ދިވެހިރާއްޖޭގެ ފުރަތަމަ ޙައްޖު، ޢުމްރާ ކޮންފަރެންސް ފަށައިފި

ދިވެހިރާއްޖޭގައި ފުރަތަމަ ފަހަރަށް ބޭއްވޭ ޙައްޖު އަދި ޢުމްރާ ކޮންފަރެންސް މިއަދު ފަށައިފިއެވެ. މި ކޮންފަރެންސް ފެށުމުގެ ރަސްމިއްޔާތު މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުނެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފެވެ.

އެއް ދުވަހުގެ މުއްދަތަށް ކުރިއަށްދާ މި ކޮންފަރެންސްގެ މަޤްޞަދަކީ ދިވެހިރާއްޖެއިން މީހުން ޙައްޖާއި ޢުމްރާއަށް ގެންދިއުމުގެ ނިޒާމު އިތުރަށް ހަރުދަނާކުރުމަށްޓަކައި މަޝްވަރާކުރުމެވެ. މިއީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނިފައިވާ ވަޢުދެއް ފުއްދުމުގެ ގޮތުން ބޭއްވޭ ކޮންފަރެންސެކެވެ.

ކޮންފަރެންސްގެ ފެށުމުގެ ރަސްމިއްޔާތުގައި، ދިވެހިރާއްޖޭގެ ޙައްޖު އަދި ޢުމްރާގެ ޚިދުމަތަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި ތިން ބޭފުޅެއްގެ އަގު ވަޒަންކޮށް ލިޔުމާއި ހަނދާނީ ފިލާ ދެވުނެވެ.

މި ކޮންފަރެންސްގެ މުހިންމު އަމާޒުތަކުގެ ތެރޭގައި ޙައްޖާއި ޢުމްރާގެ ޚިދުމަތްދޭ ކުންފުނިތަކާއި ކަމާ ގުޅޭ އެހެނިހެން ފަރާތްތައް ގުޅުވާލުމާއި، ޙައްޖާއި ޢުމްރާގެ އަޅުކަމާ ގުޅުންހުރި ޚިދުމަތްތައް ފުޅާކުރުމާއި، ޢުމްރާ ކުންފުނިތަކާއި ކަމާބެހޭ ވުޒާރާއާ އޮންނަ ގުޅުން ހަރުދަނާކުރުން ހިމެނެއެވެ. މީގެ އިތުރުން، ދީނުގައި ކަނޑައަޅުއްވާފައިވާ ގޮތަށް ޙައްޖާއި ޢުމްރާގެ އަޅުކަން އަދާކުރުމަށް ބޭނުންވާ ދީނީ މަޢުލޫމާތު ފޯރުކޮށްދީ، މިކަމާ ގުޅޭގޮތުން އާންމުން ހޭލުންތެރިކުރުވުމަކީވެސް މި ކޮންފަރެންސްގެ މުހިންމު މަޤްޞަދެކެވެ.

ކޮންފަރެންސްގެ ޕްރޮގްރާމުގައި ޙައްޖާއި ޢުމްރާއާ ގުޅޭ ޕެނަލް ޑިސްކަޝަންތަކާއި ކީނޯޓު ސްޕީކަރުންގެ ވާހަކަދެއްކެވުން ހިމެނެއެވެ. ޕެނަލް ޑިސްކަޝަންތަކުގައި ޙައްޖާއި ޢުމްރާއާ ގުޅުންހުރި އެކި މުއައްސަސާތަކުގެ ބޭފުޅުންނާއި ދީނީ ޢިލްމުވެރިން ބައިވެރިވެލައްވާ ގޮތަގޮތަށް ވަނީ ހަމަޖެހިފައެވެ.

މި ކޮންފަރެންސްއަކީ ދިވެހިރާއްޖޭގެ ޙައްޖާއި ޢުމްރާގެ ދާއިރާ ތަރައްޤީކޮށް، ޚިދުމަތުގެ ފެންވަރު މަތިކުރުމަށް މަގުފަހިކޮށްދޭނެ މުހިންމު ފިޔަވަޅެއް ކަމުގައި ބެލެވެއެވެ.