އުތުރު ކޮރެއާއިން  ބެލިސްޓިކް މިސައިލެއް ދޫކޮށްލައިފި

އުތުރު ކޮރެއާއިން މިއަދު ހެނދުނު ބެލިސްޓިކް މިސައިލެއް (އައިސީބީއެމް) ކަމަށް ބެލެވޭ މިސައިލެއް އިރުމަތީ ކަނޑުގެ ދިމާލަށް ދޫކޮށްލައިފިކަމަށް ދެކުނު ކޮރެއާގެ ސިފައިން ބުނެފިއެވެ.

މި މިސައިލް ދޫކޮށްލީ ބުރާސްފަތި ދުވަހު ހެނދުނު 7:10 ގައި ކަމަށް ވަނީ ބުނެފައެވެ. މިސައިލް ދޫކޮށްލީ ވަރަށް ތޫނު އެންގަލްއަކުން ކަމަށްވެސް ވަނީ ފާހަގަކޮށްފައެވެ.

މި މިސައިލް ދޫކޮށްލީ ދެ ކޮރެއާގެ ގުޅުން ގޯސްވަމުންދާ ދަނޑިވަޅެއްގައެވެ. އަދި އުތުރު ކޮރެއާއިން ދެކުނު ކޮރެއާއާ ދެކޮޅަށް އިތުރަށް އަނިޔާވެރި ބަސްތައް ބޭނުންކުރަމުންދާ ވަގުތެއްގައެވެ.

ދެކުނު ކޮރެއާއިން އިއްޔެ އަންގާފައިވަނީ އުތުރު ކޮރެއާއިން މިފަދަ މިސައިލެއް ދޫކޮށްލަން ތައްޔާރުވަމުންދާ ކަމަށެވެ. އެމެރިކާގެ ރިޔާސީ އިންތިޚާބު އޮންނަ ދުވަހާ ދިމާކޮށް މިފަދަ މިސައިލެއް ދޫކޮށްލާނެ ކަމަށް ދެކުނު ކޮރެއާއިން ވަނީ އިންޒާރު ދީފައެވެ.

ޖަޕާނުން ބުނެފައިވަނީ މި މިސައިލް ދޫކޮށްލި ވަގުތު މޮނިޓަރ ކުރި ކަމަށާއި، މިސައިލް ވެއްޓުނީ ހެނދުނު 8:40 އާ ހިސާބުގައި ކަމަށް ލަފާކުރެވޭ ކަމަށެވެ.

މި މިސައިލް ދޫކޮށްލީ ދެކުނު ކޮރެއާ އާއި އެމެރިކާއިން އުތުރު ކޮރެއާއަށް ތުހުމަތު ކުރި  ފަހުންނެވެ. އެ ދެ ޤައުމުން ބުނެފައިވަނީ އުތުރު ކޮރެއާއިން ރަޝިއާއަށް ސިފައިން ފޮނުވައި، ޔުކްރެއިންގެ މައްޗަށް ޕުޓިން ކުރަމުންދާ ހަނގުރާމައަށް އެހީތެރިކަން ފޯރުކޮށްދެމުންދާ ކަމަށެވެ.

އުތުރު ކޮރެއާގެ ސިފައިން ރަޝިއާގައި ތިބިކަމަށް ތުހުމަތު ކުރެވުމާ ގުޅިގެން، ޕުޓިން އާއި އުތުރު ކޮރެއާގެ ލީޑަރު ކިމް ޖޮންގް އުންގެ ގުޅުން ބަދަހިވަމުންދާ ކަމާމެދު ކަންބޮޑުވުން އިތުރުވެފައިވެއެވެ.