Ads by Farudhun

ޚަބަރު

ވަށަފަރުގެ ތަރައްޤީގެ މުހިންމު މަޝްރޫޢުތަކެއް ނިމި، އިތުރު ވަސީލަތްތައް ޤާއިމުކުރުމުގެ މަސައްކަތް ބާރަށް ކުރިއަށް

ވަށަފަރުގެ ތަރައްޤީގެ މުހިންމު މަޝްރޫޢުތަކެއް ނިމި، އިތުރު ވަސީލަތްތައް ޤާއިމުކުރުމުގެ މަސައްކަތް ބާރަށް ކުރިއަށް

ވަށަފަރުގެ ތަރައްޤީގެ މުހިންމު މަޝްރޫޢުތަކެއް

މުހައްމަދު ނާފިޒް

މުހައްމަދު ނާފިޒް

22 ނޮވެމްބަރު 2026، 10:15

22 ނޮވެމްބަރު 2026، 10:15

ހއ. ވަށަފަރުގެ ރައްޔިތުންނަށް ބޭނުންވާ އަސާސީ އަދި އިޖުތިމާޢީ ޚިދުމަތްތައް ފުޅާކުރުމަށްޓަކައި ސަރުކާރުން ކުރިއަށްގެންދާ މުހިންމު މަޝްރޫޢުތަކުގެ ތެރެއިން ގިނަ މަސައްކަތްތަކެއް ނިންމައި، އިތުރު މަޝްރޫޢުތަކެއްގެ މަސައްކަތް ބާރަށް ކުރިއަށްދާކަން ހާމަވެއްޖެއެވެ.

އެގޮތުން، ވަށަފަރުގެ ކުޅިވަރާއި ހަށިހެޔޮކަމުގެ ދާއިރާއިން ފާހަގަކޮށްލެވޭ ގޮތުގައި، މިނިސްޓްރީ އޮފް ސްޕޯޓްސް، ފިޓްނަސް އެންޑް ރިކްރިއޭޝަނުން އިސްނަގައިގެން އެ ރަށުގައި ޢިމާރާތްކުރާ ފިޓްނަސް އެންޑް ރިކްރިއޭޝަން ސެންޓަރުގެ ޢަމަލީ މަސައްކަތްތައް މިހާރު ދަނީ ކުރިއަށެވެ. މި މަޝްރޫޢަކީ ރާއްޖޭގެ އެކި ރަށްރަށުގައި ދުޅަހެޔޮ މުޖުތަމަޢެއް ބިނާކުރުމަށް ސަރުކާރުން ފަށާފައިވާ ސިޔާސަތުގެ ދަށުން، 2025 ވަނަ އަހަރުގެ ފަހުކޮޅުން ފެށިގެން އެކި ކުންފުނިތަކާ ޙަވާލުކޮށް ބިންގާ އަޅައިގެން ކުރިއަށްގެންދާ މަޝްރޫޢެކެވެ.

މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ، ރަށްރަށުގެ ކުޅިވަރުގެ ވަސީލަތްތައް ތަރައްޤީކުރުމުގެ ދަށުން ވަށަފަރުގައި އެޅި ޒަމާނީ އައުޓްޑޯ ވޮލީ ކޯޓުގެ މަސައްކަތް ވަނީ އެއްކޮށް ނިންމާލާފައެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްގެން 2025 ވަނަ އަހަރުގެ އޮކްޓޯބަރު މަހު ސޮއިކުރި މި މަޝްރޫޢުގެ ދަށުން، ކޮންކްރީޓް މަސައްކަތްތަކާއި، ސަރފޭސް ތައްޔާރުކުރުމާއި، ކުޅުމަށް ބޭނުންވާ މާކިންތައް އެޅުމުގެ މަސައްކަތް ނިންމައި 2026 ވަނަ އަހަރުގެ ނޮވެމްބަރު މަހުގެ ތެރޭގައި އެ މަސައްކަތް ވަނީ ރަސްމީކޮށް ނިންމާލާފައެވެ. އަދި އެމްޓީސީސީއާ ޙަވާލުކޮށްގެން އެ ރަށުގެ ފުޓްބޯޅަ ދަނޑުގެ ފަސްގަނޑު އެއްވަރުކޮށް ރީސަރފޭސް ކުރުމުގެ މަސައްކަތްވެސް މީގެކުރިން ވަނީ ކާމިޔާބުކަމާއެކު ނިންމާލާފައެވެ.

