ރޭ ފަތިހުން ފެށިގެން މިހާތަނަށް ޣައްޒާގެ އެތަން މިތަނުން 26 މީހުން ޝަހީދުވެއްޖެ!

ރޭފަތިހުން ފެށިގެން މިއަދުގެ މިހާތަނަށް ޣައްޒާގެ އެތަން މިތަނުން 26 މީހުން ޝަހީދުވެފައިވާ ކަމަށް އަލްޖަޒީރާއިން ބުނެފިއެވެ. 

އަލްޖަޒީރާގައި ޣައްޒާގެ ޞިއްޙީ އޮފިޝަލުންނަށް ހަވާލާދީ ބުނެފައިވަނީ އެ 26 ޝަހީދުންގެ ތެރޭގައި ހަމައެކަނި ޖަބަލިއްޔާ ސަރަޙައްދުން ޝަހީދުކޮށްލައިފައިވާ 18 ޝަހީދުން ހިމެނޭކަމަށެވެ. 

އަދި ޣައްޒާގެ އުތުރުގައި އިޒްރާއިލް ސިފައިން ހިންގަމުންދާ ޢަސްކަރީ ރެއިޑްތައް އަދިވެސް ހުއްޓުމެއް ނެތި ގެންދަނީ ކުރިއަށެވެ. ޖަބަލިއްޔާ ރެފިޔުޖީ ކޭމްޕުގައި ދިރިއުޅޭ ފަލަސްޠީނުގެ ރައްޔިތުންނަށް މިހާރު އޮތީ ދެ އިޚްތިޔާރެކެވެ. 

އެއްގޮތަކީ ޖަބަލިއްޔާ އިން ނުކުމެ އެހެންތަނަކަށް ދިޔުމެވެ. ދެވަނަ ގޮތަކީ އިޒްރާއިލްގެ ސިފައިން ދެމުންދާ ނުރައްކާތެރި ހަމަލާތަކުގައި ޝަހީދުވެގެން ދިޔުމެވެ. 

އިޒްރާއިލުން އެސަރަހައްދުގައި މިހާރު ކުރިއަށް ގެންދާ ޢަސްކަރީ ރެއިޑްގެ ސަބަބުން ރައްކާތެރިކަމާއި އެކު އެސަރަޙައްދު ދޫކޮށް ދެވޭނެ ކަމުގެ ޔަޤީންކަންވެސް އެއްވެސް މީހަކަށް ނެތެވެ. އިސްރާއީލުން ޣައްޒާގެ އުތުރު ބަންދުކޮށް ހަމަލާތައް ދެމުންދާ އިރު އެތަނުގައި އެސަރަޙައްދުގައި ބޯހިޔާވަހިކަން ހޯދަމުންދާ މީހުން އަނެއްކާވެސް ވަންނާނެ ތަނެއް ނެތޭ ހިސާބަށް މިހާރު ވަނީ ގޮސްފައެވެ.  

އިޒްރާއީލް ސިފައިން ހަތިޔާރުތަކާއި އެކު އެސަރަހައްދު ވަށަލައި ބަންދުކޮށް އެސަރަޙައްދަށް ކާބޯތަކެއްޗާއި ފެން އެތެރެކުރެވޭނެ މަގު އެކީހެން ވަނީ ބަންދުކޮށްފައެވެ. 

އަދި އެ ސަރަޙައްދުގެ މުވާސަލާތީ ޚިދުމަތްތައް ކަނޑާލައިފައިވާތާ ދެ ހަފްތާއަށް ވުރެ ގިނަ ދުވަސް ވަނީ ވެފައެވެ. އިޒްރާއިލުން ބަންދުކޮށްފައިވާ ސަރަޙައްދުގައި ދެމުންދާ ހަމަލާތަކުގެ ސަބަބުން މިހާތަނަށް 500 އަށްވުރެ ގިނަ މީހުން ފާއިތުވި 17 ވަރަކަށް ދުވަސްތެރޭގައި އެކަނިވެސް ޝަހީދުވެފައިވާ ކަމަށް ވަނީ ލަފާކޮށްފައެވެ.

ޣައްޒާގެ އުތުރުގެ ސަރަޙައްދުގައި 400،000 އަށްވުރެ ގިނަ މީހުން ތާށިވެފައި ތިބި ކަމަށް އަލްޖަޒީރާގައި ވަނީ ރިޕޯޓުކޮށްފައެވެ. އެސަރަޙައްދުގައި ތާށިވެފައިތިބި މީހުން ބުނެފައިވަނީ އިޒްރާއިލުން އެސަރަހައްދުން ކާބޯތަކެއްޗާއި ފެނުގެ ސަޕްލައި އެއްކޮށް ކަނޑައިލައިފައިވާކަމަށެވެ. 

7 އޮކްޓޯބަރު 2023 ގައި އިޒްރާއިލުން ޣައްޒާއަށް ދޭން ފެށި ހަމަލާތަކުގައި މިހާތަނަށް ފަލަސްޠީނުގެ 42،603 މީހުންވަނީ ޝަހީދުވެފައެވެ. މީގެއިތުރުން 99،795 މީހަކަށް ވަނީ އެކިވަރުގެ އަނިޔާތައް ލިބި ޒަޚަމްވެފައެވެ.