އަންނަ އަހަރަށް ލަފާކުރާ ބަޖެޓް ބުރާސްފަތިދުވަހު މަޖިލީހަށް ހުށައަޅަނީ!

އަންނަ 2025 ވަނަ އަހަރަށް ލަފާކުރާ ދައުލަތުގެ ބަޖެޓް ބުރާސްފަތިދުވަހު ރައްޔިތުންގެ މަޖިލީހަށް ހުށައެޅުމަށް ހަމަޖެހިއްޖެއެވެ. 

މިއަދު ބޭއްވި ރައްޔިތުން މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި ވާހަކަދައްކަވަމުން މަޖިލީހުގެ ނައިބުރައީސް އަހުމަދު ނާޒިމް ވިދާޅުވެފައިވަނީ އަންނަ ބުރާސްފަތި ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއަށް ކުރިއަށް އޮތް އަހަރުގެ ބަޖެޓް ހުށަހެޅުމަށް މަޖިލީހުގެ ރައީސް ޢަބްދުއްރަހީމް ޢަބްދުﷲ ނިންމަވާފައިވާ ކަމަށެވެ.

އެގޮތުން ކުރިއަށް އޮތް ދެ ދުވަހެއްގެ ތެރޭގައި ބަޖެޓް ހިސާބުތައް ލިބޭވަރުވާނޭކަމަށް މަޖިލީހުގެ ނައިބު ރައީސް އަދި ދިއްގަރު ދާއީރާގެ މެމްބަރު ނާޒިމް ވިދާޅުވިއެވެ.

އަންނަ އަހަރުގެ ބަޖެޓް ހުށަހެޅުމަށް ސަރުކާރުން ތައްޔާރުވަމުން އަންނައިރު، ސަރުކާރުން ވަނީ މިދިޔަ ބުރާސްފަތި ދުވަހު ސަޕްލިމަންޓަރީ ބަޖެޓެއް މަޖިލީހަށް ހުށަހަޅާފައެވެ. ސަރުކާރުން 5.1 ބިލިއަން ރުފިޔާގެ ސަޕްލިމަންޓަރީ ބަޖެޓެއް ހުށަހެޅިއިރު، ބަޖެޓް މިހާރު ވަނީ ކޮމިޓީއަށް ފޮނުވާފައެވެ.

ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، މިދިޔަ މަހުގެ ނިޔަލަށް ހޭދަކުރެވިފައިވަނީ، ބަޖެޓުގެ 74 އިންސައްތަކަމަށް މާލީ ވުޒާރާއިން ވަނީ ބުނެފައެވެ. 

ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ބަޖެޓަށް އާމްދަނީގެ ގޮތުގައި ލިބޭނޭކަމަށް ލަފާކުރީ 33.5 ބިލިއަން ރުފިޔާއެވެ. ޑެފިސިޓް ހުންނާނޭކަމަށް ލަފާކޮށްފައިވަނީ 16.3 ބިލިއަން ރުފިޔާގައެވެ.