އިނގިރޭސި ކަނޑު ހުރަސްކުރަން އުޅެނިކޮށް، 2 އަންހެނަކު މަރުވެއްޖެ

ފަރަންސޭސިވިލާތާއި އިނގިރޭސިވިލާތު ދެމެދުގައި އޮންނަ އިނގިރޭސި ކަނޑު ހުރަސްކުރަން އުޅުމުގެ ތެރޭގައި، މިއަދު ހެނދުނު ދެ އަންހެނަކު މަރުވެފައިވާކަމަށް، ފަރަންސޭސިވިލާތުގެ އިދާރީ ބޭފުޅުން ހާމަކުރައްވައިފިއެވެ. މި ޙާދިޘާ ހިނގާފައިވަނީ، ފަރަންސޭސިވިލާތުގެ އުތުރު އައްސޭރި ކައިރީގައި، ސަތޭކައެއްހައި މީހުން ބޯޓެއްގައި އިނގިރޭސިވިލާތަށް ދަތުރުކުރަން އުޅެނިކޮށް ކަމަށް އެ ބޭފުޅުން މަޢުލޫމާތު ދެއްވައެވެ. އޭގެ ތެރެއިން ފަސް ދޮޅަސް މީހުން ސަލާމަތްކޮށް، މިހާރު އެ މީހުންނަށް ޞިއްޙީ ފަރުވާ ދެމުން އަންނަ ކަމަށް ވެސް ފަރަންސޭސިވިލާތުން ހާމަކުރެއެވެ.

ފަރަންސޭސި ނޫހެއް ކަމަށްވާ "ލަ ވޮއެރ ޑު ނޮރޑް"އިން ބުނީ، މި ޙާދިޘާގައި މަރުވި ދެ އަންހެނުންނަކީ ސޮމާލިޔާއަށް ނިސްބަތްވާ ދެ އަންހެނުން ކަމަށެވެ.

ފާހަގަކޮށްލަން ޖެހޭ ގޮތުގައި، މި އަހަރު އެކަނި ވެސް، ކުދިކުދި ބޯޓުފަހަރުގައި އިނގިރޭސި ކަނޑު ހުރަސްކުރަން އުޅުނު ފަންސްވީސް މީހުން ނިޔައުވެފައިވެއެވެ. މި ގޮތުން، މި ފަދަ ހުރަސްކުރުމެއްގެ ތެރެއިން މި މަހު ކުރީކޮޅު ތިން މީހަކު މަރުވެފައިވެއެވެ. އަދި މި ކަމުގައި އިހަށް އަހަރު ފަންސާސް މީހުން މަރުވެފައިވާ ކަމަށް ފަރަންސޭސިވިލާތުގެ ކޯސްޓުގާޑުން މަޢުލޫމާތު ދެއެވެ. ނަމަވެސް، މި އަހަރުގެ މިހައިތަނަށް ތިރީސް ހާހަށް ވުރެ ގިނަ މީހުން އިނގިރޭސި ކަނޑު ހުރަސްކޮށް، ސަލާމަތްތެރިކަމާ އެކު އިނގިރޭސިވިލާތަށް ވާޞިލުވެފައިވެއެވެ.

އިނގިރޭސިވިލާތަށް ވަންނަ ކުދި ބޯޓުފަހަރުގެ މައްސަލައަކީ އެ ޤައުމުގައި ނުހަނު ބޮޑުވެފައި އޮތް މައްސަލައެކެވެ. މި ކަމަށް ޙައްލެއް ގެނައުމަށް، ފަރަންސޭސިވިލާތާ އެކު އިނގިރޭސިވިލާތުން ވަނީ އެއްބަސްވުމަކަށް އައިސްފައެވެ. އެ "ވަން އިން ވަން އައުޓް" އެއްބަސްވުމުގައި ބުނެފައިވާ ގޮތުން، ބޯޓުގައި ހުރަސްކުރުމުގެ ސަބަބުން އިނގިރޭސިވިލާތުން ފަރަންސޭސިވިލާތަށް ރައްދުކުރާ ކޮންމެ ބޮލަކަށް، ކަނޑުހުރަސް ނުކޮށް، ޤަވާޢިދާ އެއްގޮތަށް ދަތުރުކުރާ އެއް މުހާޖިރަކަށް އިނގިރޭސިވިލާތުގައި ހުރުމުގެ ފުރުޞަތު ފަހިކޮށްދޭން ޖެހެއެވެ.

އިނގިރޭސިވިލާތުގެ ބޮޑުވަޒީރު ސަރ ކެއަރ ސްޓަރމަރ މީގެ ކުރިން ވިދާޅުވީ، އިނގިރޭސި ކަނޑު ހުރަސްކޮށް އިނގިރޭސިވިލާތަށް ހިޖުރަކުރަން އުޅުމަކީ "ބަލައިގަނެވޭނޭ ކަމެއް ނޫން" ކަމަށެވެ.