އެމްއެންޔޫގެ ޖޮބް ފެސްޓިވަލް "އެމްއެންޔޫ ފަހި ފުރުސަތު" އަންނަ މަހު ބާއްވަނީ

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިސްނަގައިގެން "އެމްއެންޔޫ ފަހި ފުރުސަތު" ގެ ނަމުގައި ވަޒީފާގެ މައުރަޒެއް އިންތިޒާމުކުރުމުގެ މަސައްކަތް ފަށައިފިއެވެ. މި މައުރަޒު ބޭއްވުމަށް ހަމަޖެހިފައިވާކަން މަތީ ތަޢުލީމާއި، މަސައްކަތްތެރިކަމާއި، ހުނަރު ތަރައްޤީކުރުމާބެހޭ ވުޒާރާއިން ވަނީ ޢާންމުކޮށް އަންގާފައެވެ.

މި މައުރަޒު ބޭއްވުމަށް ކަނޑައަޅާފައިވަނީ  ނޮވެންބަރު މަހުގެ 14 އާއި 15 ވަނަ ދުވަހުއެވެ. "އެމްއެންޔޫ ފަހި ފުރުސަތު" އަކީ ވަޒީފާ ދޭ ފަރާތްތަކާއި ވަޒީފާ ހޯދުމަށް މަސައްކަތްކުރާ ފަރާތްތައް އެއްތަނަކަށް ގެނައުމަށް އަމާޒުކޮށްގެން ބާއްވާ ޚާއްޞަ މައުރަޒެކެވެ.

މި މައުރަޒުގައި ވަޒީފާ ދޭ ފަރާތެއްގެ ހައިސިއްޔަތުން ބައިވެރިވުމަށް ޝައުޤުވެރިވާ ފަރާތްތަކަށް ރަޖިސްޓަރީކުރުމުގެ ފުރުޞަތު ހުޅުވާލެވިފައިވެއެވެ. ރަޖިސްޓަރީކުރުމަށްޓަކައި ޚާއްޞަކުރެވިފައިވާ ގޫގަލް ފޯމެއް ފުރިހަމަކުރަންވާނެއެވެ. ވަޒީފާ ދޭ ފަރާތްތަކުން ރަޖިސްޓަރީކުރުމުގެ އެންމެ ފަހު ތާރީޚަކީ 2024 ވަނަ އަހަރުގެ ނޮވެންބަރު މަހުގެ 1 ވަނަ ދުވަހެވެ.

އެމްއެންޔޫއިން މިފަދަ މައުރަޒެއް ބޭއްވުމަކީ ޤައުމީ ފެންވަރުގައި ވަޒީފާގެ ބާޒާރު ކުރިއެރުވުމަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ. މި މައުރަޒުގައި ގިނަ އަދަދެއްގެ ވަޒީފާ ދޭ ފަރާތްތަކާއި ވަޒީފާ ހޯދަން އެދޭ ފަރާތްތައް ބައިވެރިވާނެކަމަށް ލަފާކުރެވެއެވެ.