ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް: ހުކުރު ޚުޠުބާ

ހިފެހެއްޓުމެއް ނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް ކަމަށް މިއަދުގެ ހުކުރު ޚުޠުބާގައި ބުނެފިއެވެ.

“ހަނުހުރުމުގެ އަޚުލާޤު” މި މައުޟޫއަށް އިއްވި ޚުޠުބާގައި ބުނެފައިވަނީ ކަމަކާ މެދު އިންސާނާ ވިސްނައި، އޭނާގެ ޢަމަލުތައް މުރާޖަޢާކޮށް، އޭނާގެ ކަންތައްތަކަށާއި ޙާލަތްތަކަށް ބަލައި ވަޒަންކުރާ އިރު، އޭނާ ހަނުހުރުމުގެ އަތަށް ލެނބޭކަމަށެެވެ. އަދި ހަނުހުރުމަކީ މުއުމިނުންގެ ސިފަތަކުގެތެރޭގައި ހިމެނޭ ސިފައެއް ކަމަށާއި، އެއީ ބުއްދިވެރީންނާއި ވިސްނުންތެރީންގެ ސިފައެއް ކަމަށް ޚުޠުބާގައި ބުނެފައިވެއެވެ. 

ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް، ފަހެ އޭނާ ބާޠިލު ވާހަކަތަކާ ދުރުހެލިވެ ހުރެއްޖެ ނަމަ، އޭނާ ވާނީ ސުވަރުގޭގެ އަހުލުވެރިއަކަށް، އޭނާ ބާޠިލުވާހަކަދައްކަން ފަށައިފި ނަމަ ޝައިޠާނާ އޭނާ އަތްއަތަށް ދަމާން ފަށައިފާނެ، އެކަލޭގެ އެދޭގޮތަށް އެދޭ ކޮންމެ ވަގުތަކު އޭނާ އަނބުރައިލައިފާނެ، އިންސާނާއަށް އޭނާގެ ބަސްތައް ކޮންޓުރޯލުނުކުރެވިއްޖެ ނަމަ އޭނާއަކީ އަނގަ ހުތުރު، ހިތް ފަސާދަވެފައިވާ މީހަކަށް ވެދާނެ  

މިއަދުގެ ހުކުރު ޚުޠުބާގައި ބުނެފައިވެއެވެ.

އިންސާނާ ވަޒަން ކުރެވޭނީ އޭނާގެ ދުލުން ބުނާ ބަސްތަކުން ކަމަށް ޚުޠުބާގައި ބުނެފައިވެއެވެ. އަދި އޭނާ ހަނުހުރެއްޖެ ނަމަ އޭނާއާ މެދު، ނިޔާއެއް ކަނޑައަޅާކަށް ނޭނގޭނެކަމަށާއި، އޭނާ ވަހަކަދައްކައިފި ނަމަ، އޭނާގެ ޝަޚްޞިއްޔަތު ފާޅުވާނެކަމަށް ޚުޠުބަގައި ވަނީ ބުނެފައެެވެ.

މީގެއިތުރުން ހަރުދަނާކަމާއި ދޯހަޅިކަން ފެނިދާނެ ކަމަށް ވަނީ ބުނެފައެވެ. 

މުއުމިނާއަކީ އޭނާގެ ދުލަށް ރައްކައުތެރިވާ މީހާ، ޢަމަލު ގިނަކޮށް ބަސް މަދުކުރާ މީހާ، މުއުމިނާ ވާހަކަދައްކާނީ އޭނާގެ ނަފްސަށާއި އޭނާގެ މުޖްތަމަޢަށާއި އޭނާގެ ވަޠަނަށް ފައިދާ ހުރި ކަންކަމުގައި

ޚުޠުބާގައި ބުނެފައިވެއެވެ.

ހަނުހުރުމުގެ އިމަކީ ތިބާއާ ބެހޭ ކަންކަމުގައި ރިވެތި ބަހުން ބަސްބުނުން ކަމަށާއި، މިއަދު ބުނާ ކޮންމެ ކަލިމައަކާ ބެހޭ ގޮތުން ޤިޔާމަތްދުވަހުން ތިބާއާ ސުވާލުކުރެވޭނެ ކަމަށް ޚުޠުބާގައި ވަނީ ބުނެފައެވެ. އެހެންކަމުން ވާހަކަދައްކަންވާނީ މި ކަމަށް ސަމާލުވެގެންކަމަށްެވެސް ޚުޠުބާގައި ބުނެފައިވެއެވެ. 

މާތް ﷲއަށް تَقْوَىވެރިވާށެ، ހަނުހުރުމުގެ ޚުލްޤުން ޒީނަތްތެރިވާށެ، ބޭނުންވާ މިންވަރަށް ވާހަކަދައްކާށެ، މި ޒަމާނުގެ މީސްމީޑިޔާތަކުގެ މަންސަތަކަށް ވަދެ ވަގުތުތައް ބޭކާރު ގޮތުގައި ހޭދަނުކުރާށެ، ވަގުތަކީ މާތް ﷲ ދެއްވި ނިޢުމަތެއް، މި ނިޢުމަތާމެދު ޣާފިލުވާ މީހުން ވަރަށް ގިނަ، މި ނިޢުމަތުގެ ބޭނުން ހެޔޮގޮތުގައި ހިފުމަށް އަޒުމުކަނޑައަޅާށެ

ހުކުރު ޚުޠުބާގައި ގޮވާލައިފައިވެއެވެ

މީގެއިތުރުން ދުނިޔެއާއި އާޚިރަތުގައި ނަޖާވުމުގެ ވަޞީލަތަކީ ހަނުހުރުންކަމަށް މިއަދުގެ ހުކުރު ޚުޠުބާގައި ވަނީ ބުނެފައެވެ.