އޭސީ އާއި އީސީސީއަށް ރައީސުންނާއި ނައިބުރައީސުން ހޮވުމަށް ރައީސް އަށް ބާރުދިނުން އެމްޑީޕީއިން ކުށްވެރިކޮށްފި!

އިލެކްޝަންސް ކޮމިޝަނާއި އެންޓި ކޮރަޕްޝަން ކޮމިޝަނުގެ ރައީސް އަދި ނައިބުރައީސްގެ މަޤާމަށް ބޭފުޅުން އައްޔަނު ކުރުމުގެ ބާރު ރައީސުލްޖުމްހޫރިއްޔާ އަށް ދިނުން އިދިކޮޅު އެމްޑީޕީ އިން ކުށްވެރިކޮށްފިއެވެ. 

މިއަދު ރައްޔިތުންގެ މަޖިލީހުގެ ޖަލްސާގައި އީސީ އާއި އޭސީސީގެ ރައީސްއާއި ނައިބު ރައީސްގެ މަޤާމަށް ބޭފުޅުން އައްޔަނުކުރުމުގެ ބާރު ރައީސުލްޖުމްހޫރިއްޔާ އަށް ދިނުމަށް އިސްލާޙެެއް ވަނީ ހުށައަޅައިފައެވެ.

ރައްޔިތުންގެ މަޖިލީހަށް މިއަދު މި ހުށައެޅި ދެ އިސްލާޙަކީ ސަރުކާރުގެ ފަރާތުން ހުށައެޅި ދެ އިސްލާޙެކެވެ. އެގޮތުން އޭސީސީގެ ޤާނޫނަށް އިސްލާޙު ގެނައުމުގެ ބިލް ސަރުކާރުގެ ފަރާތުން ހުށަހެޅުއްވީ ފެލިދޫ ދާއިރާގެ ޕީއެންސީގެ މެންބަރު އާދަމް ޒާހިރެވެ. އީސީގެ ޤާނޫނަށް އިސްލާޙު ހުށަހެޅުއްވީ ކެލާ ދާއިރާގެ ޕީއެންސީގެ މެންބަރު ޢަބްދުﷲ ޝަރީފެވެ.

މިކަމާއި ގުޅިގެން އެމްޑީޕީ އިން ވަނީ އެކަމާއި ދެކޮޅަށް ނޫސްބަޔާނެއް ނެރެފައެވެ. 

އެމްޑީޕީގެ ނޫސްބަޔާނުގައި ބުނެފައިވަނީ އީސީ އާއި އޭސީސީ އަށް ރައީސުލްޖުމްހޫރިއްޔާގެ ބާރުގެ ދަށަށް ގެނައުމަށް އެ ކޮމިޝަންތަކުގެ ރައީސް އާއި ނައިބު ރައީސުންނަކީ ރައީސުލްޖުމްހޫރިއްޔާ އައްޔަނު ކުރާ ބައެއްގެ ގޮތުގައި ކަނޑައެޅުމަށް ޤާނޫނަށް ހުށަހަޅާފައިވާ އިސްލާޙަކީ، ޤާނޫނުއަސާސީން އެކަށައަޅާފައިވާ ފާރަވެރިވުމުގެ ނިޒާމު ފުނޑާލައި، ބާރުތައް އެއްކޮށްލުމުގެ ސިލްސިލާގެ ތެރެއަށް އިތުރުވާ ބޮޅެއް ކަމަށެވެ.

 “މިކަން މިޕާޓީއިން ކުށްވެރިކުރަން” އެމްޑީޕީ އިން ބުނެފައިވެއެވެ.

އީސީ އާއި އޭސީސީގެ އިސް ހިންގުންތެރިން އައްޔަނުކޮށް ވަކިކުރުމުގެ ބާރު ޤާނޫނުން އެ ކޮމިޝަންތަކަށް ދޫކޮށްލާފައި އޮތީ ޤާނޫނުއަސާސީގެ 167 ވަނަ މާއްދާއާއި، 199 ވަނަ މާއްދާގައި، އެ ކޮމިޝަންތަކަކީ މިނިވަން މުސްތަޤިއްލު ކޮމިޝަންތަކަކަށް ވާންޖެހޭނޭ ކަމަށް ކަނޑައަޅާފައި އޮތުމުން ކަމަށްެވެސް އެމްޑީޕީއިން ބުނެފައިވެއެވެ.

