ވުޒާރާއާއި ހަވާލުވިއިރު 1.72 ބިލިއަން ރުފިޔާގެ ބިލް ނުދައްކައި ހުރި: ވަޒީރު މުއްޠަލިބް

ޢިމާރާތްކުރުމާއި ބިނާރާ ބެހޭ ވުޒާރާ އާއި ހަވާލުވެވަޑައިގެެންނެވިއިރު 1.72 ބިލިއަން ރުފިޔާގެ ބިލް ނުދައްކައި ހުރި ކަމަށް އެވުޒާރާގެ ވަޒީރު ޑރ ޢަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މުއްޠަލިބް މިހެން ވިދާޅުވީ މިއަދު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ. 
ވަޒީރު މުއްޠަލިބް ވިދާޅުވީ 1.72 ބިލިއަން ރުފިޔާގެ ބިލް ދައްކައި ޚަލާސް ނުކޮށް ހުރި ނަމަވެސް، ދިމާވި ގޮންޖެހުން ތަކާއި އެކުވެސް މިހާތަަނަށް 37 މަޝްރޫޢެއް ނިންމާފައިވާކަމަށެވެ.

ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު މުއްޠަލިބް ވިދާޅުވީ، މި ސަރުކާރުން ވަރަށް ގިނަ މަޝްރޫޢުތައް މިހާރުވެސް ކުރިއަށް އެބަގެންދާ ކަމަށެވެ. އަދި ބައެއް މަޝްރޫއުތަކުގެ މަސައްކަތް ކުރިއަށް ނުދަނީ ކުރީ ސަރުކާރުން އެ މަޝްރޫއުތަކަށް ބަޖެޓުގައި އެކަށީގެންވާ ޢަދަދަށް ފައިސާ ހިމަނާފައި ނުވާތީ ކަމަށްވެސް ވަޒީރު ވިދާޅުވިއެވެ.

ބަޖެޓުގެ ތާށިކަމާއެކު ވެސް ރައީސް ޑރ މުޙައްމަދު މުޢިއްޒުގެ އިރުޝާދުގެ ދަށުން މަޝްރޫޢުތައް ހުއްޓާނުލާ ކުރިއަށް ގެންދަވަން މަސައްކަތްކުރެއްވި ކަމަށް ވަޒީރު  މުއްޠަލިބު ވަނީ ވިދާޅުވެފައެވެ. ނަމަވެސް މި ދައުރު ފެށިގެން އައިއިރު 1.72 ބިލިއަން ރުފިޔާގެ ދަރަނި އޮތުމަކީ ދިމާވި އެންމެ ބޮޑު ގޮންޖެހުން ކަމުގައި ވަޒީރު ވިދާޅުވިއެވެ.

މަޝްރޫޢުތައް ހިންގުމަށް އެކަށީގެންވާ ފައިސާގެ ޢަދަދެއް ބަޖެޓުގައި ހިމަނާފައި ނުވުމާއި ޕެންޑިން ބިލްތަކުގެ ސަބަބުން ސޮއިކޮށްފައިވާ މަޝްރޫޢުތައް ކުރިއަށް ގެންދިޔުމަށް ދަތިވުމުގެ އިތުރަށް އައު މަޝްރޫޢުތައް ފެށުމަށް ސަރުކާރަށް ވަނީ ބޮޑެތި ހުރަސްތައް ކުރިމަތިވެފައެވެ. ނަމަވެސް ފާއިތުވީ އެއް އަހަރު ތެރޭގައި ބަޖެޓުގެ ތާށިކަމާއެކު ވެސް ވަރަށް ގިނަ މަޝްރޫއުތަކެއް ކުރިއަށް ގެންގޮސް ނިމިފައިވާ ކަމަށް މުއްޠަލިބް ވަނީ ފާހަގަކުރައްވައިފައެވެ.

އެގޮތުން ނިންމާފައިވާ މަޝްރޫޢުތަކުގެ ތެރޭގައި ހިމެނެނީ:-

•  އއ. މާޅޮހުގައި 65 މިލިޔަން ރުފިޔާގެ މަޝްރޫޢު (ބަނދަރު އަޕްގްރޭޑިން)
• އއ. ތޮއްޑޫގައި 639 މިލިޔަން ރުފިޔާގެ މަޝްރޫޢު (ބަނދަރު ރީކޮންސްޓްރަކްޝަން)
• އދ. ފެންފުށީގައި 43.3 މިލިޔަން ރުފިޔާގެ މަޝްރޫޢު (ބަނދަރު ރީކޮންސްޓްރަކްޝަން)
• މ. މުލީގައި 65.5 މިލިޔަން ރުފިޔާގެ މަޝްރޫޢު (ބަނދަރު ރީކޮންސްޓްރަކްޝަން)
• ނ. މާފަރުގެ ބިން ހިއްކުމުގެ އެއް މަޝްރޫޢު (91.4 މިލިޔަން ރުފިޔާގެ)
• ގދ. ތިނަދޫގެ މަގު ހެދުމުގެ (78.8 މިލިޔަން ރުފިޔާގެ) މަޝްރޫޢު
• ރ. އިންނަމާދޫ، ތ.ތިލަފުށި، ކ.ގުޅި ގޮނޑުދޮށް ހިމާޔަތްކުރުމުގެ 3 މަޝްރޫޢު (ޖުމްލަ 2.18 ބިލިއަން ރުފިޔާގެ)
• ފެނާއި ނަރުދަމާގެ 29 މަޝްރޫޢު

ޢިމާރާތްކުރުމާ ބިނާރާބެހޭ ވުޒާރާއިން ހާމަކުރި ގޮތުގައި ޖުމްލަ 37 މަޝްރޫޢެއްގެ މަސައްކަތް މިހާރު ނިމިފައިވާއިރު މި މަސައްކަތަށް ކޮންޓްރެކްޓުގެ އަގު 1.976 ބިލިޔަނަށް އަރައެވެ. 17 ނޮވެމްބަރު 2024 ގެ ނިޔަލަށް އިތުރު 21 މަޝްރޫޢެއްގެ މަސައްކަތް ނިންމާލެވޭނެ ކަމަށް މުއްޠަލިބު ވަނީ ވިދާޅުވެފައެވެ. އެގޮތުން ނިންމާލެވޭނެ ކަމަށް ބެލެވެނީ:

• ގޮނޑުދޮށް ހިމާޔަތްކުރުމުގެ 3 މަޝްރޫޢެއް
• ބިން ހިިއްކުމުގެ 1 މަޝްރޫޢު
• ޕޯޓުގެ 1 މަޝްރޫޢު
• ބަނދަރުގެ 4 މަޝްރޫޢު
• މަގުހެދުމުގެ 2 މަޝްރޫޢު
• އެއާޕޯޓުގެ 1 މަޝްރޫޢު
• ފެނާއި ނަރުދަމާގެ 9 މަޝްރޫޢު