2025 އަށް ލަފާކުރާ ބަޖެޓް: އަންނަ އަހަރު ސިވިލް ސާވެންޓުންގެ މުސާރަ ބޮޑުކުރަނީ!

2025 ވަނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައެޅި ބަޖެޓުގައި ސިވިލް ސާވެންޓުންގެ މުސާރަ ބޮޑުކުރުމަށް ހުށައަޅައިފިއެވެ. 

އަންނަ 2025 ވަނަ އަހަރަށް ލަފާކުރާ ދައުލަތުގެ ބަޖެޓް މަޖިލީހުގައި މިއަދު ހުށަހަޅައި ދެއްވަމުން މާލީ ވަޒީރު މޫސާ ޒަމީރު ވިދާޅުވީ ކުރިއަށް އޮތް އަހަރުގެ ބަޖެޓުގައި ސިވިލް ސާވިސް މުވައްޒަފުންގެ ތެރެއިން މިހާތަނަށް ޕޭ ހާމަނައިޒްކޮށްފައިނުވާ ހުރިހާ މުވައްޒަފުންނާއި ޖުޑީޝަރީގެ މުވައްޒަފުންގެ މުސާރަތަކަށް ބަދަލުގެނެސް ހާމަނައިޒްކުރަން 500 މިލިއަން ރުފިޔާ ހިމަނާފައި ވާނެ ކަމަށެވެ.

އަދި އެނޫން އެހެން ހުރިހާ މުވައްޒަފުންގެ މުސާރަތަކަށް 2026 ވަނަ އަހަރު ބަދަލުގެނައުމަށް ރާވާފައިވާކަމަށް މާލީ ވަޒީރު ފާހަގަކުރައްވައިފައިވެއެވެ. 

ސަރުކާރުން ސިވިލް ސާވިސް މުވައްޒަފުންގެ މުސާރަތައް ބޮޑުކުރާނެ ކަމުގެ ވަޢުދުވަނީ ވެފައެވެ. އެވަޢުދުގެ ދަށުން ދައުލަތުގެ މުވައްޒަފުންގެ ތެރެއިން ޓީޗަރުންނާއި، ޞިއްޙީ ދާއިރާގެ އިތުރުން ސަލާމަތީ ޚިދުމަތްދޭ މުއައްސަސާތަކުގެ މުއައްޒަފުންގެ މުސާރަތައް ވަނީ ބޮޑުކޮށްފައިކަން ފާހަގަކޮށްލަން ޖެހެއެވެ. 

ސަރުކާރުން އަންނަ އަހަރަށް ލަފާކޮށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މިއީ މިއަހަރަށް ހުށަހެޅި ބަޖެޓަށްވުރެ، 6.8 ބިލިއަން ރުފިޔާގެ އިތުރުވުމެކެވެ. ރައްޔިތުންގެ މަޖިލީހުން މިއަހަރު ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.

އަންނަ އަހަރުގެ ބަޖެޓްގެ ޖުމްލަ ހަރަދުގެ ގޮތުގައި ހިނގާނޭކަމަށް ލަފާކޮށްފައިވަނީ، 49.2 ބިލިއަން ރުފިޔާއެވެ.

އޭގެ ތެރޭގައި ރިކަރަންޓް ހަރަދުގެ ގޮތުގައި 35.8 ބިލިއަން ރުފިޔާ ހަރަދުވާނޭކަމަށް ލަފާކޮށްފައިވާއިރު، ކެޕިޓަލް ހަރަދުގެ ގޮތުގައި ބަޖެޓްގައި ޖަހާފައިވަނީ 13.4 ބިލިއަން ރުފިިޔާއެވެ. އަދި ޕީއެސްޕީއައި މަޝްރޫޢުތަކަށް ކަނޑައަޅާފައިވަނީ 12.4 ބިލިއަން ރުފިޔާއެވެ.