ރިޔާސީ ދައުރު ފަށާ ތާރީޚު 11 ނޮވެމްބަރަށް ބަދަލުކުރަން ހުށައަޅަނީ!

ރިޔާސީ ދައުރު ފަށާ ތާރީޚު 11 ނޮވެމްބަރަށް ބަދަލުކުރަން ހުށައަޅަން ސަރުކާރުން ނިންމަވައިފިއެވެ. 

ސަރުކާރުން މިކަން ހާމަކޮށްފައިވަނީ މިއަދު ރައީސް އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި ބަންޑާރަ ނައިބު އަލްއުސްތާޒް އަޙްމަދު އުޝާމެވެ. 

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ބަންޑާރަ ނައިބު އުޝާމް ވިދާޅުވީ ރިޔާސީ ދައުރު ފެށޭ ދުވަސް ނޮވެމްބަރު 11 ވަނަ ދުވަހުގެ ގޮތުގައި ކަނޑައަޅަން ޤާނޫނުއަސާސީއަށް އިސްލާޙު ހުށައަޅުއްވާނެ ކަމަށެވެ. އަދި  އެ އިސްލާޙަކީ ރައްޔިތުންގެ ވޯޓަކަށް ދާން ޖެހޭނެ އިސްލާޙެއް ކަން ވެސް ބަންޑާރަނައިބު އުޝާމް ފާހަގަ ކުރެއްވި އެވެ.

ނޮވެމްބަރު 11 ވަނަ ދުވަސް ޖުމްހޫރީ ދުވަހުގެ ގޮތުގައި ފާހަގަކުރަމުން އަންނަނީ 1968 ގައި ފެށުނު ދެވަނަ ޖުމްހޫރިއްޔަތާ ގުޅުވައިގެންނެވެ. ކޮންމެ ފަސް އަހަރަކުން މި ދުވަހަކީ ރާއްޖޭގެ ޖުމްހޫރީ ދުވަހުގެ އިތުރުން އާ ރައީސް ހުވާ ކުރައްވައި، ރިޔާސީ ދައުރު ފެށޭ ދުވަހެވެ. އެކަމަކު 2013 ވަނަ އަހަރު ރިޔާސީ އިންތިޚާބުގެ ފުރަތަމަ ބުރު ސުޕްރީމް ކޯޓުން ބާތިލު ކުރިއެވެ. އަދި އެކަމާއި ހެދި އައި ލަސްވުމާ ގުޅިގެން، ކުރީގެ ރައީސް ޢަބްދުﷲ ޔާމީންގެ ވެރިކަން ފެށުނީ ނޮވެމްބަރު 17 ވަނަ ދުވަހު އެވެ.

އެހެންވެ އޭގެ ފަހުން ރިޔާސީ ދައުރު ފެށެނީ ނޮވެމްބަރު މަހުގެ 17 ވަނަ ދުވަހުން ފެށިގެންނެވެ.

ކުރީގެ ރައީސް އިބްރާހިމް މުޙައްމަދު ޞާލިޙް 2018 ގައި ރިޔާސީ އިންތިޚާބު ކާމިޔާބުކުރެއްވުމަށް ފަހު ނޮވެމްބަރު 11 ގައި ހުވާ ކުރައްވަން ޖެހޭނެ ކަމަށް އެއްބަޔަކު ބުނި ނަމަވެސް އެމަނިކުފާނު ނިންމެވީ ނޮވެމްބަރު 17 ގައި މަޤާމާ ހަވާލުވެވަޑައިގަތުމަށެވެ.

އެކަން ބަދަލު ކުރަން ޤާނޫނަށް އިސްލާޙު ހުށަހަޅަން އެމަނިކުފާނު ވެސް ނިންމެވި އެވެ. ނަމަވެސް އެ ބަދަލު ދައުރު ނިމުނުއިރު ވެސް ނުގެނެވޭތީ ރައީސް ޑރ މުޙައްމަދު މުޢިއްޒު ވެރިކަމުގެ ހުވާ ކުރެއްވީ ވެސް ނޮވެމްބަރު މަހުގެ 17 ވަނަ ދުވަހު އެވެ.