މާލޭގެ ކަނޑު ތޮށި ވަރުގަދަކުރުމަށް ޖަޕާނުން 10.5 މިލިއަން ޑޮލަރު ދީފި

މާލޭގެ ކަނޑު ތޮށި ވަރުގަދަކޮށް، ގުދުރަތީ ކާރިސާތަކުން ރައްކާތެރިވުމަށް ޖަޕާނުން 10.5 މިލިއަން ޑޮލަރުގެ އެހީ ހަމަޖައްސައިދިނުމުގެ އެއްބަސްވުމުގައި ސޮއިކޮށްފިއެވެ.

މާލޭގައި ކާރިސާތަކަށް ދެމެހެއްޓެނިވި ގޮތެއްގައި ތައްޔާރުވުމަށް ހިންގޭ މި މަޝްރޫއުގައި ކަނޑުތޮށި ވަރުގަދަކޮށް، ފެން ހިންދުމަށް ބޭނުންވާ އާލާތްތައް ހޯދުން ހިމެނެއެވެ.

މި އެއްބަސްވުމުގައި ސޮއިކޮށްފައި ވަނީ މާލީ ވުޒާރާގައި މިއަދު ބޭއްވި ޚާއްޞަ ރަސްމިއްޔާތެއްގައެވެ. އެ ވުޒާރާގެ ފަރާތުން މި އެއްބަސްވުމުގައި ސޮއިކުރެއްވީ ޑެޕިއުޓީ މިނިސްޓަރު ޙަސަން މިރާސްއެވެ. އަދި ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ)ގެ ފަރާތުން ސޮއިކުރެއްވީ، ޖައިކާ މޯލްޑިވްސް އޮފީހުގެ ރެސިޑެންޓް ރެޕްރެޒެންޓޭޓިވް، ޓަކި މޮޓޮއޯއެވެ.

A Grant Agreement amounting to JPY 1.56 billion (approximately USD 10.5 million) for the Construction Phase of the Malé Island Disaster Resilience Enhancement Project was signed today.

The Agreement was signed by Deputy Minister of Finance and Planning, Mr. Hassan Miras, and… pic.twitter.com/6gXVU6bq6X

— Ministry of Finance and Planning (@MoFmv) September 9, 2025

މި އެހީއާ ގުޅިގެން، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން ހާމަކޮށްފައިވާ ގޮތުގައި، މި އެއްބަސްވުމުގެ ދަށުން 1.56 ބިލިއަން ޔެން (ގާތްގަނޑަކަށް 10.5 މިލިއަން އެމެރިކާ ޑޮލަރު)ގެ ހިލޭ އެހީ ރާއްޖެއަށް ލިބޭނެއެވެ. އަދި މި އެހީގެ ދަށުން މާލޭގެ ކަނޑުތޮށި ވަރުގަދަކޮށް، ވާރޭ ފެން ހިންދުމަށް ބޭނުންވާ އާލާތްތައް ހޯދައި، އުދައާއި ބޯކޮށް ވެހޭ ވާރޭން ކުރިމަތިވާ ނުރައްކާތައް ކުޑަކުރެވޭނެ ކަމަށް ވެސް އެ ވުޒާރާއިން ހާމަކުރެއެވެ.

މީގެ އިތުރުން، އެހީގެ މި އެއްބަސްވުމަކީ މިދިޔަ ޖުލައި މަހުގެ 26ވަނަ ދުވަހު ޖަޕާނު ސަރުކާރާއި ދިވެހި ސަރުކާރާ ދެމެދު ސޮއިކުރެވުނު އެކްސްޗޭންޖް އޮފް ނޯޓްސްގެ ދަށުން ކުރެވުނު އެއްބަސްވުމެއް ކަމަށް މާލީ ވުޒާރާއިން ހާމަކޮށްފައިވެއެވެ. އަދި މި މަޝްރޫޢުގެ މަޤުސަދަކީ މާލޭގައި ކާރިސާތަކަށް ތައްޔާރުވުން ހަރުދަނާކޮށް، ދިރިއުޅުމާއި އިޤުތިޞާދީ ހަރަކާތްތަކާއި މުޖުތަމަޢުގެ ރައްކާތެރިކަން ހަރުދަނާކުރުން ކަމަށް، އެ ވުޒާރާއިން ހާމަކުރެއެވެ.