ޚަބަރު
ޕީޖީ އޮފީހުގެ ކުރީގެ ނިންމުންތަކާއި މެދު ޝަކުވާ ހުށައެޅުމަށް ހުޅުވާލުމުން 500އަށް ވުރެ ގިނަ ޝަކުވާ!
ދާދިފަހުން ޕީޖީ ކަަމަށް އައްޔަނު ކުރެވުނު ޢައްބާސް ޝަރީފް.
ޕްރޮސިކިޔުޓަރ ޖެނެރަލްގެ އޮފީހުން ކުރިން ނިންމަވައިފައިވާ ނިންމުންތަކާއި މެދު ޝަކުވާ ހުށައެޅުމަށް ހުޅުވާލުމުން 500 އަށް ވުރެ ގިނަ ޝަކުވާ ހުށައަޅައިފައިވާ ކަމަށް އެއޮފީހުން ބުނެފިއެވެ.
ޕީޖީ އޮފީހުން ބުނެފައިވަނީ އެ އޮފީހުން ކޯޓަށް ހުށަހަޅައި ހިނގަމުންދާ ދަޢުވާތަކާއި، އިސްތިއުނާފުކޮށް ހިނގަމުންދާ އިސްތިއުނާފްތަކާއި، މައްސަލަތަކުގައި ހައްޔަރުކޮށްފައި އަދި ބަންދުކޮށްފައި ތިބި މީހުންގެ ބަންދާ ގުޅޭގޮތުން ޝަކުވާ ހުށަހެޅުމަށް ހުޅުވާލި ފުރުޞަތުގައި، ޖުމްލަ 539 ޝަކުވާ އެ އޮފީހަށް ލިބިފައިވާކަމަށެވެ.
އަދި ހުށަހަޅާފައިވާ ޝަކުވާތަކާއި، މުރާޖަޢާކުރުމަށް އެދި ހުށަހަޅާފައިވާ ހުށަހެޅުންތަކާ ގުޅިގެން އެ އޮފީހުން ބަލަންޖެހޭ ބެލުންތައް ބަލަމުންދާކަމަށްވެސް އެއޮފީހުން ވަނީ ބުނެފައެވެ.
އަދި ބަލަންޖެހޭ ބެލުންތައް ބަލައި މުރާޖަޢާކުރުމަށްފަހު، އެ އޮފީހުން ނިންމާ ގޮތެއް ހުށަހެޅި ފަރާތްތަކާ ޙިއްޞާކުރާނެކަމަށްވެސް ޕީޖީ އޮފީހުން ހާމަކޮށްފައިވެއެވެ.
ކުރީގެ ނިންމުންތަކަށް ޝަކުވާ ހުށައެޅުމަށް ޕީޖީ އޮފީހުން ހުޅުވާލީ މި އޮކްޓޯބަރު މަހުގެ ފުރަތަމަ ދުވަހުން ފެށިގެން 20 ދުވަހުގެ ނިޔަލަށެވެ.
