16 އަހަރު ފަހުން ދިވެހިރާއްޖޭގެ ރައީސަކު ފުރަތަމަ ފަހަރަށް އދ.ކުނބުރުދޫއަށް ވަޑައިގެންފި!

ދިވެހިރާއްޖޭގެ ރައީސަކު އެންމެފަހުން އަރިއަތޮޅު ދެކުނުބުރީ ކުނބުރުދޫއަށް ޒިޔާރަތްކުރެއްވިތާ 16 އަހަރު ފަހުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް މިއަދު ވަޑައިގެންފިއެވެ. ރައީސް މުޢިއްޒުގެ މިދަތުރުފުޅަކީ، އދ. އަތޮޅަށް ކުރައްވަމުން ގެންދަވާ ތިން ދުވަހުގެ ރަސްމީ ދަތުރުފުޅުގެ 9 ވަނަ މަންޒިލެވެ. އެމަނިކުފާނަށް ކުނބުރުދޫގެ ރައްޔިތުން ވަނީ ހޫނު މަރުޙަބާއެއް ދަންނަވާފައެވެ.

ރައީސުލްޖުމްހޫރިއްޔާގެ މި ދަތުރުފުޅުގެ މައިގަނޑު މަޤްޞަދަކީ، ރާއްޖޭގެ ހުރިހާ އަތޮޅަކަށް ޒިޔާރަތްކުރައްވައި، ކައުންސިލުތަކާއި ރައްޔިތުންނާ ބައްދަލުކުރައްވައި، ރަށްރަށުގެ ތަރައްޤީއަށް ބޭނުންވާ ކަންކަމާއި ރައްޔިތުން އެންމެ ބޮޑަށް އެދޭ ކަންކަން ދެނެގަނެ، އެކަންކަން ހާސިލުކުރުމަށް މަސައްކަތްކުރެއްވުމެވެ. އެގޮތުން، ކުނބުރުދޫގައި އެމަނިކުފާނު ވަނީ ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، އިދާރާތަކުގެ އިސްވެރިންނާއެކު މަޝްވަރާ ބައްދަލުވުންތަކެއް ބާއްވާފައެވެ. މީގެއިތުރުން، ރަށުގެ ޢާންމު ރައްޔިތުންނާވެސް އެމަނިކުފާނު ބައްދަލުކުރައްވާފައިވެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި، އެމަނިކުފާނުގެ އަރިހުގައި ބައެއް ވަޒީރުންނާއި ސަރުކާރުގެ މުއައްސަސާތަކުގެ އިސްވެރިންގެ މައްޗަށް އެކުލެވޭ ވަފުދެއް ބައިވެރިވެވަޑައިގަންނަވައެވެ.

އެންމެ ފަހުން އެ ރަށަށް ރައީސެއް ދަތުރުފުޅެއް ކުރެއްވީ 2009 ވަނަ އަހަރު، އޭރުގެ ރައީސުލްޖުމްހޫރިއްޔާ މުޙައްމަދު ނަޝީދެވެ. އެ ދަތުރުފުޅުގައި ރައީސް ނަޝީދު ވަނީ ރަށުގެ ރައްޔިތުންނާ ބައްދަލުކުރައްވައި، އެ ދުވަސްވަރު ރަށަށް ދިމާވެފައިވާ މައިގަނޑު ދަތިތަކުގެ ތެރޭގައި ހިމެނޭ ގޮނޑުދޮށް ގިރުމާއި ބޯހިޔާވަހިކަމުގެ މައްސަލަތަކަށް އަމާޒުކުރައްވާފައެވެ. އޭގެ ފަހުން، 2025 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަތުރުފުޅާ ހަމައަށް، އެއްވެސް ރައީސުލްޖުމްހޫރިއްޔާއަކު ކުނބުރުދޫއަށް ދަތުރުފުޅެއް ކުރައްވާފައެއް ނުވެއެވެ. އެހެންކަމުން މިއީ 16 އަހަރަށްފަހު ކުނބުރުދޫ ރައްޔިތުންނަށް ލިބިގެންދިޔަ އުފަލެކެވެ.

ތަރައްޤީގެ ގިނަ މަޝްރޫޢުތަކެއް ފެށި، އުއްމީދުތައް އާވެއްޖެ

ރައީސް މުޢިއްޒުގެ މިދަތުރުފުޅާއެކު ކުނބުރުދޫގައި ތަރައްޤީގެ ގިނަ މަޝްރޫޢުތަކެއްގެ އަމަލީ މަސައްކަތް ފަށައިފިއެވެ. އެގޮތުން:

ޞިއްޙީ މަރުކަޒު ތަރައްޤީކުރުން: އދ. ކުނބުރުދޫ ޞިއްޙީ މަރުކަޒަށް ޖާގަ އިތުރުކުރުމުގެ އަމަލީ މަސައްކަތް ވަނީ ފަށާފައެވެ. މި މަސައްކަތް ރަސްމީކޮށް ފަށްޓަވައިދެއްވީ، ރައީސުލްޖުމްހޫރިއްޔާގެ އަރިހުގައި ވަޑައިގެންނެވި މާލީ ވަޒީރު މޫސާ ޒަމީރެވެ. 8.17 މިލިއަން ރުފިޔާގެ މި މަޝްރޫޢުގެ ދަށުން އަލަށް އިމާރާތެއް ކުރުމާއި، ގަރާޖެއް ހެދުމާއި، ވަށައިފާރު ރޭނުން ހިމެނެއެވެ. 300 ދުވަސްތެރޭ ނިންމުމަށް އެމްޓީސީސީއާ ޙަވާލުކޮށްފައިވާ މި މަސައްކަތް ނިމުމުން، 630 މީހުންގެ އާބާދީއެއް އޮންނަ ކުނބުރުދޫ ރައްޔިތުންނަށް ރަށުގައި ތިބެގެން ހޯދޭ ޞިއްޙީ ފަރުވާގެ ޚިދުމަތްތައް އިތުރަށް ތަރައްޤީވެ، ދުޅަހެޔޮކަން އިތުރުވެގެންދާނެއެވެ.

