މުސާރަތައް ކުޑަކުރާއިރު ޕްރޮފެޝަނަލް މުވައްޒަފުންގެ މުސާރަ ކުޑައެއްނުކުރާނެ: ވަޒީރު ޒަމީރު

ސަރުކާރު މުވައްޒަފުންގެ މުސާރަތައް ކުޑަ ކުރާއިރު ޕްރޮފެޝަނަލް މުވައްޒަފުންގެ މުސާރަ ކުޑަނުކުރާނެ ކަަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. 

މި އަހަރުގެ ދައުލަތުގެ ބަޖެޓް ސަޕްލިމަންޓާ ގުޅޭގޮތުން މަޖިލީހުގެ މާލިއްޔަތު ކޮމިޓީގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ވަޒީރު ޒަމީރު ވިދާޅުވީ މުސާރައިން 10 ޕަސެންޓު އުނިކުރާ މުވައްޒަފުންގެ ތެރޭގައި ޕްރޮފެޝަނަލް ކެޓަގަރީގެ މުވައްޒަފުން ނުހިމެނޭނެ ކަމަށެވެ. 

އެގޮތުން ވަޒީރު ވިދާޅުވީ މިކަމުން ޕްރޮފެޝަނަލް ކެޓަގަރީތަކުގެ މުވައްޒަފުން އިސްތިސްނާވާނެ ކަމަށެވެ. އަދި އެއީ ބައެއްކަހަލަ އިންޖިނިއަރުންފަދަ ބޭފުޅުންގެ މުސާރަ ކުޑަކޮށްފިނަމަ، އެއަށްވުރެ ރަނގަޅު ފުރުސަތެއް އޮތް ނަމަ އެބޭފުޅަކު ވަޒީފާދޫކޮށް ގޮސްފާނެ ތީ ކަމަށާއި އެކަމުގެ ސަބަބުން ކުންފުނިތަކުގެ ހިންގުމަށް ދަތިތަކެއް މެދުވެރިވެދާނެ ކަމަށެވެ.

މާލީ ވަޒީރު ޒަމީރު މިގޮތަށް ވިދާޅުވެފައިވަނީ މުސާރައިން 10 ޕަސެންޓް އުނިކުރާނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު އިޢުލާނު ކުރެއްވުމާއި ގުޅިގެން ބައެއް ޕައިލެޓުންނާއި އިންޖިނިއަރުން ސޯޝަލް މީޑިޔާގައި ކަންބޮޑުވުން ފާޅު ކުރަމުން ދަނިކޮށް ކަން ފާހަގަކޮށްލަން ޖެހެއެވެ. 

ސަރުކާރުގެ އިޤްތިޞާދީ އިސްލާޙީ އެޖެންޑާގެ ދަށުން ދައުލަތް ހިންގުމުގެ ޚަރަދުތައް ކުޑަކުރުމަށް ރައީސް ޑރ މުޙައްމަދު މުޢިއްޒު ވަނީ ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސް ބޭފުޅުންނާއި މިނިވަން މުއައްސަސާތަކުގެ ވެރިންނާއި ރައްޔިތުންގެ މަޖިލީހުގެ މެމްބަރުންނާއި ސަރުކާރު ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރުމަށް ނިންމަވައިފަ އެވެ.

މުސާރައިން އުނިކުރާ މުއައްސަސާތައް:-

• ސިޔާސީ ހުރިހާ މުވައްޒަފުންގެ މުސާރައިން 10 ޕަސެންޓް އުނިކުރުން.
• ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރުން. އަދި ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000ރ. ކަމަށް ކަނޑައެޅުން.
• މިނިވަން މުއައްސަސާތަކުގެ އިސްވެރިންގެ މުސާރައިން 10 ޕަސެންޓް އުނިކުރަން ހުށަހެޅުން.
• ޝަރުއީ ދާއިރާގެ އިސްވެރިން އަދި މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރަން ހުށަހެޅުން.

އެކަމަކު މި ފިޔަވަޅުތައް އެޅުމުގައި 12،000ރ. އަށް ވުރެ ދަށުން މުސާރަ އާއި އިނާޔަތްތައް ލިބޭ މުވައްޒަފުން އިސްތިސްނާ ވާނެ އެވެ.

މި ނިންމުމާ އެކު، ރައީސް މުޢިއްޒު ވަނީ އެ މަނިކުފާނުގެ މުސާރައިން ވެސް 50 ޕަސެންޓް ނުނަންގަވަން ނިންމަވައިފަ އެވެ.