އިސްލާމިކް ސޯޝަލް ފައިނޭންސް ހަރުދަނާކުރަން އެންމެން ގުޅިގެން މަސައްކަތްކުރުން މުހިންމު: ޑރ. އާމިރު

އިސްލާމިކް ސޯޝަލް ފައިނޭންސްގެ ނަތީޖާ އިތުރަށް ހަރުދަނާކޮށް، ދިގު މުއްދަތުގެ އިގުތިސާދީ އަމިއްލަ މިނިވަންކަން ކުރިއެރުވުމަށްޓަކައި އެންމެން ގުޅިގެން މަސައްކަތްކުރުމަކީ ކޮންމެހެން މުހިންމު ކަމެއް ކަމަށް މެލޭޝިއާގެ އިންސެއިފް (INCEIF) ޔުނިވަރސިޓީގެ ސެންޓަރ އޮފް އެކްސެލެންސް ފޮރ އިސްލާމިކް ސޯޝަލް ފައިނޭންސްގެ ޑިރެކްޓަރ ޕްރޮފެސަރ ޑރ. އާމިރު ޝަހަރުއްދީން ވިދާޅުވެއްޖެއެވެ. އެމަނިކުފާނު މިކަމަށް ގޮވާލެއްވީ އިންޓަނޭޝަނަލް ޒަކާތު ކޮންފަރެންސް 2026 (އިންޒެކް 2026) ގެ ދެވަނަ ސެޝަނުގައި ދެއްވި މައި ތަގުރީރުގައެވެ.

"ހުރިހައި ފަރާތްތައް ގުޅިގެން ކުރާ މަސައްކަތުގެ ހެޔޮ ނަތީޖާ: ފަޤީރުކަމާއި ނާޒުކު ޙާލަތުން އަރައިގަތުމަށް ޓަކައި ޒަކާތާއި ވަޤުފު ފަދަ އިސްލާމީ އިޖުތިމާއީ-މާލީ މުއައްސަސާތަކާއި، ދައުލަތުގެ އިޖުތިމާއީ ރައްކާތެރިކަމުގެ ނިޒާމާއި، މަދަނީ ޖަމިއްޔާތަކާއި އަމިއްލަ ފަރާތްތަކުން ގުޅިގެން މަސައްކަތް ކުރަން ޖެހޭ ސަބަބު" މި މައުޟޫއަށް ތަގުރީރު ދެއްވަމުން ޕްރޮފެސަރ ޑރ. އާމިރު ވިދާޅުވީ، އިސްލާމިކް ސޯޝަލް ފައިނޭންސްގެ އެންމެ ފުރިހަމަ ފައިދާ ހޯދުމަށް އޮތް މައިގަނޑު ގޮންޖެހުމަކީ މުއައްސަސާތަކާއި ވަސީލަތްތައް ނެތުން ނޫން ކަމަށެވެ. އެހެންނަމަވެސް، އެއީ ނާޒުކު ހާލަތްތަކުގައިވާ މުޖުތަމައުތަކަށް އެހީތެރިވުމުގައި މަސައްކަތްކުރާ ޖަމާއަތްތަކުގެ މެދުގައި ހަރުދަނާ ވިލަރެސްކުރުމެއް ނެތުން ކަމަށް އެމަނިކުފާނު ފާހަގަކުރެއްވިއެވެ.

މެލޭޝިއާގެ ދިރާސާތަކާއި މުއައްސަސާތަކުގެ ތަޖުރިބާތަކުގެ އަލީގައި އެމަނިކުފާނު ފާހަގަކުރެއްވި ގޮތުގައި، ޒަކާތުގެ އާމްދަނީ އެއްދުވަހުން އަނެއްދުވަހަށް އިތުރުވަމުން ދިޔަ ނަމަވެސް، މުއައްސަސާތައް ވަކިވަކިން މަސައްކަތްކުރުމުގެ ސަބަބުން އެހީގެ ނިޒާމު ވަނީ ވަކިވަކިވެ ބައިބައިވެފައެވެ. މީގެ ސަބަބުން ބައެއް ގޭބިސީތަކަށް އެއް އެހީއަށްވުރެ ގިނަ އެހީ ފުށުއަރާ ގޮތަށް ލިބޭއިރު، އެހީއަށް ބޭނުންޖެހިފައިވާ އެހެން ބަޔަކު ދެނެނުގަނެވި ދޫވެގެންދާކަން އެމަނިކުފާނު ފާހަގަކުރެއްވިއެވެ. މީގެއިތުރުން، ޑޭޓާ ބަލަހައްޓާ ނިޒާމުތަކާއި ރިޕޯޓުކުރުމުގެ މިންގަނޑުތަކުގައި ހުންނަ ތަފާތުތަކުގެ ސަބަބުން، ޖުމުލަ ނަތީޖާ މިންކުރުމަށާއި އާއިލާތަކަށް ދެމެހެއްޓެނިވި އިގުތިސާދީ އަމިއްލަ ފުދުންތެރިކަމެއް ލިބުނުތޯ ވަޒަންކުރުމަށް ދަތިތަކާ ކުރިމަތިވެއެވެ.

