ފާއިތުވި 24 ދުވަހު އިޒްރާއިލުން ހިޞާރުކޮށްފައި އޮތް ސަރަަހައްދުން ހާހެއްހާ މީހުން ޝަހީދުކޮށްލައިފައިވޭ!

ފާއިތުވި 24 ދުވަހު އިޒްރާއިލުން ހިޞާރުކޮށްފައި އޮތް ޣައްޒާގެ އުތުރު ސަރަހައްދުން އެއްހާހެއްހާ މީހުން ޝަހީދު ކޮށްލައިފައިވާ ކަމަށް އަލްޖަޒީރާގައި ރިޕޯޓުކޮށްފިއެވެ.

ޣައްޒާގެ ދެއިރް އަލް ބަލަހް އިން ރިޕޯޓުކުރަމުން އަލްޖަޒީރާގެ ރިޕޯޓަރު ހާނީ މަޙްމޫދު ބުނެފައިވަނީ ފާއިތުވި 24 ދުވަހާއި އަޅާ ބަލާއިރު މިއަދު ހެނދުނު ކޮޅު ޣައްޒާގެ އުތުރަށް އިޒްރާއިލުން ދެމުންދާ ހަމަލާތައް މައިތިރި ވެފައިވާ ކަމަށެވެ.

މިއީ އިޒްރާއިލުން އަނިޔާވެރިކަމާއި އެކު ދޭ ހަމަލާތައް ދިނުމުގައި ގެންގުޅޭ އުސޫލެކެވެ. ވަރުގަދަ ހަމަލާތަކެއް ދިނުމަށްފަހު ވަގުތުކޮޅަކަށް އެމީހުން ދުރަށް ޖެހިލައެވެ.

އިޒްރާއިލުން އެސަރަހައްދަށް ދެމުންދިޔަ ހަމަލާތައް މަޑުޖެހިލައިފައިވާތީ އެސަރަހައްދުގެ ރައްޔިތުން ވަނީ އެމީހުންގެ ގެތައް ހުރި ގޮތެއް ބަލައިލުމަށް ގެތައް ހުރި ތަންތަނަށް ގޮސްފައެވެ.

ޣައްޒާގެ އުތުރުގައި އިޒްރާއިލް ސިފައިން 24 ދުވަހުސް ވެފައިވާއިރު  1،000 އާ ގާތްކުރާ ޢަދަދަކަށް މީހުން އެސަރަހައްދުން ޝަހީދުވެފައިވާ ކަމަށް ޣައްޒާގެ ޞިއްޚީ އިދާރާތަކުން ވަނީ ބުނެފައެެވެ. 

 މި ހަމަލާތަކުގެ ޝިކާރައަކަށް ވި މީހުންގެ ތެރެއިން ގިނައީ އަންހެނުންނާއި ކުޑަކުދިންނެވެ.

 އަދި ވެއްޓިފައިވާ އިމާރާތްތަކުގެ ދަށުގައި ތާށިވެ ވީނުވީ އެއް ނޭނގިފައިވާ އެތައް ބަޔަކުވެސް ވާކަން ފާހަގަކޮށްލަންޖެހެއެވެ. 

7 އޮކްޓޯބަރު 2023 ގައި އިޒްރާއިލުން ޣައްޒާއަށް ދޭން ފެށި ހަމަލާތަކުގެ ސަބަބުން މިހާތަނަށް ފަލަސްޠީނުގެ 42،924 މީހަކު ޝަހީދުވެ 100،833 މީހަކު ވަނީ ޒަޚަމްވެފައެެވެ.