ބީއެމްއެލް އޭޓީއެމްގެ ޚިދުމަތް: ކުނބުރުދޫގައި ބީއެމްއެލް އޭޓީއެމްގެ ޚިދުމަތް ވަނީ ރަސްމީކޮށް ފަށާފައެވެ.
ބޯހިޔާވަހިކަމުގެ މަޝްރޫޢެއް: ރައީސް ޑރ. މުޢިއްޒު ވިދާޅުވީ، އަންނަ އަހަރު ކުނބުރުދޫގައި ބޯހިޔާވަހިކަމުގެ މަޝްރޫޢެއް ހިންގަވައިދެއްވާނެކަމަށެވެ. އެމަނިކުފާނު މިކަން ހާމަކުރެއްވީ ކުނބުރުދޫ ރައްޔިތުންނާއެކު ބޭއްވެވި މަޝްވަރާ ބައްދަލުވުމުގައެވެ.
ބިން ހިއްކުމާއި ބަނދަރު ތަރައްޤީކުރުން: ރައީސް ވިދާޅުވީ، ކުނބުރުދޫ ބިން ހިއްކުމާއި ބަނދަރުގެ އަމަލީ މަސައްކަތް އަންނަ ނޮވެމްބަރު މަހުގެ ތެރޭގައި ފެށިގެންދާނެކަމަށެވެ. އެކަމަށް ޚާއްސަ ހޮޕަރ ޑްރެޖަރެއް ގެންނަން ޖެހޭތީ މި މަސައްކަތް ނިމެން ގިނަވެގެން އަހަރެއް ނުވަތަ ދޮޅު އަހަރު ނަގާނެކަމަށް ވިދާޅުވިއެވެ. ކުނބުރުދޫއަކީ އދ. އަތޮޅުގެ ނިސްބަތުން އެންމެ ބިން ކުޑަ ރަށަށްވުމާއެކު، މި މަޝްރޫޢަކީ ރަށުގެ ކުރިއެރުމަށް ވަރަށް މުހިންމު މަޝްރޫޢެކެވެ.
ސްކޫލު ތަރައްޤީކުރުން: ކުނބުރުދޫ ސްކޫލުގެ މަލްޓިޕަރޕަސް ހޯލާއި އައު އިމާރާތުގެ މަސައްކަތް އެމްޓީސީސީއަށް ޙަވާލުކުރުމުގެ އެއްބަސްވުމުގައި ސޮއިކޮށްފައިވެއެވެ.
"ފޮފަޅަގައު" ރަށުގެ ބައެއްގެ ގޮތުގައި: ކުނބުރުދޫގެ ބައެއްގެ ގޮތުގައި "ފޮފަޅަގައު" ފަޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހަމަޖައްސަވައިދެއްވައި، އެތަން ކައުންސިލާއި ޙަވާލުކޮށްދެއްވާފައެވެ.
ކުޅިވަރުގެ އައު ވަސީލަތްތައް: އަލަށް ހުޅުވުނު ފުޓުބޯޅަ ދަނޑާއި މަލްޓިޕަރޕަސް ކޯޓުގެ ސަބަބުންވެސް ކުޅިވަރުގެ ދާއިރާއިން ޒުވާނުންނަށް އިތުރު ފުރުޞަތުތަކެއް ލިބިގެންދާނެކަމަށް ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވީ، މިހުރިހާ މަޝްރޫޢުތަކަކީވެސް ކުނބުރުދޫގެ ކުރިއެރުމަށް ވަރަށް މުހިންމު މަޝްރޫޢުތަކެއްކަމަށާއި، ސަރުކާރުން މިކަންކަމަށް ޚާއްސަ ސަމާލުކަމެއް ދެއްވައިގެން ކުރިއަށްގެންދަވާނެކަމުގެ ޔަޤީންކަން ދެއްވިއެވެ.

އިރާދަކުރެއްވިއްޔާ މިމަޝްރޫޢުތައް މިހިންގަނީ މިރަށަށް ފުރިހަމަ ކުރިއެރުން ގެނެސްދިނުމަށް. އަޅުގަނޑުމެންގެ ސިޔާސަތަކީ އާބާދީ ކުޑަވިޔަސް ތަފާތުކުރުމެއްނެތި ކަންކަން ކޮށްދިނުން 

ރައީސް

ގާތްގަނޑަކަށް 600 އަށްވުރެ ގިނަ މީހުން ދިރިއުޅެމުން އަންނަ ކުނބުރުދޫއަކީ ގާތްގަނޑަކަށް 5 ހެކްޓަރުގެ ކުޑަ ރަށެކެވެ. މި ރަށުގެ ރައްޔިތުން އާމްދަނީ ހޯދުމަށް މައިގަނޑުގޮތެއްގައި ކުރަމުންދަނީ ރިސޯޓުތަކުގައި ވަޒީފާ އަދާކުރުމާއި ފަރުމަހާއި ކަންނެލި މަސްވެރިކަމެވެ. ރައީސް މުޢިއްޒުގެ މި ދަތުރުފުޅާއި، މި ދަތުރުފުޅާއެކު ފެށުނު ތަރައްޤީގެ މަޝްރޫޢުތަކާއެކު، ކުނބުރުދޫ ރައްޔިތުންނަށް އައު އުއްމީދުތަކެއް ލިބިގެން ގޮސްފައިވާކަމަށް ފާހަގަކުރެވެއެވެ.