ފާއިތުވި ދެދުވަހުވެސް ވިސާނެތި އުޅެމުންދިޔަ 7 ބިދޭސީއަކު ވަނީ ހައްޔަރުކޮށްފައި!

ފާއިތުވި ދެދުވަހުވެސް ވިސާނެތި އުޅެމުންދިޔަ 7 ބިދޭސީއަކު ހައްޔަރުކޮށްފައިވާ ކަމަށް މޯލްޑިވްސް އިމިގްރޭޝަނުން ބުނެފިއެވެ. 

އިމިގްރޭޝަނުން ބުނެފައިވަނީ ހުޅުމާލޭގައި އޮކްޓޫބަރު 31 އަދި ނޮވެންބަރު 01 ވަނަ ދުވަހުގައި ވެސް ވަނީ ޤަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް އިންސްޕެކްޝަނެއް ހިންގާފައިވާކަމަށެވެ.

އެގޮތުން ބެލި ސަރަހައްދުތަކުގައި ސައްޚަ ވިސާއެއް ނެތި ހަރަކާތްތެރިވަމުންދިޔަ 07 ބިދޭސީ ފިރިހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައި ކަމަށެވެ. 

https://twitter.com/ImmigrationMV/status/1852631696187044019

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ދެނެގަތުމަށް މިސަރުކާރުން ދަނީ ބޮޑު އިންސްޕެކްޝަނެއް ފަށައިފައެވެ.

އިންސްޕެކްޝަންގައި ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީންގެ ތެރެއިން ގިނަ ބަޔަކު ވަނީ ހިފައިފައިވެއެވެ. އަދި ރާއްޖޭގައި ޤަވާއިދާ ޚިލާފަށް ވިޔަފާރި ކުރަމުންދާ ބިދޭސީން ހިފައި އެފަދަ ގިނަ ވިޔަފާރިތަކެއް ވަނީ ސީލްކޮށްފައެވެ. 

އިމިގްރޭޝަނުން ހިއްސާކޮށްފައިވާ ތަފާސްހިސާބުތައް ދައްކާ ގޮތުން މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން މިދިޔަ މަހުގެ 17 ވަނަ ދުވަހާއި ހަމައަށް ޤަވާއިދާ ޚިލާފަށް ރާއްޖޭގައި އުޅުނު 4054 ބިދޭސީން ވަނީ އަނބުރާ އެ މީހެއްގެ ޤައުމަށް ފޮނުވާލާފައެވެ. މިގޮތުން އެންމެ ގިނަ އަދަދެއްގެ ބިދޭސީން ފޮނުވާލާފައިވަނީ މިއަހަރުގެ ޖޫން މަހުގައެވެ.