ޚަބަރު
އާސަންދަ ރިފޯމް ކުރުމުގެ ދަށުން “އައުޓް- ޕޭޝަންޓް" ގެ ޚިދުމަތްތަކަށް ބިލް ކުރުމުގައި ޕްރައިވެޓް އިންޝުއަރަންސް އަށް އިސްކަންދެނީ!
އާސަންދަ އޮފީސް. ފޮޓޯ:އާސަންދަ
ހުލާސާ
އިޖްތިމާޢީ ޞިއްޙީ އިންޝިޔުރެންސްގެ ޤައުމީ ނިޒާމް “އާސަންދަ ސްކީމް” ރިފޯމް ކުރުމުގެ ދަށުން "އައުޓް-ޕޭޝަންޓް" ގެ ޚިދުމަތްތަކަށް ބިލް ކުރުމުގައި ޕްރައިވެޓް އިންޝުއަރަންސް އަށް އިސްކަންދޭން ފަށަން ހަމަޖެހިފައިވާ ކަމަށް އެންސްޕާއިން ބުނެފިއެވެ. ިއެންސްޕާއިން ބުނެފައިވަނީ ދިވެހި ރައްޔިތުންނަށް ރަނގަޅު ފެންވަރުގެ އަސާސީ ޞިއްޙީ ޚިދުމަތް ފޯރުކޮށްދިނުމަށްޓަކައި ހިންގާ އިޖްތިމާޢީ ޞިއްޙީ އިންޝުއަރަންސްގެ ޤައުމީ ނިޒާމް "އާސަންދަ ސްކީމް" އަކީ ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތްތަކެއް ފޯރުކޮށްދެވޭ ނިޒާމަކަށް ހެދުމަށްޓަކައި މަސައްކަތްތަކެއް ދަނީ ކުރެވެމުންކަމަށެވެ.
“މި މަޤްސަދުތައް ހާސިލްކުރުމަށްޓަކައި ގެނައުމަށް ހަމަޖެހިފައިވާ ބަދަލުތަކުގެ ތެރެއިން ޞިއްޙީ ޚިދުމަތް ދޭމަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތްތަކުން ހޯދާ ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރަންސަށް އިސްކަންދިނުމަށް ވަނީ ހަމަޖެހިފައި” އެންސްޕާއިން ބުނެފައިވެއެވެ.
މިކަންކަން ކުރިއަށްދަނީ ދިވެހި ރައްޔިތުންނަށް ލުއިފަސޭހަ އަދި ދެފުށްފެންނަ ފަދަ އުސޫލަކުންކަން ކަށަވަރުކުރުމަށްޓަކައި މިފިޔަވަޅު ތަންފީޛު ކުރުމަށް ހަމަޖެހިފައިވަނީ އެކި ފިޔަވަހިތަކަށް ބަހާލައިގެން، "އައުޓް-ޕޭ ޝަންޓް" އަދި "އިން-ޕޭޝަންޓް" ގެ ޚިދުމަތްތައް ވަކިންކަމަށްވެސް އެންސްޕާއިން ބުނެފައިވެއެވެ.
މިގޮތުން 1 ނޮވެންބަރު 2024 އިން ފެށިގެން ސަރުކާރުގެ އަދި އަމިއްލަ ޞިއްޙީ ޚިދުމަތް ދޭމަރުކަޒުތަކުން "އައުޓް- ޕޭޝަންޓް" ގެ ޚިދުމަތްތައް ހޯއްދަވާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ
ފަރާތެއްނަމަ، ޕްރައިވެޓް އިންޝުއަރަންސަށް ފުރަތަމަ ބިލް ކުރާ ގޮތަށް ވަނީ ހަމަޖެހިފައި ކަމަށް އެންސްޕާއިން ބުނެއެވެ.
“ޕްރައިވެޓް އިންޝުއަރަންސް ނަގާފައިވާ ފަރާތްތަކުން އެފަރާތްތަކުގެ ޕެކޭޖްތަކުގެ ލިމިޓް ހަމަވުމުން ނުވަތަ ޕްރައިވެޓް އިންޝުއަރަންސް އިން އެ ޚިދުމަތެއް ކަވަރު ނުކުރާނަމަ، އެ ފަރާތަކަށް މިހާރެކޭވެސް އެއް ގޮތަށް އާސަންދައިން އެ ޚިދުމަތަކަށް ކަވަރޭޖް ލިބިގެންދާނެ” އެންސްޕާއިން ބުނެފައިވެއެވެ.
އާސަންދަ ސްކީމް މެދުވެރިކޮށް ޚިދުމަތް ލިބިގަތުމަށްފަހު އެކަމުގެ ރަސީދު ހޯދުމަށް އެންސްޕާގެ އިޢުލާނުގައި ހަނދުމަކޮށްދީފައިވެއެވެ. އަދި ކަނޑައެޅިފައިވާ އުސޫލާއި ޚިލާފަށް ޚިދުމަތް ދޭމަރުކަޒުތަކުން ޢަމަލުކުރާ ކަން ފާހަގަ ކުރެވިއްޖެނަމަ އެކަން އާސަންދަ ކޮމްޕެނީ ލިމިޓެޑްގެ "ޝިކާވަތި" ޗެޓްލައިން 7951400 އަށް ރިޕޯޓް ކުރެއްވުމަށް ވެސް ވަނީ ބުނެފައެވެ.
