މަންމަ އަށް އަނިޔާކޮށް ވަޅިން ހަމަލާދިން މީހަކު ހައްޔަރުކޮށްފި

ހުޅުމާލެ ފޭސް 2 (އެޗް 13) ގެ އެޕާޓްމަންޓެއްގައި 57 އަހަރުގެ އަންހެނަކަށް އަނިޔާކޮށް، ވަޅިން ބިރުދެއްކުމުގެ މައްސަލައެއް އިއްޔެ ހަވީރު 18:17 ހާއިރު ދިވެހި  ރިޕޯޓުކޮށްފައިވާކަމަށް ޕޮލިސް މީޑިއާއިން ހާމަކޮށްފިއެވެ.

ރިޕޯޓުކުރުމާއި ގުޅިގެން ފުލުހުން މައްސަލަ ބެލުމަށް ޙާޟިރުވުމުން، އެ އެޕާޓްމަންޓުގެ ދޮރު ހުޅުވި އުމުރުން 57 އަހަރުގެ އަންހެނެއް ވަނީ އޭނާގެ ދަރިފުޅު، ހެންވޭރު، އެހަޑަ، މުޙައްމަދު އިސްމާޢީލް (28 އަހަރު) އޭނާއަށް އަނިޔާކޮށް، ނުރައްކާތެރި ވަޅިން  ހަމަލާދީ މަރާލާނެ ކަމުގެ އިންޒާރުދީ، އަދި ފޯނު ފޭރިގެން ގޮސްފައިވާ ކަމަށް މަޢުލޫމާތު ދީފައެވެ.

މި ހާދިސާއާ ގުޅިގެން މުޙައްމަދު އިސްމާޢީލް ވަނީ މިއަދު ކޯޓު އަމުރެއްގެ ދަށުން ހައްޔަރުކުރެވިފައެވެ. އަނިޔާ ލިބުނު އަންހެންމީހާއަށް ވަނީ ހޮސްޕިޓަލުގައި ފަރުވާ ދިނުމަށްފަހު ރޭގެ ވަގުތެއްގައި ދޫކޮށްލާފައެވެ.

މި މައްސަލައިގެ ތަޙުޤީޤު ދިވެހި ފުލުހުންގެ ޚިދުމަތުން ދަނީ ކުރިއަށް ގެންދަމުންނެވެ.