އިސްލާމިކް ސޯޝަލް ފައިނޭންސް ހަމައެކަނި ޚައިރާތުގެ އިމުން ބޭރަށް ފުޅާކުރުން

އިސްލާމިކް ސޯޝަލް ފައިނޭންސަކީ ހަމައެކަނި ޒަކާތާއި ވަޤުފަށް ހަނިވެފައިވާ އެއްޗެއް ނޫންކަން ފާހަގަކުރައްވައި ޕްރޮފެސަރ ޑރ. އާމިރު ވިދާޅުވީ، އޭގެ ތެރޭގައި ޞަދަޤާތާއި، ޤަރްޟު ޙަސަނާ، އިސްލާމިކް މައިކްރޯފައިނޭންސް، ތަކާފުލް، ސޯޝަލް ސުކޫކް އަދި އިމްޕެކްޓް އިންވެސްޓްމަންޓް ފަދަ ވަސީލަތްތައް ހިމެނޭ ކަމަށެވެ. އަދި މިފަދަ ވަސީލަތްތަކުގެ ދައުރު ކަނޑައެޅެނީ ހަމައެކަނި އެ ވަސީލަތަކަށް ކިޔާ ނަމަކުން ނޫން ކަމަށާއި، އޭގެ ފަހަތުގައިވާ އިޖުތިމާއީ މަގުސަދުން ކަމަށް ވިދާޅުވިއެވެ.

މި ތަގުރީރުގައި އެހީތެރިކަން ފޯރުކޮށްދިނުމުގެ ގުޅިފައިވާ ހަތަރު މަރުހަލާއެއް އެމަނިކުފާނު ފާހަގަކުރެއްވިއެވެ. އެއީ ކުއްލި އެހީ ފޯރުކޮށްދިނުމާއި، ދަތި ހާލަތުން އަރައިގަތުމަށް މަގުފަހިކުރުމާއި، އާމްދަނީ އުފެއްދުން އަދި ވިލުންތެރިކަން އިތުރުކުރުމެވެ. މި ދަތުރުގެ ކޮންމެ މަރުހަލާއެއް ފުރިހަމަކުރުމަކީ އެންމެ މުއައްސަސާއަކަށް އެކަނި ކުރެވޭނެ ކަމަކަށް ނުވާތީ، ވަގުތީ ބޭނުންތައް ފުއްދުމަށް ޒަކާތާއި އިޖުތިމާއީ ރައްކާތެރިކަމުގެ ނިޒާމު ހަމަޖައްސައި، އާމްދަނީ އިތުރުކުރުމަށާއި ދިރިއުޅުން އާރާސްތުކުރުމަށް އަމިއްލަ ދާއިރާއާއި އިސްލާމީ މާލީ އިދާރާތައް ގުޅިގެން ވިލަރެސްކުރެވިފައިވާ އެހީއެއް ފޯރުކޮށްދިނުމަށް އެމަނިކުފާނު ބާރުއެޅުއްވިއެވެ.

ގުޅިގެން މަސައްކަތްކުރާ މޮޑެލްތަކާއި ގައުމީ އޮނިގަނޑެއްގެ މުހިންމުކަން

ޕްރޮފެސަރ ޑރ. އާމިރުގެ ވާހަކަފުޅުގައި މެލޭޝިޔާގައި ގުޅިގެން ಹިންގާ ބައެއް ނަމޫނާ ޕްރޮގްރާމްތަކުގެ މިސާލު ވެސް ދެއްކެވިއެވެ. އޭގެ ތެރޭގައި ބޭންކް ނެގާރާ މެލޭޝިޔާގެ 'އައި-ޓެކާޑް' ޕްރޮގްރާމާއި، 'މައި-ވަޤުފް' އިސްނެގުމުގެ އިތުރުން 'ސުކޫކް އިޙްސާން' ފަދަ މަސައްކަތްތައް ހިމެނެއެވެ. އެހެންނަމަވެސް، އުފެއްދުންތެރި ގޮތެއްގައި ބާރުވެރިކުރުވުމަށް އެކަށީގެންވާ ވަރަށް އިންވެސްޓު ނުކޮށް، ހަމައެކަނި ބޭނުންކޮށް ހުސްކޮށްލާ އެހީތަކަށް މާބޮޑަށް ބަރޯސާވުމަކީ އޮތް ނުރައްކަލެއް ކަމަށާއި، އެހީ ލިބޭ ފަރާތްތަކަށް ރައުސްމާލާއި ހުނަރާއި ވިޔަފާރީގެ ފުރުސަތުތައް ފަހިވާންޖެހޭ ކަމަށް ވިދާޅުވިއެވެ.

ގުޅިގެން ކުރެވޭ މަސައްކަތްތައް ވަޒަންކުރެވޭ ނަތީޖާއަކަށް ބަދަލުކުރުމަށްޓަކައި، އެމަނިކުފާނު ވަނީ ފަސް ކަމެއް ހުށަހަޅުއްވާފައެވެ. އެއީ އެންމެން ބަލައިގަންނަ މިންގަނޑުތަކާއި، އެކަތި އަނެކައްޗާ ގުޅިގެން މަސައްކަތްކުރާ ޑޭޓާ ނިޒާމުތަކާއި، އާންމު ނަތީޖާ މިންކުރާ އުސޫލުތަކާއި، މުއައްސަސާތަކުގެ ގާބިލުކަން އިތުރުކުރުމުގެ އިތުރުން ވިލަރެސްކުރުމަށް ދާއިމީ ޕްލެޓްފޯމެއް ގާއިމުކުރުމެވެ. މީގެއިތުރުން، ހަމައެކަނި ބެހި ފައިސާގެ އަދަދު މިންކުރުމުގެ ބަދަލުގައި، އާއިލާތަކުގެ އާމްދަނީއަށް އައި ކުރިއެރުމާއި، ވަޒީފާ ލިބުމާއި އަދި އެހީއަށް ބަރޯސާވުމުން ސަލާމަތްވި މިންވަރު ފަދަ މާނަހުރި ހަގީގީ ނަތީޖާތައް ވަޒަންކުރުމަށް އެމަނިކުފާނު ބާރުއެޅުއްވިއެވެ.