އިހަވަންދޫ ގައި ގާއިމް ކުރަން ނިންމި 500 ޓަނުގެ ކޯލްޑް ސްޓޯރޭޖަށް ބޭނުންވާ ފައިސާ ވަނީ ހަމަޖެހިފައި: ވަޒީރު ޝިޔާމް

ހއ އިހަވަންދޫގައި މިސަރުކާރުން ގާއިމް ކުރަން ނިންމި 500 ޓަނުގެ ކޯލްޑް ސްޓޯރޭޖަށް ބޭނުންވާ ފައިސާ ހަމަޖެހިފައިވާ ކަމަށް މަސްވެރިކަމާ ކަނޑުގެ ދިރުންތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. 

ޝިޔާމް މިހެން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލުކުރުމަށް މެމްބަރުންނަށް އެރުވޭ ވަގުތުގެ ތެރެއިންނެވެ. 

އެވަގުތުގެ ތެރޭގައި ހޯރަފުށީ ދާއިރާގެ މެމްބަރު ޢަލީ މޫސާ ވަނީ އިހަވަންދޫގައި ގާއިމްކުރަން ނިންމައިފައިވާ 500 ޓަނުގެ ކޯލްޑް ސްޓޯރޭޖާއި ބެހޭގޮތުން ސުވާލުކުރައްވައިފައެވެެ. 

މެމްބަރު ޢަލީ މޫސާގެ ސުވާލަށް ޖަވާބު ދެއްވައިމުން ވަޒީރު ސިޔާމް ވިދާޅުވީ އައިއެސްޑީބީގެ އެހީގެ ދަށުން އިހަވަންދޫގައި ގާއިމްކުރަން ނިންމާފައިވާ 500 ޓަނުގެ ކޯލްޑް ސްޓޯރޭޖްގެ މަސައްކަތަށް ބޭނުންވާ ފައިސާ މިހާރު ހަމަޖެހިފައިވާ ކަމަށާއި، އެ ކޯލްޑް ސްޓޯރޭޖް ނިމި އޮޕަރޭޝަނަށް އައުމާއިއެކު އިހަވަންދިއްޕޮޅުގެ މަސްވެރިންނަށް މަސްކިރުމުގައި ދިމާވާ ދަތިތަކަށް ހައްލު ލިބިގެންދާނެ ކަމަށެވެ.

ހޯރަފުށީގައި ހުރި އައިސްޕްލާންޓް މައްސަލަ ޖެހިފައި ހުންނަތާ މުއްދަތެއް ފާއިތުވެފައިވާތީ އެތަން އޮޕަރޭޝަނަށް ގެނެވޭނީ ކޮން އިރަކުންތޯ ހޯރަފުށީ ދާއިރާގެ މެމްބަރު ކުރެއްވި ސުވާލަށް ޖަވާބު ދެއްވަމުން ވަޒީރު ޝިޔާމް ވިދާޅުވީ މި ސަރުކާރުން ވެރިކަމާއި ހަވާލުވީއިރު ރާއްޖޭގައި 70 އައިސްޕްލާންޓެއް ހުރި ކަމަށާއި، އޭގެތެރޭގައި މިފްކޯގެ ބެލުމުގެ ދަށުގައިވާ އައިސްޕްލާންޓް ތަކާއި ފެނަކައިގެ ބެލުމުގެ ދަށުގައިވާ އައިސްޕްލާންޓްތައް ހިމެނޭ ކަމަށެވެ.

މީގެއިތުރުން ވަޒީރު ވިދާޅުވީ  ހޯރަފުށީ އައިސްޕްލާންޓަކީ ފާއިތުވިތަނުގައި މައްސަލަ ޖެހެމުން ޖެހެމުން އައިސްފައިވާ އައިސްޕްލާންޓެއް ކަމަށާއި، ސަރުކާރުން މިފްކޯއާއި ފެލިވަރާއި ގުޅިގެން އެ އައިސްޕްލާންޓަށް ދިމާވެފައިވާ މައްސަލަ ހައްލު ކުރުމުގެ މަސައްކަތް މިހާރު ކުރަމުން އަންނަކަން ވަޒީރު ވަނީ ފާހަހަގަ ކުރައްވާފައެވެ. އަދި ވަރަށް އަވަހަށް އެތަން އޮޕަރޭޝަނަށް ގެނެވޭނެ ކަމަށްވެސް ވަޒީރު ވިދާޅުވިއެވެ.