ރައީސުލްޖުމްހޫރިއްޔާގެ ނައިބު ސަމޯއާގެ ބޮޑުވަޒީރާ ބައްދަލުކުރައްވައިފި

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް، ސަމޯއާގެ ބޮޑުވަޒީރު އޮނަރަބްލް ފިއާމެ ނައޯމީ މަތައާފާއާ ބައްދަލުކުރައްވައިފިއެވެ. 

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު، ދިވެހި ވަފުދަށް ދެއްވާފައިވާ ހޫނު މެހެމާންދާރީއަށާއި، ކޮމަންވެލްތު ޤައުމުތަކުގެ އިސްވެރިންގެ ބައްދަލުވުމުން ކާމިޔާބު ކުރުމަށް ކުރައްވާފައިވާ ރަނގަޅު ތައްޔާރީތަކަށް ސަމޯއާގެ ބޮޑުވަޒީރަށް ޝުކުރު ދެންނެވިއެވެ. އަދި ކޮމަންވެލްތުގެ މެންބަރުންގެ ހައިސިއްޔަތުންނާއި ކުދި ޖަޒީރާ ޤައުމުތަކުގެ ހައިސިއްޔަތުން ދިމާވާ ގޮންޖެހުންތަކަށް ޙައްލު ހޯދުމަށް މަސައްކަތްކުރެވިދާނެ ދާއިރާތަކާ ބެހޭގޮތުން ދެ ލީޑަރުން މަޝްވަރާކުރެއްވިއެވެ.

މި ބައްދަލުކުރެއްވުމަކީ ދެ ޤައުމުގެ ގުޅުން އިތުރަށް ބަދަހިކޮށް، އެކުގައި މަސައްކަތްކުރުމަށް މަގުފަހިވެގެންެންދާނެ ބައްދަލުކުރެއްވުމެއް ކަމުގައި ބެލެވެއެވެ. ޚާއްޞަކޮށް ކުދި ޖަޒީރާ ޤައުމުތަކަށް ދިމާވާ މޫސުމީ ބަދަލުތަކުގެ ގޮންޖެހުންތަކާއި އިޤްތިޞާދީ ގޮންޖެހުންތަކަށް އެކުގައި މަސައްކަތްކޮށް ޙައްލު ހޯދުމަށް މި ބައްދަލުކުރެއްވުމުން މަގުފަހިވެގެންދާނެއެވެ.