ޚަބަރު
އިންތިޤާލީ އިންސާފުގެ އޮފީސް އުވާލިއިރު އެ އޮފީހަށް 400 އަށްވުރެ ގިނަ މައްސަލަ ހުށައެޅިފައިއޮތް: ބަންޑާރަނައިބު
ބަންޑާރަ ނައިބު އަހްމަދު އުޝާމް. ފޮޓޯ:ރައީސް އޮފީސް
މިދިޔަ ސަރުކާރުން އުފައްދައި ހިންގި އިންތިޤާލީ އިންސާފުގެ އޮފީހަށް އެތަން އުވާލިއިރު 400 އަށްވުރެ ގިނަ މައްސަލަ ހުށައެޅިފައި އޮތް ކަމަށް ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.
ބަންޑާރަނައިބު މިފަދައިން ވިދާޅުވީ މިއަދު މެންދުރުފަހު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.
މިނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ބަންޑާރަނައިބު އުޝާމް ވިދާޅުވީ ބަންޑާރަނައިބުގެ އޮފީހުން މިހާރު ކުރަމުންދާ އެންމެ މުހިންމު އެއްމަސައްކަތަކީ އިންތިޤާލީ އިންސާފުގެ އޮފީސް އުވިގެން ދިޔައިރު އެތަނަށް ހުށައެޅި ނުނިމިވާ މައްސަލަތަކަށް ހައްލެއް ހޯދުމުގެ މަސައްކަތް ކަމަށެވެ.
ބަންޑާރަ ނައިބު އުޝާމް ވިދާޅުވީ މިސަރުކާރުން ވެރިކަމާއި ހަވާލުވީއްސުރެ އެމައްސަލަތަކަށް ހައްލެއް ހޯދުމަށް މަސައްކަތް ކުރަމުންދާކަމަށެވެ.
”ޕޮލިސީ ޑިރެކްޝަނާ އެއްގޮތަށް އެ މައްސަލަތަކަށް ހައްލެއް ހޯދާ އޮމްބަޑްސްޕާސަން އޮފީހަށް ހުށަހެޅި ޝަކުވާތަކަށް ހައްލެއް ހޯދައި ދިނުމަށް ޓަކައި އެޓާނީ އޮފީހުން ހާއްސަ މަސައްކަތްތަކެއް ކުރިޔަށް އެބަ ގެންދަން." ބަންޑާރަ ނައިބު އުޝާމް ވިދާޅުވިއެވެ.
ހުށަހެޅިފައިވާ މައްސަލަތަކުގެ ބާވަތުން އަދި ޢަދަދަށް ބަލާއިރު ހަމައެއާއެކު މި ސަރުކާރުން ވެރިކަމާއި ހަވާލުވިއިރު ނިމިފައި ހުރި ނިސްބަތަށް ބަލާއިރު ހުރިހާ މައްސަލައެއް ހައްލުކުރުމަށް އިތުރު ވަގުތު ނަގާނެ ކަމަށް ޤަބޫލުކުރައްވާ ކަމަށް ބަންޑާރަނައިބު އުޝާމް ވިދާޅުވިއެވެ.
އަދި ބައެއް މައްސަލަތަކަކީ އޭގެ ބާވަތުން ޤާނޫނީ ހައްލު ވެސް ހޯދަންޖެހޭ މައްސަލަތަކަކަށްވާތީ ވަގުތު ނަގަނީ ކަމަށް ވެސް އެމަނިކުފާނު ވިދާޅުވިއެވެ.
މި މައްސަލަތަކަކީ ވަރަށް ގިނަ ބައެއްގެ ހައްޤުތަކެއް ގެއްލިގެން ހުށަހަޅާފައިވާ ވަރަށް މައްސަލަތަކެއް ކަމަށާއި އެހެންނަމަވެސް، އިންތިޤާލީ އިންސާފުގެ އޮފީހުން ޤާނޫނާ އެއްގޮތަށް މަސައްކަތް ނުކޮށް ވަރަށް ބޮޑަށް އިހުމާލުވެފައިވާކަން އުޝާމް މީގެ ކުރިން ވެސް ވަނީ ފާހަގަކުރައްވާފައެވެ.
