ޚަބަރު
ތިލަފުށީ ވެމްކޯ ސައިޓުގައި އަލިފާނުގެ ހާދިސާއެއް ހިނގައިފި
ތިލަފުށީ ވެމްކޯ ސައިޓު ފޮޓޯ: އެމްއެންޑިއެފް
މިއަދު މެންދުރު ފަހު 12:04 ހާއިރު ތިލަފުށީ ވެމްކޯ ސައިޓުގައި އަލިފާނުގެ ހާދިސާއެއް ހިނގައިފިއެވެ. މި ހާދިސާ ހިނގުމާ ގުޅިގެން އެމްއެންޑީއެފް މާލެ އޭރިއާ ކޮމާންޑާއި ތިލަފުށީ ފަޔަރ ސްޓޭޝަނުން ވަނީ ވަގުތުން ހަރަކާތްތެރިވާން ފަށާފައެވެ.
މޯލްޑިވްސް ނެޝަނަލް ޑިފެންސް ފޯސްގެ އެކްސް ޕޯސްޓުން މައުލޫމާތު ދެއްވާފައިވާ ގޮތުގައި، މި ހާދިސާ ހިނގި ވަގުތު އެނގުމާއެކު ސަލާމަތީ ޚިދުމަތްތަކުން ވަނީ އަވަސް ފިޔަވަޅުތަކެއް އަޅާފައެވެ. އަދި އަލިފާން ނިއްވުމުގެ މަސައްކަތް ކުރިއަށްދާ ކަމަށް އެމްއެންޑީއެފްއިން މައުލޫމާތު ދެއްވާފައިވެއެވެ.
މި ހާދިސާގައި އެއްވެސް މީހަކަށް އަނިޔާވެފައިވޭތޯ އަދި ގެއްލުން ލިބިފައިވަނީ ކިހާ މިންވަރަކަށްތޯ މި ވަގުތު ސާފުވެފައެއް ނުވެއެވެ.
ތިލަފުށީގައި ހުންނަ ވެމްކޯ ސައިޓަކީ ވޭސްޓް މެނޭޖްމަންޓް ކޯޕަރޭޝަނުން ބަލަހައްޓަމުންދާ ކުނި މެނޭޖްކުރާ މައި މަރުކަޒެވެ. މިފަދަ ތަނެއްގައި އަލިފާނުގެ ހާދިސާއެއް ހިނގުމަކީ ތިމާވެށްޓަށާއި ވަށައިގެންވާ ސަރަހައްދުތަކަށް ނުރައްކާތެރި ކަމަކަށް ވެދާނެއެވެ.