“އެ ކޮމިޝަންތަކުގެ އިދާރީ ހިންގުމުގެ ހުރިހާ ޒިންމާއެއް އުފުލާ މީހުންނަކީ ރައީސުލްޖުމްހޫރިއްޔާ ކަނޑައަޅާ ބަޔަކަށް ހެދުމަކީ ވެރިކަން ހިންގާ ބާރުގެ ސީދާ ނުފޫޒު އެކޮމިޝަންތަކުގެ މައްޗަށް ފޯރުވުމުގެ ނާތަހުޒީބު އަމަލެއް، އަދި އެއީ ޑިމޮކްރެސީގައި ދިވެހިން މިކުރާ ދަތުރުގައި، އެތައް ބައެއްގެ މިންނެތް މަސައްކަތުން އެކަށައެޅި ނިޒާމުގައި ފަހަތަށް އެޅޭ ފިޔަވަޅެއް” އެމްޑީޕީ އިން ބުނެފައިވެއެވެ.

ރާއްޖޭގައި ބާއްވާ އިންތިޚާބުތައް ބޭއްވުމުގެ ޒިންމާ މަތިކޮށްފައިވާ އީސީ އާއި ކޮރަޕްޝަންގެ އަމަލުތައް ތަޙުޤީޤު ކުރުމުގެ ޒިންމާ އޮތް އޭސީސީއަކީ ވަކި ކޮޅަކަށް ނުޖެހި މިނިވަންކަމާ އެކު މަސައްކަތް ކުރާ މުސްތަޤިއްލު ކޮމިޝަންތަކަށް ވުމަކީ އެ ކޮމިޝަންތަކުގެ އަސާސީ ސިފަކަމަށް އެމްޑީޕީ އިން ބުނެފައިވެއެވެ. 

ޤާނޫނުއަސާސީގެ 167 ވަނަ މާއްދާއާއި، 199 ގައި ކަނޑައަޅާފައި އޮތް މިނިވަންކަމާއި، މުސްތަޤިއްލުކަމުގެ ސިފަ ގެއްލުވާލައި ރައީސުލްޖުމްހޫރިއްޔާގެ މުށުތެރެއަށް ކޮމިޝަންތައް ލުމަށް މަސައްކަތް ކުރަމުން ދަނީ ރައްޔިތުންގެ ބާރު ކަނޑުވާލައި ކޮމިޝަންތަކުގެ މަސައްކަތަށް ރައީސުލްޖުމްހޫރިއްޔާގެ ނުފޫޒު ފޯރުވުމަށް ކަމަށް އެމްޑީޕީގެ ބަޔާނުގައި ތުހުމަތުކޮށްފައިވެއެވެ. 

އީސީ އާއި އޭސީސީގެ ރައީސް އާއި ނައިބު ރައީސުންނަކީ ވެސް މި ކޮމިޝަންތައް ހިންގުމުގައި އެންމެ އިސް ދައުރެއް އަދާކުރަން ޖެހޭ ބޭފުޅުން ކަމަށާއި، ކޮމިޝަނުގެ މެމްބަރުންގެ މެދުގައި ނަގާ ވޯޓަކުން އެ މަގާމުތަކަށް ބޭފުޅުން އައްޔަނު ކުރެވޭ ގޮތަށް އޮތް މާއްދާތައް ބަދަލުކުރަނީ ސަރުކާރުން މި ކޮމިޝަންތަކުގެ މިނިވަންކަމާއި މުސްތަގިއްލުކަން ނަގާލައި ސިޔާސީ ނުފޫޒު ފޯރުވުމަށް ކަމަށްެވެސް އެމްޑީޕީ އިން ބުނެފައިވެއެވެ. 

ރައްޔިތުންގެ މަޖިލީހުގައި އޮތް ސަރުކާރުގެ ސުޕަމެޖޯރިޓީ ބޭނުންކޮށްގެން ރައީސް ޑރ މުޙައްމަދު މުޢިއްޒަށް މުޅި ދައުލަތުގެ ހުރިހާ ބާރަކަށް ނުފޫޒު ފޯރުވޭ ގޮތަށް ރައީސުލްޖުމްހޫރިއްޔާގެ އޮފީހަށް ހުރިހާ ބާރެއް ޖަމާކުރުމަށް ކުރަމުންދާ މަސައްކަތްތައް ވަގުތުން ހުއްޓާލުމަށް ސަރުކާރަށް އެމްޑީޕީން ގޮވާލާ ކަމަށް އެމްޑީޕީ އިން ބުނެފައިވެއެވެ.

 ދިވެހިރާއްޖޭގެ ރައްޔިތުން، ޤާނޫނުއަސާސީގައި އެކަށައެޅި ފާރަވެރިވުމުގެ ނިޒާމު ހިމާޔަތްކޮށް އެގޮތުގައި ދެމެހެއްޓުމަށް މިޕާޓީ ކުރަންޖެހުނު ކޮންމެ މަސައްކަތެއް ކުރުމުގައި ފަސްނުޖެހޭނޭކަންވެސް ދިވެހި ސަރުކާރަށް ދަންނަވާ ކަމަށް އެމްޑީޕީ އިން ބުނެފައިވެއެވެ.