2025 އަށް ލަފާ ކުރާ ބަޖެޓް: ޚަރަދުކުޑަކުރުމަށް އަޅާ ފިޔަވަޅުތަކުގެ ސަބަބުން 6.6 ބިލިއަން ސަލާމަތްކުރެވިގެންދާނެ!

ޚަރަދު ކުޑަކުރުމަށް އަޅަން ނިންމައިފައިވާ ފިޔަވަޅުތަކުގެ ސަބަބުން 6.6 ބިލިއަން ރުފިޔާ ސަލާމަތްކުރެވޭނެ ކަަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. 

މާލީ ވަޒީރު ޒަމީރު މިހެން ވިދާޅުވީ 2025 ވަނަ އަހަރަށް ލަފާކުރާ ބަޖެޓް ހުށައަޅުއްވަމުން ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުންނެވެ.

މިއަދުގެ ޖަލްސާގައި 2025 ވަަނަ އަހަރަށް ލަފާކުރާ 56.6 ބިލިއަން ރުފިޔާގެ ބަޖެޓް މަޖިލީހަށް ހުށަހަޅުއްވައިފައިވާއިރު އެ ބަޖެޓްގައި ވަނީ ޚަރަދު ކުޑަކުރަން ގިނަ ފިޔަވަޅުތަކެއް އެޅުމަށް ވަނީ ހިމަނާފައެވެ.

ޚަރަދު ކުޑަކުރަން އަޅާނެ ކަމަށް ބަޖެޓުގައި ބުނެފައިވާ ފިޔަވަޅުތަކަކީ:

1-ސަބްސިޑީގެ އެހީ ބޭނުންވާ ފަރާތްތަކަށް ސީދާ ގޮތެއްގައި ސަބްސިޑީ ފޯރުކޮށްދޭ ނިޒާމަށް ބަދަލުކުރުން

2-އާސަންދަ ނިޒާމް މުރާޖަޢާކޮށް މިހާރަށް ވުރެ ވަށާ ޖެހޭ ފުރިހަމަ އަދި ދެމެހެއްޓެނިވި ނިޒާމަކަށް ބަދަލުކުރުން

3-ތެލުގެ އަގު ބޮޑުވުމުން މާލިއްޔަތަށް ކުރިމަތިވާ ގޮންޖެހުންތައް ކުޑަކުރަން ފިޔަވަޅުތަކެއް އެޅުން

4-ދައުލަތުން ފޯރުކޮށްދޭ ޕެންޝަންތައް ތަކުރާރު، އިސްރާފު ނުވާނެހެން މުރާޖައާކުރުން

5-ސަރުކާރު ކުންފުނިތައް ނުވަތަ އެސްއޯއީތައް އިސްލާޙުކުރުން

ޚަރަދު ކުޑަ ކުރުމަށް އަޅަން ނިންމާފައިވާ ފިޔަވަޅުތަކުގެ އިތުރުން އާމްދަނީ އިތުރު ކުރުމަށްވެސް ގިނަ ކަންކަން ބަޖެޓްގައި ހިމަނާފައިވެއެވެ. އަދި މި ފިޔަވަޅުތަކުގެ ސަބަބުން 4.9 ބިލިއަން ރުފިޔާ އަންނަ އަހަރު ދައުލަތަށް ލިބޭނޭ ކަމަށް ބަޖެޓުގައި ވަނީ ލަފާކޮށްފައިކަން ފާހަގަކޮށްލަން ޖެހެއެވެ.

އެގޮތުން، އާމްދަނީ އިތުރުކުރަން ހުށަހަޅާ ކަންކަމަކީ:

1. ސިނގިރޭޓާއި ބިޑިން ނަގާ އިމްޕޯޓް ޑިއުޓީ ބޮޑުކުރުން

2. އެއާޕޯޓް ޓެކުހާއި ފީތައް ދެގުނަ ބޮޑުކުރުން

3. ގްރީން ޓެކުހުގެ ރޭޓްތައް ބޮޑުކުރުން

4. އަމިއްލަ ފަރާތްތަކުން ހިންގާ ބިން ހިއްކުމުގެ މަޝްރޫއުތަކަށް ނަގާ ވެއްޔަށް ޑްރެޖިން ފީއެއް ނެގުން

5. ޓީޖީއެސްޓީ ރޭޓް މަތިކުރުން

6. ޓީޖީއެސްޓީ ޑެސްޓިނޭޝަން ބޭސްޓް ޓެކްސްއަކަށް ބަދަލުކުރުން

7. ފްރީކުއަންސީ ސްޕެކްޓްރަމް ޗާޖެއް ނެގުން

މި ފިޔަވަޅުތަކުގެ ތެރެއިން ބައެއް ފިޔަވަޅުތައް ތަންފީޒު ކުރަން ޤާނޫނުތަކަށް ގެންނަން ޖެހޭ ބަދަލުތައް މަޖިލީހަށް ހުށަހަޅާ މިހާރު ވަނީ ނިމުމަކާ ހަމައިގަ އެވެ. އަދި ބައެއް ޤާނޫނުތައް ވަނީ ފާސްވެފައިކަން ވެސް ފާހަގަ ކޮށްލަން ޖެހެއެވެ.

އެގޮތުން ދުންފަތުގެ ބާވަތްތަކުން ނަގާ ޓެކްސް ބޮޑުކުރުމާއި، ގްރީން ޓެކްސް އަދި އެއަރޕޯޓު ޓެކްސް ބޮޑުކުރުމަށް ހުށައެޅި ހުށައެޅުންތައް މިހާރުވަނީ ފާސްކޮށްފައެވެ.