ޔޫއޭއީގެ ޝާރްޖާހް އެއަރޕޯޓުން ރާއްޖެއަށް ޑައިރެކްޓް ފްލައިޓްތައް ފަށަނީ!

ޔުނައިޓެޑް ޢަރަބް އެމިރޭޓްސްގެ ޝާރްޖާހް އެއަރޕޯޓުން، އެއަރ ޢަރަބިއާގެ ޑައިރެކްޓް ފްލައިޓްތައް ރާއްޖެއަށް ފެށުމަށް ހަމަޖެހިއްޖެއެވެ.

މި ދަތުރުތައް އޮކްޓޯބަރު މަހުގެ 27 ވަނަ ދުވަހު ފަށާއިރު، އެއާބަސް އޭ 320 މަތިންދާބޯޓު ބޭނުންކޮށްގެން ޝާރްޖާހް އެއަރޕޯޓާއި ދިވެހިރާއްޖޭގެ  ވެލާނާ އިންޓަނޭޝަނަލް އެއަރޕޯޓާ ދެމެދު ކޮންމެ ދުވަހަކު ދަތުރުކުރުމަށް ހަމަޖެހިފައިވާ ކަމަށް ޚަލީޖް ޓައިމްސްގައި ވަނީ ބުނެފައެވެ. 

މިކަމާއި ގުޅިގެން ޝާރުޖާ އެއާޕޯޓް އޮތޯރިޓީ (އެސްއޭއޭ)ގެ ޗެއާމަން ޢަލީ ސަލީމް އަލް މިދުފާ ވިދާޅުވެފައިވަނީ މި ފްލައިޓް ދަތުރުތައް  ފެށުމަކީ މި ސަރަޙައްދުގެ އޭވިއޭޝަން ދާއިރާ ކުރިއެރުވުމަށް މުހިންމު ދައުރެއް ޝާރްޖާހް އެއަރޕޯޓެއް އަދާކުރާ ކަމުގެ ހެއްކެއް ކަމަށެވެ. 

މި އައު ރޫޓުގެ ސަބަބުން ޔޫއޭއީ އާއި ދިވެހިރާއްޖެއާ ދެމެދު އިޤްތިޞާދީ އަދި ފަތުރުވެރިކަމުގެ ގުޅުން ބަދަހިވެ، ދެޤައުމުގެ އިޤްތިޞާދީ އަދި ވިޔަފާރީގެ އެއްބާރުލުމަށް އާ އުސްމިންތަކެއް ހުޅުވިގެންދާނެ  ޢަލީ ސަލީމް އަލް

މިދުފާ ވިދާޅުވިއެވެ.

ޗެއާމަން ޢަލީ ސަލީމް އިތުރަށް ވިދާޅުވީ ދިވެހިރާއްޖެ އަކީ ދުނިޔޭގައި އެންމެ ގިނަ ބަޔަކު ދަތުރުކުރުމަށް ބޭނުންވާ ފަތުރުވެރިކަމުގެ އެއް މަންޒިލް ކަމުން، މި ރީތި މަންޒިލަށް ޝާރްޖާހް އެއަރޕޯޓް މެދުވެރިކޮށް ޑައިރެކްޓް ފްލައިޓްތަކުގައި ދަތުރުކުރާނެ ކަމަށް ބެލެވޭ ފަސިންޖަރުންނަށް އެންމެ ރަނގަޅު ޚިދުމަތްތައް ފޯރުކޮށްދިނުމަށް ކުރާ މަސައްކަތް އިތުރަށް ވަރުގަދަ ކުރުމަށް ބާރުއަޅުއްވާނެ ކަމަށެވެ.