އެއަރޕޯޓު ބޯޑަރުގައި ބޭނުންކުރާނެ ޞިއްޙީ ސާމާނު ޖަޕާނުން ރާއްޖެއަށް ހަދިޔާކޮށްފި!

އެއަރޕޯޓު ބޯޑަރުގައި ބޭނުންކުރާނެ ޞިއްޙީ ސާމާނު ޖަޕާނުން ރާއްޖެއަށް ހަދިޔާކޮށްފިއެވެ. 

މިތަކެތި ހަވާޅުކުރުން އޮތީ މިއަދު ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ސީޕްލޭން ޓާމިނަލްގައި ބޭއްވި ރަސްމިއްޔާތެއްގައއެވެ. މިރަސްމިއްޔާތުގައި މިތަކެތި ދިވެހި ސަރުކާރާއި ހަވާލު ކޮށްދެއްވީ ޖަޕާނުގެ ސަފީރު މިދޯރީ އެވެ. ރާއްޖެއިން އެ ތަކެއްޗާ ހަވާލުވެ ވަޑައިގަތީ ޚާރިޖީ ވަޒީރު ޑރ އަބްދުﷲ ޚަލީލާއި، އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ.

އެ ތަކެތި ހަވާލު ކުރަން ބޭއްވި ރަސްމިއްޔާތުގައި ޚާރިޖީ ވަޒީރު ވިދާޅުވީ އެ މަޝްރޫ އިން ރާއްޖެއަށް ދެމެހެއްޓެނިވި ކުރިއެރުން ގެނެސްދޭނެ ކަމަށެވެ. އެއީ 2040 ވަނަ އަހަރާ ހަމައަށް ފުރިހަމައަށް ތަރައްޤީވެފައިވާ ޤައުމަކަށް ރާއްޖެ ހެދުމަށް ކުރެވޭ މަސައްކަތުގައި މުހިންމު ފިޔަވަޅެއް ކަމަށާއި އޭގެ ސަބަބުން އާންމު ޞިއްޙަތުގެ އޮނިގަނޑުގެ ތެރެއިން އިތުބާރު އަދި ޤާބިލްކަން އުފެއްދުމުގެ މުހިންމުކަން ހާމަކޮށްދޭ ކަމަށް ވެސް ޙަލީލް ވިދާޅުވި އެވެ.

ސްޓްރެންތެނިން ކެޕޭސިޓީ އޮފް ބޯޑާ ކޮންޓްރޯލް ފޯ ރެސްޕޮންޑިން ޓު އިންފެކްޝަސް ޑިޒީޒް އިން ސައުތު ވެސްޓް އޭޝިއާ" މަޝްރޫގެ ސަބަބުން ރާއްޖޭގެ ބޯޑަރުން އެތެރެވާ ޓޫރިސްޓުންގެ ޞިއްޙި ރައްކާތެރިކަމާ އެކު ސްކްރީން ކުރުމަށް މަގުފަހިވާނެ ކަމަށް ޚާރިޖިއްޔާއިން ބުނެފައިވެއެވެ. 

އަދި އެކަކު އަނެކަކާ ދިމާވާނެ ގޮތް މަދުކުރުމާއި މަޑުކުރަންޖެހޭ ވަގުތާއި ތޮއްޖެހުން ވެސް މަދުކުރެވި، ޓޫރިޒަމް ވިޔަފާރީގެ ދަތުރުފަތުރުތަކަށް އިތުރު ކުރިއެރުމެއް ލިބިގެންދާނެ ކަމަށް ވެސް އެވުޒާރާއިން ވަނީ ބުނެފައެވެ.