ޞައްޚަ ނޫން ފައިސާއިން މުޢާމަލާތު ކުރި މައްސަލައެއްގައި ދެދިވެއްސަކު ހައްޔަރުކޮށްފި!

ޞައްޚަ ނޫން ފައިސާއިން މުޢާމަލާތު ކުރި މައްސަލައެއްގައި ދެދިވެއްސަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ތ. ތިމަރަފުށި / ސަލްވާ، ޢާއިޝަތު ޝިޒުނީ (25އ) އާއި ސ. ހިތަދޫ / އަތަމާވިލާ، މަޢުޒޫ މުޙައްމަދު (29އ) އަހަރުކަމަށް ދިވެހި ފުލުހުންގެ ޚިދުމަތުން ބުނެފައިވެއެވެ.
 
ފުލުހުންނަށް ހުށަހެޅުނު މައްސަލައަކާ ގުޅިގެން 2024 އޮކްޓޫބަރު 29 ވަނަ ދުވަހު ހިންގި އޮޕަރޭޝަނެއްގައި މި ދެމީހުން ހައްޔަރުކޮށް ބަލައިފާސްކުރިއިރު 500 ރުފިޔާގެ ޞައްޚަ ނޫން 24 ނޫޓު ފެނިފައިވާކަމަށްވެސް ފުލުހުން ބުނެއެވެ.
 
މި މައްސަލައާ ގުޅިގެން މި ދެމީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް އަމުރުކޮށްފައިވާކަމަށްވެސް ފުލުހުން ބުނެފައިވެއެވެ.
 
މި މައްސަލަ ފުލުހުން ގެންދަނީ އިތިުރަށް ތަޙުޤީޤުކުރަމުންނެވެ.
 
ފަހަކަށްއައިސް އާދައިގެ ކަރުދާހަށް ޕްރިންޓުކޮށްފައި ހުންނަ 500 ރުފިޔާގެ ޞައްޚަ ނޫން ނޫޓު ދައުރުވަމުންދާކަން ދިވެހި ފުލުހުންގެ ޚިދުމަތަށް ވަނީ ފާހަގަކުރެވިފައި ކަމަށް އެޚިދުމަތުން ބުނެއެވެ. 

އެހެންކަމުން، ވިޔަފާރީގެ މުޢާމަލާތްތަކާއި ފައިސާގެ މުޢާމަލާތްތައް ކުރުމުގައި ވެސް، ދިވެހި ރުފިޔާގެ ތަފާތު ނޫޓުތަކުގައި ހުންނަ ސެކިއުރިޓީ ފީޗާސްތައް ހުރިތޯ ބެލުމަށާއި ފައިސާ ޕްރިންޓުކޮށްފައިވާ ކަރުދާހުގެ ކޮލިޓީ ބެލުންފަދަ ކަންކަމަށް ސަމާލުވުމަށް ދަންނަވާކަމަށް ފުލުހުން ބުނެއެވެ. އަދި މިފަދަ މައްސަލައެއް ދިމާވެއްޖެނަމަ ލަސްނުކޮށް ފުލުހުންނަށް ރިޕޯޓުކުރުމަށް ދަންނަވާކަމަށްވެސް ފުލުހުން ބުނެއެވެ. 

·