ފިރިހެނަކުވިޔަސް އަންހެނަކުވިޔަސް މާތް ﷲ ރުހިވޮޑިގެންނުވާ ކަމަކުން ދީނާއި ޤައުމަށް ޙަޤީޤީ ޝަރަފެއް، އުފަލެއް އަދި ކާމިޔާބީއެއް ނުލިބޭނެ: ރައީސް މުޢިއްޒު

ރައީސް ޑޮކްޓަރ މުޙައްމަދު މުޢިއްޒު އެކްސް  މެދުވެރިކޮށް ޝާއިޢުކުރެއްވި ޕޯސްޓެއްގައި ވިދާޅުވެފައިވަނީ، ފިރިހެނަކިުވިޔަސް އަންހެނަކުވިޔަސް މާތް ﷲ ރުހިވޮޑިގެންނުވާކަންކަން، އިސްލާމީ ޝަރީޢަތާ ޚިލާފަށް ހަށިގަނޑު ހާމަކޮށްގެން ކުރެވޭ މަސައްކަތްތަކުންނާއި ބައިވެރިވެވޭ ކުޅިވަރުތަކުން އެ ފަރުދަކަށް ނުވަތަ އެ ފަރުދެއްގެ ދީނާއި ޤައުމަށް ޙަޤީޤީ ޝަރަފެއް، އުފަލެއް އަދި ކާމިޔާބީއެއް ނުލިބޭނެ ކަމަށެވެ.

ރައީސް މުޢިއްޒު މި ޕޯސްޓުގައި ވަނީ ޤުރްއާނުގެ ސޫރަތުލް އިސްރާގެ 81 ވަނަ އާޔަތް ޙަވާލާދެއްވާފައެވެ. މި އާޔަތުގެ މާނައިގައި ވަނީ "އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާޠިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާޠިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ" މިފަދައިންނެވެ.

ރައީސްގެ މި ބަސްފުޅުތަކުން އިޝާރާތްކުރައްވަނީ އިސްލާމީ އަޚްލާޤީ މިންގަނޑުތަކާ ޚިލާފަށް ކުރެވޭ ޢަމަލުތަކުން ދާއިމީ ކާމިޔާބީއެއް ނުލިބޭނެކަމަށެވެ. އަދި މިފަދަ ކަންކަމުން ވަގުތީ މަންފާއެއް ލިބުނު ކަމުގައިވިޔަސް، އެއީ ދެމިގެންދާނެ ކަމެއް ނޫންކަމަށެވެ.

މި ޕޯސްޓުގައި ރައީސް މުޢިއްޒު ވަނީ އިސްލާމީ ޢަޤީދާއާއި އަޚްލާޤަށް އިސްކަންދެއްވައި، ދިވެހި މުޖުތަމަޢުގެ އަޚްލާޤީ އަސާސްތައް ހިފެހެއްޓުމުގެ މުހިންމުކަން ފާހަގަކުރައްވާފައެވެ. 

ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ޤައުމަށް ލިބޭނެ ޙަޤީޤީ ރީތިނަމެއް، އުފަލެއް، ކާމިޔާބީއެއް ނެތް!

وَقُلْ جَاءَ الْحَقُّ وَزَهَقَ…

— Dr Mohamed Muizzu (@MMuizzu) October 30, 2024