މާލެ ސަރަޙައްދުގައި 1300 އަށްވުރެ ގިނަ މީހުން އާސަންދައިން ހިލޭ މެޑިކަލް ޗެކަޕް ހަދައިފި

މާލެ ސަރަޙައްދުގެ ސަރުކާރު ހޮސްޕިޓަލްތަކުން މިހާތަނަށް 1300 އަށްވުރެ ގިނަ މީހުން އާސަންދަ ސްކީމްގެ ދަށުން ހިލޭ މެޑިކަލް ޗެކަޕް ހަދާފައިވާކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް  ހާމަކު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅަކާ އެއްގޮތަށް، މިއަހަރުގެ ޖުލައި މަހުން ފެށިގެން ކޮންމެ ދިވެހި ރައްޔިތަކަށްވެސް އަހަރަކު ދެފަހަރު އާސަންދަ ސްކީމްގެ ދަށުން މެޑިކަލް ޗެކަޕް ހެދުމުގެ ފުރުޞަތު ވަނީ ހުޅުވާލާފައެވެ. މިކަމުގެ މަޤްޞަދަކީ ބޮޑެތި ބަލިތައް ދުރާލައި ދެނެގަނެ، ފަރުވާ ލިބޭނެ އިންތިޒާމު ފަހިކޮށްދިނުމެވެ.

އިބްރާހިމް ޢަބްދުއްރައްޒާޤު ވިދާޅުވީ، "މިއީ އަންނަން އޮތް މުސްތަޤުބަލަށް، ދަރިންގެ ދަރިންނަށް މީގެ ފައިދާ ކުރާނެ ކަމެއް. މިހާރު ބަލިވުމުގެ ކުރިން ނުވަތަ ބަލި ބޮޑުވުމުގެ ކުރި ކުރިން ކަމެއް ހުރިތޯ ދެނެގަނެވޭނެ ގޮތްތައް ވަނީ ޤާއިމުކުރެވިފައި."

އައިޖީއެމްއެޗް، ދަރުމަވަންތަ ހޮސްޕިޓަލް، ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލުން މިހާތަނަށް ޖުމްލަ 1336 މެޑިކަލް ޗެކަޕް ހަދާފައިވާ ކަމަށް އޭނާ ހާމަކުރެއްވިއެވެ. އަދި އުމުރުން 40 އަހަރުން މަތީގެ ކޮންމެ މީހަކަށްވެސް ކެންސަރ ސްކްރީންކުރެވޭނެ އިންތިޒާމް ވަނީ ހަމަޖެހިފައެވެ.

ދާއިމީ ބޮޑެތި ބަލިތައް ގިނަވެ، ދައުލަތުން ބޭސްފަރުވާއަށް ކުރާ ހޭދަ އިތުރުވަމުންދާތީ، މި ޕްރޮގްރާމްގެ ބޭނުން ހިފުމަށް ކަމާބެހޭ އިދާރާތަކުން ވަނީ އާންމުންނަށް އިލްތިމާސްކޮށްފައެވެ. މިކަމުގެ ސަބަބުން ދުރާލާ ބަލިތައް ދެނެގަނެވި، އެ ބަލިތަކުން އަރައިގަތުމުގެ ފުރުޞަތު އިތުރުވެގެންދާނެ ކަމަށް ބެލެވެއެވެ.