މިހާތަނަށް ފަލަސްޠީނުގެ 182 ނޫސްވެރިޔަކު އިޒްރާއިލުން ޝަހީދުކޮށްލައިފައިވޭ!

މިހާތަނަށް ފަލަސްޠީނުގެ 182 ނޫސްވެރިޔަކު އިޒްރާއިލުން ޝަހީދުކޮށްލައިފައިވާ ކަމަށް ޣައްޒާގެ މީޑިއާ އޮފީހުން ބުނެފިއެވެ. 

ޣައްޒާގެ މީޑިއާ އޮފީހުން ބުނެފައިވަނީ 7 އޮކްޓޯބަރު 2023 ހުން ފެށިގެން މިހާތަނަށް 182 ނޫސްވެރިޔަކު ޝަހީދުކޮށްލައިފައިވާ ކަމަށެވެ. ޣައްޒާގެ މީޑިއާ އޮފީހުން މިހެން ބުނެފައިވަނީ އެއޮފީހުން ނެރުނު ބަޔާނެއްގައެވެ. 

ހުކުރު ދުވަހު ނެރުނު ބަޔާނުގައި އެ އޮފީހުން ބުނެފައިވަނީ  އިޒްރާއީލުގެ އިސްތިއުމާރީން ފަލަސްޠީނުގެ ނޫސްވެރިންނަށް އަމާޒުކޮށް އެމީހުން ޝަހީދުކުރުމަށް ދޭ ހަމަލާތައް ކުށްވެރިކޮށްފައެވެ.

މި ނަފްރަތު ބޮޑު ޖަރީމާ ހިންގުމުގެ ފުރިހަމަ ޒިންމާ އުފުލާ، ބައިނަލްއަޤްވާމީ މުޖުތަމައުއަށާއި ދުނިޔޭގެ ނޫސްވެރިކަމުގައި ބައިވެރިވާ ފަރާތްތަކަށްވެސް އެބަޔާނުގައި ގޮވާލާފައިވެއެވެ. 

 އަދި އިޒްރާއިލުން ފަލަސްޠީނުގެ ނަޞްލު ނައްތާލުމަށް އިޒްރާއިލުން ކުރިއަށް ގެންދާ ހަމަލާތަކާއި ހިންގަމުންދާ ޖަރީމާތައް ހުއްޓުވައި ބައިނަލްއަޤްވާމީ ކޯޓުތަކުގައި އެކަން ބަލައި އިންސާފުހޯދުމުގެ ޝަރީޢަތްތައް ކުރިއަށް ގެންދިއުމަށްވެސް ގޮވާލައިފައިވެއެވެ.

އިޒްރާއިލުން ފަލަސްޠީނުގައި ކުރިއަށް ގެންދާ ހަމަލާތަކުގައި ނޫސްވެރިން ޝަހީދުކުރުން ހުއްޓުވުމަށް ބައިނަލްއަޤްވާމީ މުޖްތަމަޢުން ބާރުއަޅައި ޕްރެޝަރައިޒް ކުރުމަށްވެސް އެބަޔާނުގައި ގޮވައިލައިފައިވެއެވެ. 

 އިސްރާއީލުން ޣައްޒާ ގައި ދެމުންދާ  ހަމަލާތަކަކީ 30 އަހަރު ތެރޭގައި ދުނިޔޭގެ ނޫސްވެރިންނާއި މީޑިއާ މަސައްކަތްތެރިން އެންމެ ގިނައިން ޝަހީދުވި ހަމަލާތަކެވެ.