ރަސްފަރި ފަރު ދިރުވުމުގެ މަޝްރޫޢުގައި އެމްޑަބްލިއުއެސްސީން އެހީތެރިކަން ފޯރުކޮށްދެނީ

ކ. އަތޮޅުގެ ރަސްފަރި ފަރު ދިރުވުމަށް ކުރިއަށްގެންދާ މަޝްރޫޢުގައި އެހީތެރިކަން ފޯރުކޮށްދިނުމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އާއި އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އާ ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން، ރަސްފަރި ފަރާއި އޭގެ މުރަކަތައް ދިރުވައި އާލާކުރުމަށް އަމާޒުކޮށްގެން އީޕީއޭއިން ކުރިއަށްގެންދާ މަޝްރޫޢުއަށް އެމްޑަބްލިއުއެސްސީން ފަންނީ އެހީތެރިކަން ފޯރުކޮށްދޭނެއެވެ. މީގެ އިތުރުން، މަޝްރޫޢުގައި ބޭނުންކުރާ އާރުވީ އުޅަނދުގައި ފެން ޕްލާންޓެއް ޤާއިމުކުރުމަށް ބޭނުންވާ އާލާތްތަކާއި، މަޝްރޫޢުގެ ދިރާސާތައް ކުރުމަށް ބޭނުންވާ އާލާތްތައްވެސް ކުންފުނިން ފޯރުކޮށްދޭނެއެވެ.

އެމްޑަބްލިއުއެސްސީން މަޢުލޫމާތު ދެއްވާފައިވާ ގޮތުގައި، ކުންފުނީގެ އިޖްތިމާޢީ ޒިންމާގެ ދަށުން މި މަޝްރޫޢުއަށް ފެނާއި ދަތުރުފަތުރުގެ ޚިދުމަތްތައްވެސް ފޯރުކޮށްދޭނެއެވެ.

ކ. އަތޮޅުގެ ތިމާވެށީގެ ގޮތުން އެންމެ މުހިންމު ސަރަޙައްދު ކަމުގައިގައިވާ ރަސްފަރި ފަރަކީ 1995 އިން ފެށިގެން ޙިމާޔަތްކޮށްފައިވާ ސަރަޙައްދެކެވެ. ނަމަވެސް، 2021 ވަނަ އަހަރުގެ އޯގަސްޓު މަހު މި ފަރަށް ބާޖެއް އެރުމުގެ ސަބަބުން ފަރުގެ 2,800 އަކަ މީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބިފައިވެއެވެ.

އެމްޑަބްލިއުއެސްސީން ވިދާޅުވީ، ތިމާވެށި ރައްކާތެރިކޮށް ދެމެހެއްޓުމަށް ކުރެވޭ މިފަދා މަސައްކަތްތަކަށް އެހީތެރިވުމަކީ ކުންފުނިން އަބަދުވެސް ކުރަމުން އަންނަ ކަމެއް ކަމުގައެވެ.