެށި ސާފުކޮށް ބެލެހެއްޓުމަށް އަޅުގަނޑުމެން ކުރާ މަސައްކަތް ދަމަހައްޓާނަމެވެ. އެކުގައި މަސައްކަތްކޮށްގެން އަޅުގަނޑުމެންނަށް ބޮޑެތި ބަދަލުތައް ގެނެވޭނެއެވެ. ސާފު އަދި ފެހި ތިމާވެއްޓެއް ޤާއިމްކުރުމަށް އަޅުގަނޑުމެން އަބަދުވެސް މަސައްކަތްކުރާނަމެވެ."

މި އިވެންޓަކީ އެމްޓީސީސީގެ "ރައްޔިތުންގެ ކުންފުނި" ޕްރޮގްރާމްގެ ދަށުން ކުރިއަށް ގެންދެވުނު ޙަރަކާތެކެވެ.