އައްޔަނުކޮށްފައިވާ ސިޔާސީ މަޤާމެއްގައި ހުރި މީހަކަށް ދައުލަތާއި ދެކޮޅަށް ވަކާލާތު ނުކުރެވޭނެ ކަަމަށް ހައިކޯޓުން ނިންމައިފި!

އައްޔަނުކޮށްފައިވާ ސިޔާސީ މަޤާމެއްގައި ހުރި މީހަކަށް ދައުލަތާއި ދެކޮޅަށް ވަކާލާތު ނުކުރެވޭނެ ކަމަށް ދިވެހިރާއްޖޭގެ ހައިކޯޓުން ނިންމައިފިއެވެ. 

ހައި ކޯޓުން މިފަދަ ނިންމުމެއް ނިންމައިފައިމިވަނީ އިތުބާރުކުރެވޭ މަޤާމެއްގައި ހުރެ ކުޑަކުއްޖަކަށް ޖިންސީ ގޯނާ ކުރި މައްސަލައެއްގައި މައްސަލަ ރައްދުވާ މީހާގެ ވަކީލެއްގެ ހައިސިއްޔަތުން މޫސުމީ ބަދަލުތަކާއި ތިމާވެއްޓާއި ބެހޭ ވުޒާރާގެ ނައިބު ވަޒީރުގެ މަޤާމުގައި ހުންނެވި މުޙައްމަދު ރާޣިބް އަޙްމަދު ވަކާލާތުކުރައްވަމުން ގެންދަވާތީ، ދައުލަތުގެ އެފަދަ މަޤާމެއް ފުރަމުންދާ ފަރާތެއް ދައުލަތާ ދެކޮޅަށް މިފަދަ މައްސަލައެއްގައި ކޯޓުގައި ވަކާލާތުކުރުމަކީ މަސްލަހަތު ފުށުއެރުމެއް ކަމަށްބުނެ ހުށަހެޅި އިއުތިރާޟެއްގެ މައްސަލައެއްގައެވެ.

މި އިއުތިރާޟުގެ ޖަވާބެއްގެ ގޮތުގައި ވަކީލު ރާޣިބު ވިދާޅުވެފައިވަނީ ޕީޖީގެ އޮފީހަކީ ދައުލަތް ނޫން ކަމަށާއި އެއީ ސަރުކާރުގެ މުއައްސަސާއެއް ކަމަށެވެ. އެއާ ޚިލާފަށް ދައުލަތަކީ އެޓަރނީ ޖެނެރަލްގެ އޮފީސް ކަމަށްވެސް އޭނާ ވަނީ ވިދާޅުވެފައެވެ.

ހަމައެހެންމެ ޖިނާއީ ބޮޑެތި މައްސަލަތަކުގައި، މާލީ ތަނަވަސްކަން ނެތް ފަރާތްތަކަށް ޤާނޫނީ އެހީތެރިކަން ފޯރުކޮށްދެނީވެސް އެޓަރނީ ޖެނެރަލްގެ އޮފީހުން ކަމަށްވާތީ ޕީޖީގެ އޮފީހަކީ ދައުލަތް ނޫން ކަން އެނގޭ ކަމަށެވެ. 

މިގެއިތުރުން ރާޣިބު ވިދާޅުވީ ޖިނާއީ ދައުވާއެއް ރައްދުވާ ފަރާތަކީ ކުށެއް ނެތް މައުސޫމު ފަރާތަކަށް ވެސް ވެދާނެ ކަމަށާއި އެހެންކަމުން ޤާނޫނީ ވަކީލު ހުންނަ މަޤާމެއްގެ ސަބަބުން،، އެފަދަ ފަރާތެއްގެ ދިފާއުގައި ކޯޓުގައި ވަކާލާތު ކުރުން މަނާ ނުކުރެވޭނެކަމަށެވެ.

މިމައްސަލާގައި ޝަރީޢަތުން ރިޢާޔަތްކުރިގޮތުގައި ބުނެފައިވަނީ  ދައުލަތުގެ ސިޔާސީ މަޤާމެއް ފުރަމުންދާ މީހަކު ނުވަތަ ދައުލަތުގެ މުއްސަސާއެއްގައި މަޤާމެއް އަދާކުރަމުންދާ މީހަކު ދައުލަތާދާ ދެކޮޅަށް ވަކާލާތު ކުރުން މަނާކުރާ ޤާނޫނީ ހަމައެއް އޮތްތޯ ބަލަންޖެހޭކަމަށެވެ. 

