ނާޒުކު ޤައުމުތަކަށް މޫސުމާ ގުޅޭ މާލީ އެހީ އިތުރުކޮށްދިނުމަށް ނައިބު ރައީސް ގޮވާލައްވައިފި

ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް، ސަމޯއާގައި ބޭއްވުނު ކޮމަންވެލްތު ޤައުމުތަކުގެ އިސްވެރިންގެ ބައްދަލުވުމުގައި މޫސުމީ ބަދަލުތަކާބެހޭ ބައްދަލުވުމުގައި ބައިވެރިވެވަޑައިގެން ވާހަކަފުޅު ދައްކަވައިފިއެވެ. "ކްލައިމެޓް ބްރޭކްފާސްޓް، ބިލްޑިންގ ކޮންސެންސަސް ފޯ ކްލައިމެޓް ފައިނޭންސަސް ޓަރގެޓްޓް އިން ދަ ކޮމަންވެލްތް" މި ނަމުގައި ބޭއްވުނު ބައްދަލުވުމުގައި ނައިބު ރައީސް މުހިންމު ޚިޔާލުތަކެއް ހުށަހެޅުއްވިއެވެ.

މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކަށް އެކުގައި ކުރިމަތިލުމުގެ މުހިންމުކަން ފާހަގަކުރައްވަމުން، ނައިބު ރައީސް އިސްކަމެއް ދެއްވީ ޚާއްޞަކޮށް ނާޒުކު ޤައުމުތަކަށް މޫސުމާ ގުޅޭ މާލީ އެހީ އިތުރުކޮށް، ދެމެހެއްޓެނިވި ގޮތެއްގައި ފޯރުކޮށްދިނުމުގެ މުހިންމުކަމަށެވެ. އަދި މޫސުމާ ގުޅޭ މާލީ އެހީގެ އައު އަމާޒުތަކެއް ކަނޑައެޅުމަށާއި، މޫސުމީ ބަދަލުތަކުގެ ސަބަބުން ލިބޭ ގެއްލުންތަކާއި، އޭގެ އަސަރު ކުޑަކުރުމަށާއި، އެކަމަށް ތައްޔާރުވުމަށް ބޭނުންވާ މާލީ އެހީ ހަމަޖެއްސުމަށް ގޮވާލެއްވިއެވެ.

މި ބައްދަލުވުމަކީ ކޮމަންވެލްތު ޤައުމުތަކުގެ މެދުގައި މޫސުމީ ބަދަލުތަކާ ގުޅޭ މުހިންމު މަޝްވަރާތަކެއް ކުރުމަށް ލިބުނު މުހިންމު ފުރުޞަތެކެވެ. ނައިބު ރައީސްގެ މި ބައިވެރިވުމަކީ ދިވެހިރާއްޖެއިން މޫސުމީ ބަދަލުތަކާ ގުޅޭގޮތުން ގެންގުޅޭ ސިޔާސަތުތައް ބައިނަލްއަޤްވާމީ މައިދާނުގައި އިތުރަށް ހާމަކޮށް، ދިވެހިރާއްޖޭގެ އަޑު އުފުލުމަށް ލިބުނު އަގުހުރި ފުރުޞަތެކެވެ.