ކުޅިވަރުގެ ދާއިރާގެ އިތުރުން، ވަށަފަރުގެ ޞިއްޙީ ދާއިރާއަށްވެސް ވަނީ އިންޤިލާބީ ބޮޑު ބަދަލެއް ގެނެސްދީފައެވެ. މިނިސްޓްރީ އޮފް ހެލްތުން ޕާފެކްޓް މަލަފެހި މޯލްޑިވްސް ޕްރައިވެޓް ލިމިޓެޑާ ޙަވާލުކޮށްގެން 4.8 މިލިއަން ރުފިޔާ ޚަރަދުކޮށްގެން ހިންގި ޞިއްޙީ މަރުކަޒު އަޕްގްރޭޑް ކުރުމުގެ މަޝްރޫޢުގެ މަސައްކަތްތައް މިހާރު ވަނީ އެއްކޮށް ނިމިފައެވެ. 31 ޖުލައި 2025 ގައި ސޮއިކުރެވުނު މި މަޝްރޫޢުގެ ދަށުން، ޖެނެރަލް ވޯޑަކާއި، ޕްރައިވެޓް ރޫމެއް، ނާސިންގ ސްޓޭޝަނެއް، ޕްރޮސީޖަރ ރޫމެއްގެ އިތުރުން ޒަމާނީ މެޑިކަލް ލެބޯޓްރީއަކާއި ގަރާޖެއް އަދި ސްޓޯރޫމެއް ވަނީ ޤާއިމުކޮށްފައެވެ.

މި މަޝްރޫޢުގެ ތެރެއިން ޤާއިމުކުރެވުނު ލެބޯޓްރީގެ ޚިދުމަތް މާޗު 2026 ގައި ރަސްމީކޮށް ފެށުމާއެކު، އަސާސީ ޓެސްޓުތައް ހެދުމަށްޓަކައި އެ ރަށުގެ ރައްޔިތުންނާއި ރަށަށް ޒިޔާރަތްކުރާ ފަތުރުވެރިން ކައިރި ރަށްރަށަށާއި މާލެއަށް ކުރަންޖެހުނު ދަތުރުތަކަށް ވަނީ ދާއިމީ ހައްލެއް ލިބިފައެވެ. 2023 ވަނަ އަހަރު އިތުރުކުރެވުނު އެކްސްޓެންޝަން އިމާރާތާއެކު، މިހާރު ނިންމާލެވުނު މި މަޝްރޫޢުގެ ސަބަބުން ވަށަފަރު ސިއްޙީ މަރުކަޒަކީ އާދައިގެ އައުޓްޕޭޝަންޓް ކްލިނިކެއްގެ ފެންވަރުން އެނދުމަތިކޮށްގެން ފަރުވާދެވޭ ފެންވަރު ރަނގަޅު މަރުކަޒަކަށް ވަނީ ބަދަލުވެގެން ގޮސްފައެވެ.

މި ހުރިހާ މަޝްރޫޢުތަކާއެކު ވަށަފަރުގެ ޒުވާނުންނަށާއި ޢާންމު ރައްޔިތުންނަށް ދުޅަހެޔޮ، ފަސޭހަ އަދި އުފާވެރި މާޙައުލެއް ޤާއިމުވެގެންދާނެ ކަމަށް އެ ރަށުގެ ރައްޔިތުން ދެކެއެވެ.

Ads by MSS

Ads by MSS

މި ލިޔުން ކިޔާލުމުން

ކިޔުންތެރިންގެ ހިޔާލު
450