މިއާއި ގުޅިގެން ޕީޖީ އޮފީހުގެ ފަރާތުން ބަންޑާރަ ނައިބުގެ އޮފީހުން ހޯދި ޖަވާބުގައި ވަނީ، ދައުލަތުގެ އެންމެ އިސްވެރިޔާ ރައީސުލްޖުމްހޫރިއްޔާ، އެމަނިކުފާނުގެ މަޤާމުގެ ވާޖިބުތައް އަދާކުރުމަށް ބޭނުންވާ މަޤާމުތަކަށް އައްޔަންކުރެވޭ ފަރާތްތަކާއި ދައުލަތުން މުސާރަ ދޭ މަޤާމުތަކުގައި ތިބޭ ފަރާތްތަކުގެ ތެރެއިން ޤާނޫނީ ވަކީލުންގެ ގޮތުގައި ހިމެނޭ ފަރާތްތައް ދައުލަތުގެ އިދާރާއަކާ ދެކޮޅަށް އެ ފަރާތެއްގެ މުވައްކިލު ތަމްސީލުކުރުމަކީ އެ މަޤާމަށް އައްޔަންކުރި ފަރާތް ނުވަތަ މުސާރަ ދޭ ފަރާތުގެ މަސްލަހަތާ ދެކޮލަށް މަސައްކަތް ކުރެވޭ ޙާލަތެއް ކަަމަށެވެ.

އަދި އެފަދަ މަޤާމެއްގެ އެންމެ މުހިންމު މަސްއޫލިއްޔަތަކަށް ވާންވާނީ ދައުލަތުގެ މަސްލަޙަތު އިސްކޮށްގެން ނެގެހެއްޓުމަށް މަސައްކަތްކުރުން ކަމަށްވާތީ ސިޔާސީ މަޤާމުތަކަށް އައްޔަންކޮށް އެ މަޤާމުގައި ނުވަތަ ދައުލަތުން މުސާރަ ދޭ އެ ނޫން ވެސް އެފަދަ މަޤާމުތަކުގައި ތިބޭހާ ހިނދަކު ދައުލަތާ ގުޅުންހުރި މައްސަލަތަކުގައި ދައުލަތާ ދެކޮޅަށް މަސައްކަތްކުރުމަކީ އޭނާގެ ވަކީލުކަމުގެ އަމިއްލަ މަސްލަޙަތާއި ދައުލަތުގެ މަސްލަޙަތާ ފުށުއަރާ ޙާލަތެއްކަންވެސް ވަނީ ފާހަގަކޮށްފައެވެ.

އެހެންކަމުން އެފަދައިން ކޯޓުތަކާއި ޓްރައިބިއުނަލްތަކުގައި ދައުލަތާ ދެކޮޅަށް ވަކާލާތު ކުރެވިދާނެކަމަށް ނުފެންނަ ކަމަށް ބަންޑާރަ ނާއިބު ވަނީ ވިދާޅުވެފައެވެ.

މި މައްސަލާގައި ހައިކޯޓުން މިއަދު ކުރި ޙުކުުމްގައި ވަނީ، ރާޣިބު އަކީ ރައީސުލްޖުމްހޫރިއްޔާ އައްޔަނުކުރައްވާފައިވާ ސިޔާސީ މަޤާމެއްގައި ހުންނެވި ބޭފުޅެއް ކަމުން، އެ މަޤާމުގައި ހުންނަހާ ހިނދަކު ދައުލަތާއި ދެކޮޅަށް ވަކާލާތު ނުކުރެވޭނެ ކަމަށެވެ.

އެގޮތަށް މައްސަލަ ބެއްލެވި ތިން ފަނޑިޔާރުން ކަމުގައިވާ ފަނޑިޔާރު ހުސައިން މަޒީދު، ފަނޑިޔާރު މުހައްމަދު ނިޔާޒު، ފަނޑިޔާރު މުހައްމަދު ސަލީމް ވަނީ އިއްތިފާޤުވެވަޑައިގެންފައެވެ.