ރާއްޖެއަށް ޑިޖިޓަލް ކަރަންސީ ތަޢާރަފްކުރަނީ!

ރާއްޖެއަށް ޑިޖިޓަލް ކަރަންސީ ތަޢާރަފްކުރުމަށް ބޭނުންވާ ތައްޔާރީތައް ކުރަމުންދާ ކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ. 

ރައީސް ޑރ މުޢިއްޒު މިހެން ވިދާޅުވީ 2024 ވަނަ އަހަރުގެ ޤައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތުގައި ދަސްވެނިންނާއި މުޚާޠަބު ކުރައްވައި ދެއްކެވި ވާހަކަފުޅުގައެވެ. 

އަޅުގަނޑުމެންގެ އިޤްތިޞާދުގައި، ޑިޖިޓަލް އިކޮނޮމީ ފުޅާކުރުމަށްޓަކައި، އަޅުގަނޑު ޔޫ.އެން.ގައި ވާހަކަ ދެއްކިއިރު، ވާނެ އިޢުލާނު ކޮށްފައި، އޮންނާނެ، އަޅުގަނޑުމެންގެ އިޤްތިޞާދުގެ 15 ޕަސެންޓަކީ، ޖީ.ޑީ.ޕީ.ގެ 15 ޕަސެންޓް، ޑިޖިޓަލް އިކޮނޮމީން ކޮންޓްރިބިއުޓް ކޮށްދޭ އިކޮނޮމީއަކަށް ހަދަން ބޭނުންވާކަމަށް 2030އާ ހަމައަށް ދާންވާއިރަށް

ރައީސް މުޢިއްޒު ވިދާޅުވިއެވެ.

ރައީސް މުޢިއްޒު ވިދާޅުވީ އެމް.އެމް.އޭ. ގަވަރުނަރަށް ޑިޖިޓަލް ކަރެންސީ ރާއްޖެއަށް ތަޢާރުފު ކުރުމަށް މިހާރު ދަންނަވައިފައި ވާނެކަމަށެވެ. އަދި ކްރިޕްޓޯ ކަރެންސީ ރާއްޖެއަށް ތަޢާރުފުކުރުމަށްޓަކައި، މަސައްކަތްތައް ފަށަން އެމަނިފާނު ދަންނަވައިފައި ވާނެ ކަމަށާއި، އެ މަސައްކަތާ ގުޅޭ ޢަމަލީ މަސައްކަތްތަކުގައި، މިހާރު އެމް.އެމް.އޭ.ގެ ގަވަރުނަރު މަސައްކަތް ފަށްޓަވައިފައި ވާކަމަށްވެސް ރައީސް މުޢިއްޒު ވިދާޅުވިއެވެ.

ކްރިޕްޓޯ ކަރެންސީ، ޑިޖިޓަލް ކަރެންސީ ރާއްޖެއަށް ގެނައުމުގައި އޭގެ ޤާނޫނީ ހުރިހާ ކަންތައްތަކަކަށްވެސް ފަރުވާ ލިބޭގޮތަށް ޚާއްޞަ ޤާނޫނު ހެއްދެވުމަށާއި، އަދިވެސް ދެން ހުންނަ އިންޓަރނޭޝަނަލް ބެސްޓް ޕްރެކްޓިސްގެ މިންގަނޑުތަކާ އެއްގޮތަށް، ރާއްޖޭގައި ޑިޖިޓަލް ކަރެންސީ ފުޅާކުރުމަށް ގަވަރުނަރަށް ދަންނަވައިފައިވާނެ.

މިހިރަ ކަންކަމަކީ، ކިޔަވައިގެން ނުކުންނަ ކުދިން، ޒުވާނުން، އެކިއެކި ފަންނުވެރިން ރާއްޖޭގެ އިޤްތިޞާދުގައި ޙަރަކާތްތެރިވުމުގައި ހުރި ފުރުޞަތުތައް، އިރާދަކުރެއްވިއްޔާ، ކުރިޔަށް އޮތްތާނގައި، ޑިޖިޓަލައިޒޭޝަންގެ ތެރެއިން، އާރޓިފިޝަލް އިންޓެލިޖަންސްގެ ތެރެއިން، އަޅުގަނޑުމެންގެ ޤައުމު ވެގެންދާނީ، ދުނިޔޭގެ މައިދާނުގައި އަދި އަމުދުން މިކަހަލަ ކުޑަ ޤައުމަކަށް ބަލާއިރު، އެންމެ ކުރީ ސަފުގައި ވަރަށް ބޮޑަށް ލީޑްކުރާ ޤައުމަކަށް

ރައީސް ޑރ މުޢިއްޒު ވިދާޅުވިއެވެ.

ރައީސް ވިދާޅުވީ އެއީ ކުރިމަގަށް ކުރާ އުންމީދު ކަމަށާއި، މުހިންމީ ނަތީޖާ ކަމަށެވެ. އަދި މިއަދާ ހަމައަށްވެސް އައީ ނަތީޖާ ހާސިލުކުރުމުގައި، ކުރަންޖެހުނު ކޮންމެ ކަމެއް ކުރުމުގެ ޢަޒުމުގައިކަމަށެވެ.  އަދި ކުރިޔަށް އޮތްތާނގައިވެސް ހަމަ އެންމެންގެ އެހީތެރިކަމާއެކީގައި އެގޮތުގައި ކުރިއަށް ދާނެ ކަމަށާއި، ދަސްވެނީންގެ ކިބައިން އެދެނީ، އެކަމުގައި ބައިވެރިވާން ކަމަށް ރައީސް މުއިއްޒު ވިދާޅުވިއެވެ. އަދި އެކަމުގައި ޤައުމީ ވިސްނުމެއްގައި ބައިވެރިވެ، ސިކުނޑީގެ ބޭނުންކޮށް، އަމިއްލަ ވިސްނުމުން ވިސްނަން ރައީސް ވަނީ ވިދާޅުވެފައެވެ.