ޗެޓްޖީޕީޓީއަށް ޕޭރެންޓަލް ކޮންޓްރޯލްސް ތަޢާރަފުކުރަން އޯޕަން އޭއައި އިން ނިންމައިފި

އާޓިފިޝަލް އިންޓެލިޖެންސްގެ ސަބަބުން ޒުވާނުންގެ ނަފްސާނީ ދުޅަހެޔޮކަމަށް ކުރާ އަސަރާ ގުޅޭގޮތުން އުފެދެމުންދާ ކަންބޮޑުވުންތަކާ ގުޅިގެން، ޗެޓްޖީޕީޓީއަށް ޕޭރެންޓަލް ކޮންޓްރޯލްސް ތަޢާރަފުކުރުމަށް އޯޕަން އޭއައި އިން ނިންމައިފިއެވެ.

އެ ކުންފުނިން އަންގާރަ ދުވަހު ނެރުނު ބްލޮގް ޕޯސްޓެއްގައި ބުނެފައިވާ ގޮތުގައި، ޒުވާނުންގެ ތަރައްޤީގެ މަރުހަލާތަކާ ގުޅޭގޮތުން އެކަށީގެންވާ ގައިޑްލައިންތަކެއް ކަނޑައެޅުމަށް އާއިލާތަކަށް އެހީތެރިވުމުގެ ގޮތުން މި ފީޗަރތައް ތަޢާރަފުކުރަނީއެވެ. 

މި ބަދަލުތަކާއެކު، މައިންބަފައިންނަށް އެމީހުންގެ ދަރިންގެ ޗެޓްޖީޕީޓީ އެކައުންޓްތަކާ ގުޅުވައި، މެމޮރީ އަދި ޗެޓް ހިސްޓްރީ ފަދަ ވަކި ފީޗަރތައް ނުހިންގޭގޮތަށް ހެދުމާއި، އުމުރާ އެކަށީގެންވާ މޮޑެލް ބިހޭވިއަރ ރޫލްސްތަކެއްގެ ތެރެއިން ޗެޓްބޮޓް ޖަވާބުދޭ ގޮތް ކޮންޓްރޯލް ކުރެވޭނެއެވެ.

މީގެއިތުރުން، ޒުވާނުން ނަފްސާނީގޮތުން ކަންބޮޑުވުން ހުރިކަމުގެ ނިޝާންތައް ދައްކާނަމަ، މައިންބަފައިންނަށް އެކަން އަންގާ ނޯޓިފިކޭޝަންތައް ލިބޭނެ ކަމަށް އޯޕަން އޭއައި އިން ބުނެފައިވެއެވެ. މި ފީޗަރ ތަންފީޒުކުރުމުގައި މައިންބަފައިންނާއި ދަރިންގެ މެދުގައި އޮންނަ އިތުބާރު ދެމެހެއްޓުމަށްޓަކައި ތަޖުރިބާކާރުންގެ ލަފާ ހޯދާނެ ކަމަށްވެސް އެ ކުންފުނިން ބުނެފައިވެއެވެ.

މި އިޢުލާނު މި ވަގުތު ކުރަން ޖެހުނު އެއް ސަބަބަކީ، ކެލިފޯނިއާގައި 16 އަހަރުގެ ކުއްޖަކު އަމިއްލައަށް މަރުވުމުގައި ޗެޓްޖީޕީޓީގެ ޒިންމާ އުފުލަންޖެހޭ ކަމަށް ބުނެ އެކުއްޖާގެ މައިންބަފައިން ދަޢުވާއެއް ކުރުމެވެ. މެޓް އަދި މެރިއާ ރެއިން ކުރި މި ދަޢުވާގައި ބުނެފައިވަނީ އެ ދެމަފިރިންގެ ދަރި އާދަމްސް އެންމެ ނުރައްކާތެރި އަދި އަމިއްލަ ނަފްސަށް ގެއްލުންދޭ ޚިޔާލުތައް ޗެޓްޖީޕީޓީއިން ވެލިޑޭޓްކޮށްދިން ކަމަށެވެ.

އާޓިފިޝަލް އިންޓެލިޖެންސް މޮޑެލްތައް ނަފްސާނީ ދަތިތަކާ ކުރިމަތިލާ މީހުން ތެރަޕިސްޓެއް ނުވަތަ ރަހުމަތްތެރިއެއްގެ ގޮތުގައި ބޭނުންކުރަމުންދާތީ، އެކަމާމެދު ކަންބޮޑުވުންތައް އިތުރުވަމުންދާކަން ފާހަގަކުރެވެއެވެ. މިފަދަ ކަންކަން ހުއްޓުވުމަށްޓަކައި އޯޕަން އޭއައި އިން މި ގެންނަ ބަދަލުތައް އަންނަ މަހު ތެރޭގައި ތަންފީޒުކުރަން ފަށާނެ ކަމަށް އެ ކުންފުނިން ބުނެފައިވެއެވެ.